Səudiyyə Ərəbistanı Azərbaycanın mehmanxana biznesinə sərmayə qoymaq niyyətindədir

Martın 18-də Azərbaycanın Baş naziri Artur Rasizadə ölkəmizdə qısamüddətli səfərdə olan Səudiyyə Ərəbistanının Şahzadəsi əl-Valid bin Təlal bin Əbdüləziz Al Səud ilə görüşmüşdür.
Azərbaycan hökumətinin başçısı son illərdə iki ölkə arasında bütün sahələrdə fəal inkişaf edən əlaqələrdən danışmış, BMT Baş Məclisində Dağlıq Qarabağ münaqişəsi ilə bağlı qətnaməyə səsvermə zamanı prinsipial mövqeyinə görə Səudiyyə Ərəbistanı rəhbərliyinə təşəkkürünü bildirmişdir.
Baş nazir əminliyini söyləmişdir ki, Səudiyyə Ərəbistanı nümayəndə heyətinin budəfəki səfəri ikitərəfli münasibətlərin inkişafına təkan verəcəkdir.
Şahzadə əl-Valid bin Təlal Azərbaycan iqtisadiyyatının dinamik inkişaf etdiyini vurğulayaraq demişdir ki, Bakıda gedən geniş tikinti işləri buna daha bir sübutdur. O, ümidvar olduğunu bildirmişdir ki, Azərbaycanın təşəbbüsü ilə regionda həyata keçirilən qlobal energetika layihələri Azərbaycan xalqının rifahının yüksəlməsinə xidmət edəcəkdir.
Konkret layihələrin gerçəkləşdirilməsindən danışan Şahzadə, mehmanxana biznesi, o cümlədən “Kingdom Hotels International” şəbəkəsi mehmanxanasının açılması sahəsində Azərbaycanla əməkdaşlıq etmək niyyətində olduğunu bildirmişdir.

Xalq qəzeti.- 2008.- 19 mart.- S. 2.