Emin Sabitoğlunun xatirə gecəsi keçirildi


Dünən "İbrus" Teatrında xalq artisti, dövlət mükafatı laureatı, professor Emin Sabitoğlunun yaradıcılığına həsr olunmuş xatirə gecəsi keçirildi. Tədbirdə bəstəkar filmlərdə anıldı. Qeyd edək ki, tədbirin təşkilatçısı Dövlət Film Fondu idi. Gecə Film Fondunun direktoru Cəmil Qulyev açaraq Emin Sabitoğlunun həyat yaradacılığından danışdı. O, bildirdi ki, Emin Sabitoğlu öz kino fəaliyyəti ilə Azərbaycan kinematoqrafiyasına uğur qazandıran, milli kinomuzun inkişafında əhəmiyyətli xidmətləri olan tanınmış bəstəkarlarımızdandır. Sonra bəstəkarın yaradıcılığı ilə bağlı daha geniş izahlı danışmaq üçün sözü Mədəniyyət Turizm Nazirliyinin əməkdaşı Lalə Hüseynovaya verdi: "Emin Sabitoğlunun yaradıcılığından söhbət açarkən onun filmlərə yazdığı kino musiqisini xüsusilə qeyd etmək lazımdır. Emin Sabitoğlu kino musiqisinə hələ tələbəlik illərindən maraq göstərirdi. O, sonralar 20-dən artıq bədii, 14 sənədli, 4 qısametrajlı filmə musiqi yazmışdır.

Bədii filmlərə gəlincə, Emin Sabitoğlunun ilk işi 1964-cü ildə yaradılmış "Kimi daha çox sevirik" kinoalmanaxındakı "Dağ meşəsindən keçərkən" novellası idi. Bunun ardınca bir çox filmlərə musiqilər bəstələyib. Sonra həmin filmlərdən bəzilərindən fraqmentlər nümayiş etdirildi.

Tədbir boyunca onun musiqi bəstələdiyi filmlərdən maraqlı süjetlər nümayiş olundu. Tədbirin sonunda kinorejissor Əbdül Mahmudovun 1974-cü ildə ekranlaşdırdığı "Qeyri-adi ov" qısametrajlı bədii filmi nümayiş etdirildi. 2007-ci ildə Rusiya Dövlət Film Fondunda bərpa edilərək Azərbaycana gətirilən bu filmin bəstəkarı yenə Emin Sabitoğlu idi.

 

Üç nöqtə.- 2008.- 12 mart.- S. 13.