Sevda

Xarici mətbuat Samirlə Elnurdan yazıb

Əcnəbilər onları bəyəniblər

Xarici mətbuat Azərbaycanın "Eurovision" müsabiqəsində ilk çıxışını çox bəyənib. Bir çox elektron qəzet yazır ki, Azərbaycanın layihədə çıxışı müsabiqənin son 10 ilki tarixində ən parlaq çıxışlardandır. Bu barədə "Kaspi"yə İctimai Televiziyadan məlumat verilib. Xəbərdə bildirilir ki, xarici mətbuatın qeydlərində Azərbaycanın çıxışının böyük rezonans doğurduğu və bu il yeni qatılan iki ölkədən finala keçən yeganə iştirakçı olduğu vurğulanıb. Azərbaycanı "Odlar yurdu" adı ilə təqdim edən beynəlxalq mətbuat təmsilçilərimizin fevralın 2-də Azərbaycanda keçirilən möhtəşəm seçim turundan söz açıb, eyni zamanda, "Land of fire" adlı şouda bir çox ölkədən mətbuat nümayəndələrinin də iştirakını qeyd edib.

Elnurla Samirdən də söz açan mətbuat nümayəndələri Belqradda keçirilən konserti xüsusi vurğulayaraq, 25 000 tamaşaçının toplaşdığı konsertdə ən yaxşı iştirak edənlərdən birinin məhz azərbaycanlı təmsilçilər olduğunu diqqətə çatdırıblar.

Elektron mətbuat həmçinin İTV-in sədri İsmayıl Ömərov və "Eurovision"un Azərbaycandakı nümayəndəliyinin sədri Adil Kərimlinin fikirlərinə də yer ayırıb. Elnurla Samirin çıxışına gəlincə, beynəlxalq mətbuat Elnurun operaya yaxın ifasını, Samirin YUNESKO tərəfindən qorunan Azərbaycanın qədim vokal-mədəniyyəti nümunəsi olan muğamı ifa etməsindən və aktyorluq məharətindən bəhs edib. Beynəlxalq mətbuat kompozisiyanın quruluşunu da tərifləyib.

Kaspi.- 2008.- 3 iyun.- S. 15.