Yusifova S

“Əbədi uşaqlar” X “Şərq-Qərb”də

"Azərbaycan" kinoteatrında X Bakı Beynəlxalq Şərq-Qərb kinofestivalı çərçivəsində İran kinematoqrafı Puran Derəxşəndənin "Əbədi uşaqlar" filmi nümayiş etdirilib. Film 2007-ci ildə "FAR" studiyasında çəkilib. Nümayişdən əvvəl çıxış edən rejissor Puran Derəxşəndənin sözlərinə görə, 90-cı illərin əvvəlindən bəri İran kinosunda yeni dövr başlanıb. Bu dövrdə qadın rejissorlar kino yaradıcılığı sahəsində daha çox fəallaşıb və nəticədə iranlı qadının dolğun obrazı dünyaya təqdim olunub. Puran Derəxşəndə də öz yaradıcılığında qadın hüquqlarını təbliğ edir. Onun fikrincə, indi qadın ailədə və cəmiyyətdə öz yerini tapıb və özünü inkişaf etdirmək və kamilləşdirmək istiqamətində irəliləyir. Belə qadın bəsit düşüncəli, iradəsiz insan deyil. O, həyat yoldaşı kimi, ana kimi və ən başlıcası, insan kimi özünü kamilləşdirməyə çalışır və həyatdan tam zövq alır.
Filmdə aktyorlardan Şəhab Hüseyni, Elham Həmidi, Hadi Mərzban, Aqu Heradmənd, Pante Bəhram, Mehdi Məyami, Əli Əhmədi çəkilib.
   "Əbədi uşaqlar" filmi bir sıra nüfuzlu festivallarda mükafata layiq görülüb.

525-ci qəzet.- 2008.- 7 iyun.- S. 24.