Mədəniyyət və Turizm naziri Əbülfəs Qarayevin Birləşmiş Krallığa rəsmi səfəri başa çatıb

Birləşmiş Krallığın Xarici İşlər Nazirliyinin dəvəti ilə 2008-ci il 23-28 fevral tarixlərində Mədəniyyət və Turizm naziri Əbülfəs Qarayevin rəhbərliyi ilə nümayəndə heyəti həmin ölkədə ilk rəsmi səfərdə olmuşdur. Səfər çərçivəsində Ə.Qarayev Birləşmiş Krallığın Mədəniyyət, Yaradıcı Sənayelər və Turizm Nazirliyi, Britaniya Şurası, İngiltərə İrsi, Visit Britiş, Britaniya muzeyi, Viktoriya və Albert muzeyi, Dünya Səyahət Təşkilatı, Muzeylər, Kitabxanalar və Arxivlər Şurası, Akançi, Britaniya Ekspertizası, Britaniya kitabxanası, Arxeologiya İnstitutu, Britaniya Məsləhətçi Xeyriyyə Tresti və Rof Qayds Səyahət Agentliyi kimi mədəniyyət və turizm təşkilatlarının rəhbərləri ilə görüşlər keçirmişdir.

Görüşlərdə iki dövlət arasında mədəniyyət və turizm sahələrində qarşılıqlı münasibətlərin hazırkı vəziyyəti və gələcək perspektivləri barədə müzakirələr aparılmışdır.

Mədəniyyət və Turizm naziri Birləşmiş Krallığın mədəniyyət, yaradıcı sənayelər və turizm naziri xanım Marqarit Hocla keçirdiyi görüş zamanı Azərbaycanın mədəniyyət və turizm imkanları haqqında məlumat verərək, ölkəmizin Böyük Britaniya ilə bu sahələrdə əməkdaşlığının inkişaf etdirilməsinə xüsusi əhəmiyyət verdiyini, belə bir əməkdaşlığın qurulması və möhkəmləndirilməsi üçün ikitərəfli əməkdaşlıq sənədinin imzalanmasına böyük ehtiyac olduğunu qarşı tərəfin diqqətinə çatdırmışdır. Ə.Qarayev xanım Marqarit Hocu Azərbaycanın təşəbbüsü ilə 2008-ci ilin noyabrında Bakıda keçiriləcək Avropa Şurası Mədəniyyət Nazirlərinin Konfransına dəvət etmişdir.

Xanım Marqarit Hoc öz növbəsində dəvətə görə təşəkkür edərək Böyük Britaniya hökumətinin də Azərbaycanla təkcə enerji və digər iqtisadi sahələrdə deyil, həmçinin mədəniyyət və turizm sahələrində də əməkdaşlıq münaşibətlərinin qurulmasında və inkişaf etdirilməsində maraqlı olduğunu bildirmişdir. Görüşün sonunda hər iki nazir iki ölkə arasında müvafiq sahələrdə əməkdaşlığın inkişaf etdiriiməsi istiqamətində səylərini daha da artıracaqlarını və lazımi tədbirlər görəcəklərini bildirmişlər. Görüş zamanı həmçinin Britaniya muzeylərində Azərbaycan mədəniyyət nümunələri, Britaniya turizm şirkətləri və səyahət agentliklərinin Azərbaycanın turizm sahəsinə cəlb olunması, qarşılıqlı rəsmi səfərlərin intensivləşdirilməsi və s. məsələlər ətrafında fikir mübadiləsi aparılmışdır.

Səfər çərçivəsində keçirilən bütün görüşlərdə bildirilmişdir ki, Azərbaycanın Avropaya sürətli inteqrasiyası üçün Britaniya təcrübəsinin öyrənilməsi və müvafiq sahələrdə təcrübə mübadilələrinin aparılması çox vacibdir.

Bununla yanaşı, nazir Ə.Qarayev son zamanlar Böyük Britaniyanın bəzi turizm agentlikləri tərəfindən Dağlıq Qarabağa turizm səyahətlərinin təşkil olunması haqqında elanların verilməsinin yolverilməzliyini, həmin ərazinin Azərbaycan ərazisi olduğunu və ermənilər tərəfindən işğal olunaraq nəzarətsiz bir əraziyə çevrildiyini müvafiq təşkilatların diqqətinə çatdırmışdır. Müvafiq qurumların rəhbərləri bu məsələni diqqətdə saxlayacaqlarını və belə hallarda bir daha təkrarlanmaması üçün lazımi tədbirlər görəcəklərini bildirmişlər.

Görüşlərdə Britaniya turizm agentlikləri ilə Azərbaycanın turizm ölkəsi kimi təşviq olunması üçün birgə layihələrin həyata keçirilməsi istiqamətində danışıqlar aparılmışdır.

Səfər zamanı Ə.Qarayev həmçinin Azərbaycan Respublikasının Böyük Britaniyadakı səfirliyi tərəfindən Xocalı soyqırımı ilə bağlı təşkil olunmuş tədbirdə iştirak etmişdir.

Mədəniyyət.- 2008.- 5 mart.- S. 3.