Bill Klinton azərbaycanlı pianoçuya məktub göndərib

ABŞ-ın sabiq prezidenti Bill Klinton pianoçu Çingiz Sadıxova təşəkkür məktubu yollayıb. Sənətkarın həyat yoldaşı Ceyran Sadıxovanın APA-ya verdiyi məlumata görə, bir ay əvvəl o, Bill Klintonun yeni "Giving" kitabının San-Fransisko şəhərində keçirilən təqdimat mərasimində iştirak edib. Xanım Sadıxova sabiq Ağ Ev sahibi ilə görüşərək ona prezident Heydər Əliyevin ABŞ-a səfəri zamanı təqdim etdiyi xalçanın şəklini və pianoçu Sadıxovun ifasında Azərbaycan və ABŞ musiqi nümunələri olan iki diski bağışlayıb.

Qeyd edək ki, mərhum prezident Heydər Əliyevin Klintona təqdim etdiyi xalçada ürək işarəsinin ətrafında Bill və Hillari Klintonların cizgiləri həkk olunub. Xalçanın fotoşəkli isə "Azerbaijan İnternational" jurnalında çap olunub. Ceyran Sadıxovanın sözlərinə görə, prezident Klinton Heydər Əliyevi yaxşı xatırladığını və hədiyyəsinin onun ürəyində dərin iz buraxdığını deyib. Həmin görüşdən 3 həftə sonra isə Bill Klinton Çinqiz Sadıxova təşəkkür məktubu yollayaraq ona verilmiş hədiyyələrə görə minnətdarlığını bildirib. Cənab Klinton Çingiz Sadıxovun ifasında Azərbaycan və ABŞ musiqi parçalarını dinləməkdən həzz aldığını yazıb. Sənətkarın yoldaşı bildirib ki, sabiq prezidentə hədiyyələr təqdim edərkən o, milli musiqimiz və Kaliforniyada çap olunan "Azerbaijan İnternational" jurnalı haqqında ona məlumat çatdırmaq istəyib. Xatırladaq ki, xalq artisti Çinqiz Sadıxov 90-cı illərin ortalarından Kaliforniyanın San-Fransisko şəhərində yaşayır.

Yeni Azərbaycan.- 2008.- 5 mart.- S. 8.