Qədirov M

Qədirov M.

Azərbaycanın gözəl guşələrindən biri olan Ağdaş şəhərində həmin gün xüsusi bir canlanma var idi. Azərbaycan mədəniyyətinə neçə-neçə görkəmli elm və incəsənət xadimi bəxş etmiş bu torpaq Azərbaycan ifaçılıq sənətinin əlçatmaz zirvəsində parlayan sənət ulduzu, məşhur kaman ustası, xalq artisti Habil Əliyevin 80 illik yubleyini qeyd edirdi. Minlərlə ağdaşlı, yaxın rayonlardan və xarici ölkələrdən gələn yüzlərlə qonaq günü-gündən çiçəklənən və gözəlləşən Heydər Əliyev parkına tələsirdi...
Ömrünün 60 ildən çoxunu ifaçılıq sənətinə həsr etmiş, Azərbaycan mədəniyyətində və incəsənətində misilsiz xidmətləri olan, Vətənimizin ən ali mükafatları “Şöhrət” və “İstiqlal” ordenləri ilə təltif olunmuş xalq artisti Habil Əliyev öz həmyerliləri qarşısında böyük qürur və fəxarət hissi duyurdu...
Heydər Əliyev Fondunun prezidenti, YUNESKO-nun və İSESKO-nun xoşməramlı səfiri hörmətli Mehriban xanım Əliyevanın muğamlarımıza və xalq musiqimizə verdiyi yüksək qiymətin, bu sahədə onun gördüyü böyük işlərin, müdrik əməllərin sayəsində, Habil Əliyevin və bir çox əsl xalq sənətkarlarının ürək çırpıntıları ilə meydana atılaraq “keçmişə güllə atma, gələcək səni top atəşinə tutar” müdrik kəlamın prinsiplərini əsas tutaraq apardıqları mübarizənin nəticəsində muğamlarımıza, xalq mahnılarımıza yeni həyat, yeni yüksəliş verildi və əsl sənətkarlar qiymətləndirilməyə başladı.
Ağdaş şəhərində keçirilən bu musiqi bayramı da Heydər Əliyev Fondunun prezidenti hörmətli Mehriban xanım Əliyevanın tövsiyyəsi və xeyir-duası ilə təşkil olunmuşdu.
Mədəniyyət və maarif işçiləri ilə Habil müəllimin görüşü Ağdaş şəhər Humanitar kollecində keçirildi. Kollektivin bu şərafətli görüşə böyük məsuliyyət hissi ilə yanaşması, sənətkarın ifa etdiyi muğamların gənc ifaçılar tərəfindən səslənməsi, onun özünün bəstələdiyi mahnıların gənc müğənnilər tərəfindən məharətlə ifa olunması Habil müəllimi həm sevindirir, həm də kövrəldirdi...
Ağdaş rayon mədəniyyət şöbəsinin müdiri Tahir Əliyevin, pedaqoji kollektivin rəhbəri Tənzilə Şıxıyevanın və bir çox natiqlərin çıxışları yubiley iştirakçıları tərəfindən alqışlarla qarşılandı. Habil müəllim ona göstərilən bu səmimiyyətə, hörmət və ehtirama görə bütün kollektivə, müəllim heyətinə və şəxsən Tənzilə xanıma dərin minnətdarlığını bildirdi.
Ağdaş Rayon İcra Hakimiyyətinin başçısı Rafiq Niftalıyevin rəhbərliyi ilə rayonun nümayəndələri, ziyalıları və ağsaqqalları ilə keçirilən görüşdə Heydər Əliyev Fondunun prezidenti, YUNESKO və İSESKO-nun xoşməramlı səfiri Mehriban xanım Əliyevanın təbrik məktubu sürəkli alqışlarla qarşılandı.
Habil Əliyev yalnız Azərbaycanda yox, bütün dünyada ad qazanmış böyük bir sənətkar kimi, Azərbaycanın fəxri kimi qiymətləndirdi. Ulu öndərimiz Heydər Əliyevin sənətkarlarımiza, sənət adamlarımıza göstərdiyi böyük atalıq qayğısından söz açaraq ona rəhmət dilədi.
