Quliyev L.

Muğam müsabiqəsinin qalibləri Bərdədə

Azərbaycan Mədəniyyətinin Dostları Fondunun layihəsi əsasında və Heydər Əliyev Fondunun dəstəyi ilə "Azərbaycan Televiziya və Radio Verilişləri" Qapalı Səhmdar Cəmiyyətinin keçirdiyi və üç aydan çox davam etmiş "Muğam televiziya müsabiqəsi-2007" nəinki respublikamızda, həmçinin bütün dünyada böyük əks-səda doğurmuş, milli musiqimizə beynəlxalq marağı qat-qat artırmışdır. Son illər ölkəmizdə milli-mənəvi dəyərlərin uca tutulması, xüsusilə muğam sənətinə böyük önəm verilməsi cəmiyyətin bütün təbəqələrində böyük razılıqla qarşılanır, hər kəsdə minnətdarlıq doğurur.
Martın 13-də Bərdə rayonunda muğamsevərlər bayram əhval-ruhiyyəli bir gün yaşadılar. "Muğam televiziya müsabiqəsi-2007"nin qalibləri və münsiflər heyətinin üzvləri Qarabağın bu dilbər guşəsində bir günlük qonaq oldular. Şəhər mədəniyyət evində gerçəkləşən konsertə ətraf rayonlardan da muğamsevərlər gəlmişdilər. Muğam böyük bir xəzinədir. İtib-batmaqda olan bu xəzinəni öz sahibinə, Azərbaycan xalqına qaytaran Heydər Əliyev Fondunun Prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın ünvanına muğam gecəsində minnətdarlıqla dolu fikirlər səsləndi. Mehriban xanım Əliyevanın müsabiqənin qalibləri və münsiflər heyətinin üzvləri ilə görüşündə dediyi: "Muğam bizim mədəniyyətimizin, Azərbaycan mədəniyyətinin əsas sütunlarından biridir və əlbəttə, onu qorumaq, inkişaf etdirmək, gələcək nəsillərə çatdırmaq hər bir azərbaycanlının mənəvi borcudur" sözləri muğam gecəsinin əsas leytmotivinə çevrildi.
Konsertə 2005-ci ildə keçirilmiş muğam müsabiqəsinin qalibləri də qatılmışdılar. Musiqisevərlər mahir muğam ustası Arif Babayevin əməyinin dövlət səviyyəsində yüksək qiymətləndirilməsinə, respublika Prezidenti İlham Əliyevin sərəncamı ilə "İstiqlal" ordeninə layiq görülməsinə bitib-tükənmək bilməyən alqışları ilə münasibət bildirdilər.
Konsertdə gənc muğam ifaçılarının hər bir çıxışı alqışlarla qarşılanır, səhnə gül-çiçəyə qərq olurdu. Muğam gecəsinin sonunda Bərdə Rayon İcra Hakimiyyətinin başçısı İlham Ağayev çıxış edərək milli-mənəvi dəyərlərimizə, xüsusilə muğam sənətinə göstərdiyi misilsiz qayğıya görə Heydər Əliyev Fondunun Prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevaya rayon ictimaiyyəti adından minnətdarlığını bildirdi, bərdəlilərin dəvətini qəbul edib Qarabağın bu qədim və dilbər guşəsinə təşrif buyurduqları üçün muğam musabiqəsinin qaliblərinə və dəyərli münsiflər heyətinin üzvlərinə xoş arzularını bildirdi. Müsabiqənin qaliblərinə və münsifər heyətinin üzvlərinə Bərdə Rayon İcra Hakimiyyətinin qiymətli hədiyyələri təqdim olundu.

Azərbaycan.- 2008.- 16 mart.- S. 12.