Azərbaycanın Mədəniyyət və Tıırizm naziri Böyük Britaniyada rəsmi səfərdə olmuşdur

AzərTAc xəbər verir ki, Mədəniyyət və Turizm. naziri Əbülfəs Qarayevin rəhbərlik etdiyi nümayəndə heyəti Böyük Britaniya, Şimali İrlandiya Birləşmiş Krallığı Xarici İşlər Nazirliyinin dəvəti ilə bu il fevralın 23-28-dək həmin ölkədə ilk rəsmi səfərdə olmuşdur.

Səfər çərçivəsində Ə.Qarayev Birləşmiş Krallığın Mədəniyyət, Yaradıcı Sənayelər və Turizm Nazirliyi, Britaniya Şurası, İngiltərə irsi, Visit Britn, Britaniya Muzeyi, Viktoriya və Albert Muzeyi, Britiş Petroleum, Dünya Səyahət Təşkilatı, Muzeylər, Kitabxanalar və Arxivlər Şurası, Akançi, Britaniya Ekspertizası, Britaniya kitabxanası, Arxeologiya İnstitutu, Britaniya Məsləhətçi Xeyriyyə Tresti və Rof Qayds Səyahət Agentliyi kimi mədəniyyət və turizm təşkilatlarının rəhbərləri ilə görüşlər keçirmişdir.

Görüşlərdə iki dövlət arasında mədəniyyət və turizm sahələrində qarşılıqlı münasibətlərin hazırkı vəziyyəti və gələcək perspektivləri ilə bağlı müzakirələr aparılmışdır. Respublikamızın mədəniyyət və turizm naziri Birləşmiş Krallığın mədəniyyət, yaradıcı sənayelər və turizm naziri xanım Marqarit Hocla keçirdiyi görüş zamanı Azərbaycanın mədəniyyət və turizm imkanları haqqında məlumat verərək ölkəmizin Böyük Britaniya ilə bu sahələrdə əməkdaşlığın inkişaf etdirilməsinə xüsusi əhəmiyyət verdiyini və belə əlaqələrin qurulması və möhkəmləndirilməsi üçün ikitərəfli əməkdaşlıq sənədinin imzalanmasına ciddi ehtiyac duyulduğunu diqqətə çatdırmışdır. Ə.Qarayev xanım Marqarit Hocu Azərbaycanın təşəbbüsü ilə 2008-ci ilin noyabrında Bakıda keçiriləcək Avropa Şurası Mədəniyyət Nazirlərinin Konfransına dəvət etmişdir.

Xanım Marqarit Hoc dəvətə görə təşəkkür edərək Böyük Britaniya hökumətinin də Azərbaycan ilə təkcə enerji və digər iqtisadi sahələrdə deyil, həmçinin mədəniyyət və turizm sahələrində də əməkdaşlıq münasibətlərinin qurulmasında və inkişaf etdirilməsində maraqlı olduğunu diqqətə çatdırmışdır. Görüşün sonunda hər iki nazir ölkələrimiz arasında müvafiq sahələrdə əməkdaşlığın inkişaf etdirilməsi istiqamətində səylərini daha da artıracaqlarını və lazımi tədbirlər görəcəklərini bildirmişlər.

Görüşdə həmçinin Britaniya muzeylərində Azərbaycan mədəniyyət nümunələri, Britaniya turizm şirkətləri və səyahət agentliklərinin ölkəmizin turizm sahəsinə cəlb olunması, qarşılıqlı rəsmi səfərlərin intensivləşdirilməsi və s. məsələlər ətrafında fikir mübadiləsi aparılmışdır.

Səfər çərçivəsində keçirilən görüşlərdə bildirilmişdir ki, Azərbaycanın Avropaya sürətli inteqrasiyası üçün Britaniya təcrübəsinin öyrənilməsi və müvafiq sahələrdə təcrübə mübadilələrinin aparılması çox vacibdir. Bununla yanaşı, nazir Ə.Qarayev son zamanlar Böyük Britaniyanın bəzi turizm agentlikləri tərəfindən Dağlıq Qarabağa turizm səyahətlərinin təşkili barədə elanların verilməsinin yolverilməz olduğunu və həmin torpaqların Azərbaycan ərazisi olduğu və ermənilər tərəfindən işğal edilərək-nəzarətsiz əraziyə çevrildiyini müvafiq təşkilatların diqqətinə çatdırmışdır. Əlaqədar qurumların rəhbərləri bu məsələni diqqətdə saxlayacaqlarını və bir daha təkrarlanmaması üçün lazımi tədbirlər görəcəklərini bildirmişlər.

Görüşlərdə Böyük Britaniyanın turizm agentlikləri ilə Azərbaycanın turizm ölkəsi kimi təşviq olunması üçün birgə layihələrin həyata keçirilməsi istiqamətində danışıqlar aparılmışdır.

Səfər zamanı Ə.Qarayev, həmçinin, Azərbaycan Respublikasının Böyük Britaniyadakı səfirliyi tərəfindən Xocalı soyqırımı ilə bağlı təşkil olunmuş tədbirdə iştirak etmişdir.

Azərbaycan.- 2008. 4 mart.- S. 5.