Akif A.

“Azərbaycan turistlər üçün təhlükəsiz ölkələr siyahısındadır”

Mədəniyyət və Turizm naziri gələn il ölkəyə turist axınının gözlənildiyini söyləyir

“Dünyada iqlimin dəyişməsi, siyasi böhranlar, "quş qripi" kimi xəstəliklər, təbii fəlakətlər turizmin inkişafına mənfi təsir göstərən amillərdəndir. Amma buna baxmayaraq, turizmin inkişafında artım davam edəcək". Bu fikirləri dünən YAP qərargahında keçirilən mətbuat konfransında Mədəniyyət və Turizm naziri Əbülfəs Qarayev səsləndirdi. O əlavə etdi ki, Azərbaycana daha çox turistlərin cəlb olunması ilə bağlı təbliğat işləri davam etdirilir.

Nazir onu da vurğuladı ki, 2009-cu ildə ölkəyə böyük turizm axını gözlənilir ki, bu da həmin il qeyd olunan beynəlxalq tədbirlərlə əlaqədardır. Ə.Qarayevin dediyinə görə, Azərbaycanın turistlər üçün ən təhlükəsiz ölkələr siyahısında olması da bu amili gücləndirir.

Ölkədəki mehmanxana və istirahət ocaqlarına gəlincə, nazir açıqladı ki, Mədəniyyət və Turizm Nazirliyi 2007-ci ilin sonuna qədər yalnız 150 mehmanxanaya lisenziya verib. Yanvarın əvvəlindən isə nazirliyin müraciətinə əsasən yerli vergi orqanları tərəfindən lisenziya almayan bütün mehmanxanaların fəaliyyəti dayandırılıb. Odur ki, hazırda yüzə qədər mehmanxananın qapısı bağlıdir. Çünki onlar qanunlara riayət etməyiblər. Bundan sonra nazirliyə müraciət edən mehmanxanalardan yalnız 25-i lisenziya ala bilib. "Müraciətlərlə bağlı proses davam edir. İlin axırında biz onları xəbər etdik ki, tələssinlər, onlar tələsmədilər. İndi də biz tələsmirik" deyən nazir əlavə etdi ki, hər müraciətə bir ay müddətində baxılır.

Nazir turistlərin statistikasını da açıqladı. Ötən il Azərbaycana ümumilikdə 1 milyon 332 min nəfər gəlib. Ancaq bu rəqəm onların hamısının turist olması anlamına gəlməməlidir. Ə.Qarayev hesablanma zamanı turistlərlə bağlı göstəricilərin gerçək rəqəmlərə əsaslandığını deyib: "Biz ümumilikdə sərhədi keçən adamların sayından Azərbaycanda işləyən adamların birini ikiyə vuraraq çıxırıq. Çünki bu adam Azərbaycanda işləyirsə, iki dəfə məzuniyyətə gedib qayıda bilər. Ümumi saydan burada oxuyan tələbələrin sayını da çıxırıq və dördə vururuq. Çünki hər tələbə semestrlə bağlı dörd dəfə gedib-gələ bilər. Bundan başqa, Azərbaycana İran, Rusiya, Gürcüstandan avtomobillə gələn adamların 80 faizini bu siyahıdan çıxırıq. Çünki bunlar turist deyillər. Amma dünyada bunlar da turist sayılır".

Natiq əlavə etdi ki, 2006-cı ildə ümumilikdə 1 milyon 193 min adam gəlib ki, onlardan da yalnız 903 mini turist olub. Ötən il gələn 1 milyon 332 min nəfərdən isə 1 milyon 10 mini turist sayıla bilər. Bu o deməkdir ki, Azərbaycan turistlərin sayında bir milyon həddini aşdı. Deməli, Azərbaycana turist kimi gələn insanların sayı il ərzində 11,5 faiz civarında artmaqdadır. Nazir deyir ki, bu rəqəmlər nəzərə alınarsa, gələn il təxminən əlavə 150-200 min nəfərin ölkəyə turist kimi gəlməsi planlaşdırılır.

Turizmlə bağlı layihələrdən söhbət açan Ə.Qarayevin bildirdiyinə görə, bu sahədə böyük layihələrdən biri Qusar rayonunda gerçəkləşəcək. Şahdağın ətəyində yerləşən ərazidə yeni qış-yay idman, turizm, sağlamlıq kompleksi inşa ediləcək. Avstriya mütəxəssıslərinin tövsiyələri əsasında inşa ediləcək kompleksin tikintisinə hazırlıq işləri tamamlanıb. Hazırda nazirlikdə bütün eskizlər mövcuddur. Tədqiqatlar davam etdirilir. Bu ilin yayından artıq dərin qazıntı işlərinin aparılması nəzərdə tutulur:

"Kompleks üçün tələb olunan avadanlıqların hansı dərinlikdə olması dəqiqləşdirilməlidir. Çünki bu ərazi seysmik zona hesab edilir. Ona görə çox ciddi təhlillər və tədqiqatlar aparılmalıdır. Bu işə isə Avstriya mütəxəssislərini cəlb etməyi nəzərdə tutmuşuq".

Layihənin mərhələlər üzrə inkişaf proqramının təsdiqləndiyini deyən nazir əlavə edib ki, bu yay ərazidə infrastrukturun qurulması ilə bağlı işlərə də başlanılacaq. Birinci mərhələdə nəzərdə tutulan iki qaldırıcı stansiya, üç lift, bir mehmanxana, yanğmsöndürmə xidməti, xizək sürmək üçün məktəb, avadanlığın saxlanılması üçün obyektin tikintisi dövlət tərəfindən maliyyələşdiriləcək. Nazir əlavə edib ki, ərazidə infrastrukturun qurulmasr üçün dövlətin üzərinə ciddi işlər düşür: "İki min metr hündürlüyə yaxın sahədə yerləşən ərazidə nə yaxşı su mənbəyi, nə işıq, nə də yol var. Ona görə də burada böyük işlərin aparılması nəzərdə tutulur və bunun üçün ölkə başçısı tərəfindən müvafiq göstərişlər də verilib. Ölkəmizdə heç vaxt belə böyük layihə həyata keçirilməyib".

Ə.Qarayev bildirib ki, gələn mövsümdə qarın səviyyəsini dəqiq ölçmək üçün bu il ərzində ciddi işlər aparılmalıdır: "İnanırıq ki, 2009-2010-cu illərin qış mövsümündə azərbaycanlı, eləcə də xarici turistlər bu kompleksdən istifadə edə biləcəklər. Gözəl mənzərəsi olan bu ərazidə yay istirahəti üçün də əlverişli şərait yaratmaq niyyətindəyik".

Çox bahalı olan bu layihəni mütəxəssislər təxminən milyard yarım-iki milyard manat həcmində dəyərləndirirlər. Amma bu vəsaitin hamısını dövlət verməyəcək. Dövlətin üzərinə yalnız infrastruktur işləri düşür. Qalan işlərin icrası üçün isə açıq tender elan ediləcək. Mövcud olan layihə üzərində sərmayədarlar öz işlərini görə bilərlər. Dövlətin özəl layihələrə sərmayə qoymaq niyyəti yoxdur. O yalnız infrastrukturu genişləndirməklə buraya sərmayədarların cəlb olunmasına lazımi şərait yaradacaq.

Ayna.- 2008.- 15 mart.- S. 11.