“Qarayevsiz”: Festivala bu gün start verilir

Mədəniyyət və Turizm Nazirliyi "25 il Qarayevsiz" adlı festival təşkil edir. Martın 7-dən 18-nə qədər davam edəcək layihə ərzində 5 konsert proqramı keçiriləcək. Bu barədə "Kaspi"yə nazirliyin musiqi sektorunun müdiri Fərəh Əliyeva məlumat verib.

Onun sözlərinə görə, festival çərçivəsində Kamera orkestri və orkestr solistləri Azərbaycan bəstəkarlarının əsərlərini səsləndirəcəklər. Dövlət Filarmoniyasında təşkil olunacaq festivalda xarici musiqiçilər qonaq olacaqlar. Bununla yanaşı, Mədəniyyət və Turizm Nazirliyi, Bəstəkarlar İttifaqı, AMEA, Bakı Musiqi Akademiyasının təşkilatçılığı ilə "Qara Qarayev və müasirlik" adlı elmi-nəzəri konfrans keçiriləcək. Konfransda 20-dən artıq məruzə dinləniləcək.

Söhbət əsnasında öyrəndik ki, Mədəniyyət və Turizm Nazirliyinin hər il təşkil etdiyi daha bir - "Azərbaycan musiqisi festivalı" bu dəfə Salyanda davam etdirilib. Fərəh Əliyevanın əlavəsinə görə, Salyan Mədəniyyət Evi və Uşaq Musiqi məktəbində keçirilən festivalda Xalq Çalğı Alətləri Ansamblı çıxış edib. Xatırladaq ki, festival artıq 18 rayonda keçirilib.

Kaspi.- 2008.- 7 mart.- S. 17.