Təranə

Əbülfəs Qarayevdən Britaniya şirkətlərinə xəbərdarlıq

Nazir işğal olunmuş ərazilərə səyahətlərin təşkilini yolverilməz hesab edir

Mədəniyyət və Turizm naziri Əbülfəs Qarayevin rəhbərlik etdiyi nümayəndə heyəti Böyük Britaniya Birləşmiş Krallığına ilk rəsmi səfərdə olub. Ötən həftə başa çatan səfər Birləşmiş Krallığın Xarici İşlər Nazirliyinin dəvətilə baş tutub.

Nazirliyin mətbuat xidmətinin verdiyi məlumata görə, səfər çərçivəsində Ə.Qarayev Birləşmiş Krallığın Mədəniyyət, Yaradıcı Sənayelər və Turizm Nazirliyi, Britaniya Şurası, İngiltərə İrsi, Visit Britn, Britaniya Muzeyi, Viktoriya və Albert Muzeyi, "Britiş Petroleum", Dünya Səyahət Təşkilatı, Muzeylər, Kitabxanalar və Arxivlər Şurası, "Akançi", Britaniya Ekspertizası, Britaniya kitabxanası, Arxeologiya İnstitutu, Britaniya Məsləhətçi Xeyriyyə Tresti və "Rof Qayds" Səyahət Agentliyi kimi mədəniyyət və turizm təşkilatlarının rəhbərləri ilə görüşlər keçirib. Görüşlərdə iki dövlət arasında mədəniyyət və turizm sahələrində qarşılıqlı münasibətlərin hazırkı vəziyyəti və gələcək perspektivləri barəsində müzakirələr aparılıb.

Ə.Qarayev Birləşmiş Krallığın mədəniyyət, yaradıcı Sənayelər və Turizm naziri xanım Marqarit Hocla keçirdiyi görüş zamanı Azərbaycanın mədəniyyət və turizm imkanları haqqında məlumat verərək, ölkəmizin Böyük Britaniya ilə bu sahələrdə əməkdaşlığın inkişaf etdirilməsinə xüsusi əhəmiyyət verdiyini bildirib. O, əməkdaşlığın qurulması və möhkəmləndirilməsi üçün ikitərəfli əməkdaşlıq sənədinin imzalanmasına böyük ehtiyac olduğunu diqqətə çatdırıb. M.Hocu Azərbaycanın təşəbbüsü ilə 2008-ci ilin noyabrında Bakıda keçiriləcək Avropa Şurasına üzv dövlətlərin nazirlərinin konfransına dəvət edib. Öz növbəsində M.Hoc Böyük Britaniya hökumətinin də Azərbaycanla təkcə enerji və digər iqtisadi sahələrdə deyil, həmçinin mədəniyyət və turizm sahələrində də əməkdaşlıq münasibətlərinin qurulmasında və inkişaf etdirilməsində maraqlı olduğunu vurğulayıb. Hər iki nazir iki ölkə arasında müvafıq sahələrdə əməkdaşlığın inkişaf etdirilməsi istiqamətində səylərini daha da artıracaqlarını və lazımi tədbirlər görəcəklərini bildirib. Ümumiyyətlə, səfər çərçivəsində keçirilən bütün görüşlərdə qeyd olunub ki, Azərbaycanın Avropaya sürətli inteqrasiyası üçün Britaniya təcrübəsinin öyrənilməsi və müvafiq sahələrdə təcrübə mübadilələrinin aparılması çox vacibdir.

Ə.Qarayev son zamanlar Böyük Britaniyanın bəzi turizm agentlikləri tərəfindən Dağlıq Qarabağa turizm səyahətlərinin təşkil olunması haqqında elanların verilməsinin yolverilməz olduğunu bildirib. Nazir həmin ərazinin Azərbaycan ərazisi olduğunu və ermənilər tərəfindən işğal olunaraq nəzarətsiz bir əraziyə çevrildiyini müvafiq təşkilatların diqqətinə çatdırıb. Müvafiq qurumların rəhbərləri bu məsələni diqqətdə saxlayacaqlarını və bir daha təkrarlanmaması üçün lazımi tədbirlər görəcəklərini bildiriblər.

Görüşlərdə Britaniya turizm agentlikləri ilə Azərbaycanın turizm ölkəsi kimi təşviq olunması üçün birgə layihələrin həyata keçirilməsi istiqamətində danışıqlar aparılıb.

Səfər zamanı nümayəndə heyəti ölkəmizin Böyük Britaniyadakı səfirliyi tərəfindən Xocalı soyqırımı ilə bağlı təşkil olunmuş tədbirdə də iştirak edib.

Kaspi.- 2008.- 4 mart.- S. 22.