Dünya
şöhrətli violonçel ustası, həmyerlimiz Mstislav
Rostropoviçin doğum günü münasibətilə onun
ev muzeyində tədbir keçirilmişdir.
Dahi
musiqiçinin 81-ci doğum günü münasibətilə
muzeydə “açıq qapı” elan edilmişdir. Muzeyin eksponatları ilə yaxından tanış olmaq istəyənlər iki gün ərzində bura baş çəkib,
tanınmış musiqiçi
ilə bağlı ətraflı məlumat əldə edə bilmişlər.
Anma
tədbirinə toplaşanlar Mstislav Rostropoviçlə
bağlı xatirələrini bölüşmüş, onun
ömrünün Bakı dövrünün yaddaqalan
məqamlarından söz açmışlar. Bildirilmişdir ki, 1927-ci ilin
baharında Bakıda anadan olan maestro
5 ilə yaxın bir vaxtda bu
evdə yaşamışdır.
Tədbirdə
dünya şöhrətli musiqiçi ilə ümummilli
lider Heydər Əliyev arasındakı dostluq
münasibətlərindən söz
açılmışdır. Qeyd olunmuşdur
ki, violonçel ustasının ulu öndərimizlə olan səmimi münasibəti maestronu öz doğma şəhərinə
sıx tellərlə
bağlayırdı.
Olduqca humanist insan olan Rostropoviçin
uşaqlara göstərdiyi
qayğıdan danışan
tədbir iştirakçıları
Bakıda yaradılan Rostropoviç və Vişnevskaya Fondunun körpə uşaqların peyvənd olunması istiqamətində
gördüyü işləri
xatırlatmışlar.
Tədbirdə
maestronun pedaqoji fəaliyyəti də xüsusi qeyd
olunmuşdur.
Sonda Bakı
Musiqi Akademiyasının tələbələrinin ifasında
klassik əsərlərdən parçalar
səslənmiş, görkəmli sənətkar haqqında
sənədli filmlər nümayiş etdirilmişdir.
Xalq qəzeti.- 2008.- 30 mart.- S. 5.