Bakıda neft muzeyi yaradılmasının konseptual planı müzakirə edilmişdir

AzərTAc xəbər verir ki, martın 29-da ARDNŞ-in inzibati binasında Bakıda Neft Muzeyinin yaradılmasının konseptual planının müzakirəsi keçirilmişdir.
ARDNŞ-in prezidenti Rövnəq Abdullayev Prezident İlham Əliyevin 2008-ci il 4 fevral tarixli Sərəncamı ilə Bakı şəhərində Neft Muzeyinin yaradılmasına start verildiyini qeyd edərək, onun Azərbaycan neft sənayesinin 160 illik əfsanəvi tarixini özündə əks etdirən tarixi-mədəni bir kompleks xarakteri daşıyacağını bildirmişdir. Qeyd olunmuşdur ki, yaradılacaq muzeyin əsas məqsədlərindən biri Azərbaycanın iqtisadi qüdrətinin və müasir sosial-iqtisadi nailiyyətlərinin əsas amili olan neftin təbliğidir.
Konseptual plan barədə iştirakçılara məlumat verən muzey işinin təşkili şöbəsinin rəisi İlqar Əliyev bildirmişdir ki, Bibiheybət NQÇİ-nin neftdən təmizlənmiş 65 hektarlıq ərazisində təşkil ediləcək muzeyin yaradılması üç mərhələdə nəzərdə tutulur. Birinci mərhələdə muzeyin baş layihə planı hazırlanacaq, onun tərkibinə daxil olan obyektlərin siyahısı, sərhədləri və qorunan əraziləri müəyyənləşdiriləcəkdir. Növbəti mərhələdə muzeyin tematik planının hazırlanması, onun fəaliyyəti üçün zəruri olan eksponatların müəyyən edilməsi, muzeyin mülkiyyətinə verilməsi, qiymətləndirilməsi və satın alınması üzrə fond-satınalma komissiyasının yaradılması planlaşdırılır. Sonuncu - üçüncü mərhələdə isə Neft Muzeyi kompleksinin dizayn-memarlıq layihəsi müsabiqəsinin keçirilməsi, qalib layihənin müzakirəsinin təşkil edilməsi, sənədin müvafiq qaydada təsdiqi, eləcə də onun praktiki icrası nəzərdə tutulur.
Planın təqdimatından sonra ARDNŞ-in vitse-prezidentləri Xaliq Məmmədov, Qorxmaz Hüseynov və Muxtar Babayev çıxış edərək, fikir və təkliflərini bildirmişlər.
Müzakirəyə yekun vuran ARDNŞ-in prezidenti R.Abdullayev demişdir ki, Neft Muzeyi həm də gənc nəslin milli sərvətlərimizə dərin hörmət və ehtiram ruhunda tərbiyə edilməsinə xidmət göstərməlidir. Eyni zamanda muzey kompleksinin layihələndirilməsi zamanı ARDNŞ üçün yüksək səviyyəli kadrlar hazırlayacaq təhsil mərkəzinin yaradılması da nəzərdə tutulmalıdır. Şirkət prezidenti qeyd olunan təkliflər nəzərə alınmaqla konseptual planın məqbul hesab edildiyini bildirmiş və müvafiq strukturlara konkret tapşırıqlar vermişdir.

Azərbaycan.- 2008.- 30 mart.- S. 2.