Mütəxəssislərimiz beynəlxalq konfransda

Mədəniyyət və Turizm Nazirliyinin məlumatına əsasən, hər il Krımda "Kitabxanalar və informasiya resursları müasir elm, mədəniyyət, təhsil və biznes aləmində" mövzuda konfrans keçirilir.

Azərbaycanın kitabxana mütəxəssisləri də "Krım-2008" beynəlxalq yubiley konfransında iştirak edirlər (C.Cabbarlı adına Respublika Gənclər, F.Köçərli adına Respublika Uşaq kitabxanalarının direktorları, Gəncə şəhər və Astara rayon MKS-lərinin direktorları, Prezident Kitabxanasının, Xəzər və Qafqaz Universiteti kitabxanalarının mütəxəssisləri və s.).

Konfransın birinci iclas günü Azərbaycan mədəniyyətinin, incəsənətinin və tarixinin təbliğinə, habelə, ölkəmizin kitabxana sahəsinə və elektron kitabxanaların inkişafına həsr olunacaqdır.

"Krım" konfransı kitabxana, nəşriyyat, informasiya mərkəzləri, muzey və arxivlər, elm, mədəniyyət və təhsil müəssisələrinin rəhbər və mütəxəssislərinin, habelə, kompüter və internet-kompaniyalarının dünya peşəkar forumudur.

Konfrans İFLA-nın (İnternational Federation of Library Association) himayəsi ilə keçirilir.

"Krım-2008" konfransının əsas mövzuları - dünya informasiya infrastrukturu və informasiya cəmiyyətində kitabxanalararası kooperasiya; fondların formalaşdırılması və qorunması; kitabxanaların qarşılıqlı fəaliyyəti; kitabxanalarda və kitab yayımı sahəsində onlayn texnologiyalar; CD-ROM, elektron nəşrlər və internet; elektron kitabxanalar və elektron resurslar; avtomatlaşdırılmış kitabxana sistemləri və informasiya texnologiyaları; kitabxana, muzey və arxivlər vahid informasiya və incəsənət məkanında; milli dillərdə fondların formalaşdrrılması problemləri; korporativ kitabxana-informasiya sistemləri, korporativ texnologiyalar və kitabxana konsorsiumları; kitabxana-informasiya sisteminin informasiya linqvistik təminatı. Kitabxana formatları; elektron informasiyanın etikası və təhlükəsizliyi; informasiyaya açıq daxilolma və informasiyanın açıq arxivləri; hüquqi informasiya və s. ibarətdir.

Səs.- 2008.- 12 iyun.- S. 12.