Kübra

Azərbaycanın "Evrovision-2008" mahnı müsabiqəsindəki cıxışı olduqca uğurlu idi

Nizami Cəfərov: "Müsabiqədə ən böyük uğurumuz tutduğumuz yer yox, qazandığımız təcrübə oldu"

Bir neçə gün bundan önca Serbiyanın paytaxtı Belqrad şəhərində "Evrovision-2008" mahnı müsabiqəsinin yekun nəticələri başa çatdı. Milli Məclisin Mədəniyyət Məsələləri Daimi Komissiyasının sədri Nizami Cəfərovun fikrincə, Azərbaycan "Evrovision-2008" mahnı müsabiqəsində kifayət qədər böyük nailiyyət əldə etdi. Azərbaycan təmsilçilərinin bu nüfuzlu yarışmaya ilk dəfə qatıldığını nəzərə alsaq, onların ilk onluğa düşərək səkkizinci yeri tutmaları olduqca təqdirəlayiqdir: "Hesab edirəm ki, bu, bizim üçün böyük göstəricidir. Düzdür, bizim ifaçılar bundan daha yüksək yerlərə layiq idilər. Lakin ilk dəfə olduğu üçün bu nəticəyə də qane olmaq mümkündür. Müsabiqədə bizə dəstək verən ölkələr də az olmadı. Burada musiqinin qiymətləndirilməsi, dünyanın musiqi ictimaiyyətinin, musiqi cəmiyyətinin rəyi, mövqeyi də var. Heç şübhəsiz ki, dünyanın musiqi ictimaiyyətinin, cəmiyyətinin düşüncə tərzi bir az fərqlidir".

Millət vəkili, bununla belə Macarıstan dövlətinin təmsilçilərimizi ən yüksək, digər bəzi dövlətlərin isə ballarla-10, 12 ballarla qiymətləndirdiyini nəzərə çatdırdı. Qeyd etdi ki, bu yerdə dünyanın qloballaşdığını da nəzərdən qaçırmaq lazım deyil: "Bu gün istənilən ölkədə Azərbaycan və erməni lobbisi mövcuddur. Bəzən bu cür məsələləri ölkələrin maraqları yox, orada olan azərbaycanlıların tənasübü həll edir. Bu baxımdan, hesab edirəm ki, məyus olmağa səbəb yoxdur. Bu, bizim üçün kifayət qədər böyük nəticədir və ilk təcrübəmizdir. Əsas odur ki, musiqimiz, ifalarımız həm dünya musiqisi səviyyəsində, həm də milli notlar səviyyəsində oldu. Biz, eyni zamanda, bu müsabiqədən yaxşı mənada bir ibrət dərsi götürməli, nəticə çıxarmalıyıq. Düşünməliyik ki, bundan sonra nə edə bilərik, nə etmək lazımdır. Bir sözlə, bu müsabiqədə ən böyük uğurumuz tutduğumuz yer yox, qazandığımız təcrübə oldu".

N.Cəfərov, daha sonra Azərbaycan təmsilçilərinin bu müsabiqədə daha yaxşı dəstəklənməsi, daha ön yerləri tutması üçün xarici ölkələrdə fəaliyyət göstərən səfirliklərimizin, daimi nümayəndəliklərimizin üzərinə böyük vəzifələrin düşdüyünü bildirdi: "Əgər Macarıstan tərəfindən bizim təmsilçilərə ən yüksək bal verilibsə, deməli, o zaman Azərbaycanın həmin ölkədəki səfirliyi, konkret olaraq, səfirimiz Həsən Həsənov orada kifayət qədər uğurlu təbliğat işi apara bilib. Onu da qeyd edim ki, bundan öncə dəfələrlə Azərbaycan musiqiçiləri, elm adamları Macarıstanda olub, orada uğurlu konfranslar, elmi simpoziumlar keçiriblər. Eyni zamanda, biz macar alimlərini, türkoloqlarını, azərbaycanşünaslarını ölkəmizə dəvət etmişik, onlar burada bir neçə dəfə səfərdə olublar. Yəni məsələləri çox zaman bu cür münasibətlər, qarşılıqlı əlaqələr həll edir". O, bundan digər səfirliklərimizin təcrübə götürməli, bir nəticə çıxarmalı olduqlarını vurğuladı: "Onlar məhz Macarıstandakı səfirliyimiz kimi daha genişmiqyaslı işləməlidirlər. Yalnız iqtisadiyyat, təsərrüfat problemləri ilə məşğul olmamalı, dövlətlərarası münasibətlərin texniki tərəflərini qaydaya salmaqla, işlərini bitmiş saymamalıdırlar. Xarici ölkələrdəki səfırliklərimiz məhz bu istiqamətdə - ölkəmizin mədəniyyətinin, incəsənətinin, mədəniyyət, incəsənət xadimlərinin, sənət adamlarının təbliği istiqamətində də öz fəaliyyətlərini genişləndirməlidirlər".

N.Cəfərov, yaxın illərdə Azərbaycanın paytaxtında da "Evrovision"a bənzər nüfuzlu mahnı müsabiqələrinin keçirilməsinin mümkünlüyünü və gözlənildiyini qeyd etdi. Bu gün Azərbaycan elə bir ölkəyə çevrilməkdədir ki, yaxın gələcəkdə burada hər cür nüfuzlu, beynəlxalq müsabiqə, tədbir, toplantı, konfrans keçirilə bilər. Buna heç kimin şübhəsi olmasın: "Azərbaycanın bu cür nüfuzlu tədbirlərə, yarışmalara ev sahibliyi etməyə haqqı çatır".

Səs.- 2008.- 10 iyun.- S. 16.