Mütəllimova S.

Səhnəyə yayılan çiçək qoxusu

Dövlət Gənc Tamaşaçılar Teatrının tamaşaları daha çox yeniyetmələrə, uşaqlara hesablanır. Bəllidir ki, onların da tamaşalara münasibəti eyni olmur. Açıq deyək ki, bəzən salondakı səs-küydən aktyorlar da əsəbiləşirlər. Çox şıltaq, nadinc uşaqlar tamaşanın gedişinə mane olmağa "çalışırlar". Belə hallarda aktyorlar da etinasızlıq göstərir, ruhdan düşür, tamaşanı istənilən səviyyədə oynamırlar...

- Amma mən bunun tam əleyhinəyəm. Çünki belə hallarda əsl tamaşaçı əziyyət çəkir. İstədiyi mənəvi qidanı ala bilmir... Əlbəttə, yeniyetmə və gənclərin, uşaqların mədəni səviyyəsi nə qədər yüksək o/arsa, bir o qədər bizim xeyrimizədir, - deyir Günel Məmmədova.

Günellə söhbətimizə teatrın direktoru Mübariz Həmidov da qoşulur. O, Günelin teatra ilk gəlişini belə xatırlayır. "Teatrımızın aktyor truppasının potensialının möhkəmləndirilməsi, istedadlı gənclərin teatra cəlb olunması üçün Mədəniyyət və İncəsənət Universiteti ilə sıx əlaqə saxlayırdım - Bu bağlılıq indi də davam edir. 3 ilə yaxın universitetdə Azərbaycan teatr tarixindən mühazirələr oxumuşam. Aktyorluq, rejissorluq, mədəni-maarif, teatrşünaslıq fakültələrinin tələbələrini yaxşı tanıyırdım. Teatra rəhbər təyin olunandan sonra da tələbələrin kurs və diplom işlərinə baxırdım. Həmin dövrdə bir neçə gənci teatra dəvət etdim ki, onlardan biri də Günel Məmmədova oldu. Günel 2006-cı ildə Mədəniyyət və İncəsənət Universitetinin estrada aktyorluğu fakültəsini bitirib. Universiteti qurtaran kimi teatrımızda işlə təmin olunan Günelin ilk rolu "Çimnaz xanım yuxudadır" tamaşasında Nabat oldu. Tamaşa Süleyman Rüstəmin 100 illik yubileyi ərəfəsində dövlət sifarişi ilə hazırlanırdı. Bu rolla Günel çox böyük uğur qazandı. Tələbə-aktyorun uğurlu işi həm teatr ictimaiyyətini, həm də bədii şura üzvlərini qane etmişdi. O vaxtdan Günelə bir-birinin ardınca tamaşalarda müxtəlif rollar həvalə edildi. Gənc Tamaşaçılar Teatrının spesifikası müxtəlifdir. Biz də uşaq tamaşaları daha çox oynanılır. Alleqorik obrazlar - siçan, pişik, tülkü - oynamağı hər aktyor bacarmır. Günel Məmmədova estrada aktyorluğu fakültəsini bitirdiyi üçün belə rolların öhdəsindən bacarıqla gəlir. Onun gözəl səhnə görünüşü, incə musiqi duyumu, güclü plastikası var, o hər cəhətdən orijinaldır. Bilirsiniz ki, bu gün istedadlı gənclərə geniş meydan verilmişdir. Onlar professional rejissorlarla işləməlidirlər ki, obrazları xırda detallarına qədər aça bilsinlər. Bu zaman keyfiyyətli tamaşalar meydana çıxar".

Səhnədə ilk addımlarını atan, hələ heç kəsin tanımadığı aktyor haqqında danışmaq çətindir, amma Mübariz müəllim bu çətinliyin öhdəsindən gəlməkdə mənə yardımçı oldu.

Günel Məmmədova 1986-cı ildə Bakı şəhərində doğulub. İncəsənət Gimnaziyasının məzunudur. Gimnaziyadan sonra Mədəniyyət və İncəsənət Universitetinə daxil olub və 2006-ci ildə oranı bitirib. Azərbaycanın xalq artisti Rafiq Əliyevin tələbəsi olan Günel elə onun məsləhəti ilə debütünü Gənc Tamaşaçılar Teatrında "Çimnaz xanım yuxudadır" tamaşasında oynayıb. İlk uğurundan sonra bir-birinin ardınca müxtəlif tamaşalarda əsas obrazları ifa edir. Dünənin teatrı ilə bu günün teatrı arasındakı fərqə Günelin özünəxas baxışı var: "Qabaqlar pafosa daha çox meyil var idisə, indi tam əksinədir. İndi təbiiliyə daha çox üstünlük verilir. Bir var kino sənəti, bir də var teatr sənəti. Əgər teatrda canlı insan qarşısında oynayırsansa, kinoda onu yalnız təsəvvür edirsən".

Günelin aktrisalığı hələ incəsənət Gimnaziyasında oxuyarkən başlayıb. Bir çox filmlərdə ("Ad gününün peşmançılığı" (Zirəddin Tağıyev), "Yalan" (Ramiz Əzizbəyli və s.) və reklam çarxlarında çəkilib. İşlədiyi teatrda isə "Tıq-tıq xanım", "Yağış yağmur", "Daldan atılan daş", "Çəkməli pişik", "Bir də etmərəm" tamaşalarında əsas rolların ifaçısıdır.

Günel bitib-tükənməyən tamaşaçı alqışını özü üçün ən qiymətli hədiyyə hesab edir. Əsl aktrisa kimi. Bütün məşqlər, əziyyətlər, yuxusuz gecələr, maddi sıxıntılar bir tamaşaçı alqışı uğrunda deyilmi? O premyera gecəsi yaşanan sevincin həyəcanını başqa nə əvəz edə bilər? Titrəyə-titrəyə səhnəyə uzanan çiçəklərin qoxusunu nə unutdura bilər ki?

Mədəniyyət.- 2008.- 20 mart.- S. 7.