Hacızadə A.

Azərbaycan “İnturmarket-2008” beynəlxalq turizm sərgisində təmsil olunmuşdur

Martın 18-də Moskvada möhtəşəm "Krokus Ekspo" sərgi kompleksində "İnturmarket-2008" illik beynəlxalq sərgisi başa çatmışdır. Bu mötəbər forumda dünyanın 50 ölkəsindən 1500, o cümlədən Rusiyanın 75 regionundan 800 turizm şirkəti ilə yanaşı, Azərbaycan da təmsil olunmuşdur. Ölkəmizin turizm potensialını Mədəniyyət və Turizm Nazirliyi və bir sıra turizm şirkətləri təqdim etmişlər.
Köhnə Bakı üslubunda tərtib edilən Azərbaycan stendində kitabçalar, plakatlar, jurnallar təqdim olunmuş, ölkəmizin görməli yerləri, müasir tipli turizm obyektləri, ümumiyyətlə, turizm potensialı və bu sahədə cəlbediciliyindən bəhs edən foto və videomateriallar nümayiş etdirilmişdir.
Sərgi iştirakçıları ötən mövsümə yekun vurmuş və gələn il üçün inkişaf meyillərini müəyyənləşdirmişlər. Bu sərgidə iştirak Azərbaycanın turizm potensialının xarici bazarlara çıxarılması istiqamətində görülən işlərin planlı şəkildə genişləndirilməsinə, yeni işgüzar əlaqələrin yaradılmasına və inkişafına, təcrübə mübadiləsinə kömək etmişdir.

Azərbaycan.- 2008.- 19 mart.- S. 7.