Öndərimizin Habil Əliyevə “Şöhrət” ordeni təqdim edərkən onun haqqında söylədiyi fikirləri isə görüş iştirakçıları ayaq üstə sürəkli alqışlarla qarşıladılar. Rafiq Niftalıyev ulu öndərimiz Heydər Əliyevin böyük əməllərinin davamçısı olan Azərbaycan Respublikasının Prezidenti cənab İlham Əliyevin Azərbaycan mədəniyyətinə, incəsənətinə göstərdiyi qayğıdan, sənətkarlara verdiyi yüksək qiymətdən söz açaraq, prezidentimizin Habil Əliyevə təqdim etdiyi “İstiqlal” ordenini bu diqqət və qayğının ali bir təzahürü kimi qiymətləndirdi. Azərbaycan xalqının rifahı və xoşbəxtliyi naminə gördüyü işlərdə ona böyük uğurlar arzuladı.
Habil Əliyev sənətinin və yaradıcılığının bilicisi, akademik Bəkir Nəbiyev çıxış edərək sənətkarımızı Azərbaycan ifaçılıq sənətinin patriarxı adlandırdı.
Azərbaycanın xalq şairi Fikrət Qoca Habil müəllimlə dostluğundan söz açdı, Habil Əliyev sənətini Azərbaycan ifaçılıq sənətinin əlçatmaz bir zirvəsi kimi qiymətləndirdi, sənətkara həsr etdiyi şeiri oxuyaraq, Habil müəllimi cavanlıq illərinə qaytardı...
Fikrət müəllim hörmətli Mehriban xanım Əliyevanın sənətə və sənətkarlara göstərdiyi qayğı və diqqətdən söz açaraq, ona bütün iştirakçılar adından dərin minnətdarlığını bildirdi.
Yazıçı və dramaturq Xeyrəddin Qoca Habil Əliyev sənətini yüksək qiymətləndirərək Şərq ölkələri alimlərinin və musiqiçilərinin sənətkarımız haqqında yazdıqları, söylədikləri fikirləri xatırlatdı.
Görüşün sonunda Habil müəllim çıxış edərək, ona göstərilən qayğıya və diqqətə görə rayon icra hakimiyyətinin başçısı Rafiq müəllimə dərin minnətdarlığını bildirdi.
Sonra isə bütün görüş iştirakçıları adından Azərbaycan Respublikasının Prezidenti cənab İlham Əliyevə müraciət qəbul olundu.
İcra hakimiyyətinin iclas zalındakı görüşdən sonra yubiley iştirakçıları Heydər Əliyevin abidə kompleksini ziyarət etdilər, abidənin üzərinə qızıl güllər qoyaraq, ulu öndərimizin ruhu qarşısında baş əydilər.
Heydər Əliyev Fondunun prezidenti Mehriban xanım Əliyevanın qərarı ilə Ağdaş şəhərində respublikamızda analoqu olmayan, ən müasir bir musiqi məktəbinin tikintisinin təməli qoyuldu və bu məktəbə görkəmli sənətkarımız Habil Əliyevin adının verilməsi qərara alındı.
Rəsmi görüşlərdən və mərasimlərdən sonra Heydər Əliyev adına parkda incəsənət ustalarının böyük konserti oldu. Xalq artisti Möhlət Müslümovun rəhbərliyi ilə təşkil olunmuş konsertdə xalq artisti Aygün Bayramova və gənc muğam ifaçıları məlahətli, gözəl ifaları ilə iyirmi minə yaxın tamaşaçını heyran etdilər.
Yubiley mərasimindən daha çox möhtəşəm mədəniyyət və incəsənət bayramını xatırladan bu gözəl gündə Azərbaycanın kamanını bütün dünyaya tanıtdıran, Azərbaycan kamanına dünya şöhrəti gətirən böyük sənətkar Habil Əliyev görüş iştirakçılarına üz tutaraq dedi:
“Mən fəxr edirəm ki, azərbaycanlıyam. Fəxr edirəm ki, Vətənimə, mədəniyyətimizə, incəsənətimizə ləyaqətlə və şərəflə qulluq etmişəm. Vətənimin isə mənə verdiyi yüksək qiymətə görə Heydər Əliyev şəxsiyyətinin ruhu qarşısında baş əyirəm. Cənab Prezidentimiz İlham Əliyev, Heydər Əliyev Fondunun Prezidenti Mehriban xanım Əliyevaya dərin minnətdarlığımı bildirirəm, onlara uzun ömür, can sağlığı arzulayıram. Azərbaycan xalqı qədirbilən xalqdır!”

Xalq qəzeti.- 2008.- 8 iyun.- S. 4.