Akifqızı Ş.

ABŞ-ın Klivlend şəhərində Azərbaycan Mədəniyyət bağı açılmışdır

Ümummilli lider Heydər Əliyevin 85 illik yubileyi münasibətilə mayın 12-də ABŞ-ın Klivlend şəhərində Azərbaycan Mədəniyyət bağının açılışı olmuşdur. Klivlend Mədəniyyət bağlarının bir hissəsi olan bu layihənin təməli hələ 2003-cü ildə qoyulmuşdu. O vaxt Prezident Heydər Əliyev bu şəhərdə olarkən beynəlxalq tolerantlıq və sülh anlayışını simvollaşdıran Mədəniyyət bağlarını bəyənmiş və burada Azərbaycanın da təmsil olunması barədə ölkəmizin ABŞ-dakı səfiri Hafiz Paşayevin təklifini dəstəkləmişdir.

Klivlendin mərkəzi küçələrinin kəsişməsində yerləşən Azərbaycan Mədəniyyət bağını ABŞ-da yaşayan həmyerlimiz, memar Xanlar Qasımovun müəllifi olduğu "Ocaq" abidəsi və mərmərdə həkk edilən "Azərbaycan - təxəyyülü alovlandırıb, ruhu isidən əbədi Odlar yurdu" sözləri bəzəyir. Səkkiz ton ağırlığında paslanmayan poladdan tökülmüş "Ocaq" abidəsinin hamarlanmış dairəvi formasında yanlardan torpaq, üstdən isə səma əks olunur. Memarın AzərTAc-a bildirdiyinə görə, bu layihə onun ən mürəkkəb işlərindən biridir. Poladın ideal simmetrik hala gətirilməsi ilə bağlı texniki çətinliklər bir tərəfə qalsın, əsrlərlə tarixi olan zəngin Azərbaycan mədəniyyətini bir abidə ilə ifadə etmək bütöv kitabı bir cümlə ilə danışmağa bənzəyirdi. "Ocaq"ın ideyası Nizaminin "Leyli və Məcnun"undan və Nəsimi fəlsəfəsindən ruhlanmışdır.

Mayın 12-si Klivlenddə "Azərbaycan günü" elan edilmişdi. Bu qərarı Klivlend şəhərinin meri Frənk Cəkson bağın rəsmi açılış mərasimində çıxış edərkən bildirmişdi. Mərasimdə iştirak edən fəxri qonaqlar arasında ABŞ Konqresində Ohayo ştatının təmsilçiləri Denis Kusiniç, Stefani Tabs Cons və ölkəmizin ABŞ-dakı səfiri Yaşar Əliyev də var idi. Azərbaycan Mədəniyyət bağının açılışında Klivlend ictimaiyyətinin nümayəndələri, məktəblilər, eləcə də burada yaşayan azərbaycanlılar iştirak edirdilər.

Səfir Yaşar Əliyev çıxışında demişdir ki, milli mənəviyyatımızda məxsusi yer tutan ocaq anlayışı ailəni bir yerə toplayan, istilik yaradan həyat və məhəbbət rəmzidir. Mən inanıram ki, Azərbaycan Mədəniyyət bağı Klivlendin sevimli parkları arasında yer tutaraq insanların sülh, qarşılıqlı anlaşma və dostluğu bayram etdikləri məkana çevriləcəkdir.
Layihəni ilk dəstəkləyənlərdən biri, konqresmen Denis Kusiniç isə vurğulamışdır ki, beynəlxalq birliyin əhəmiyyətli üzvü kimi Azərbaycan dünyada əmin-amanlığın bərqərar olmasına çalışan dövlətlərdən biridir. Bu bağ beynəlxalq sülhün rəmzi kimi Azərbaycanın gözəlliyini və şərəfini əks etdirəcəkdir. Konqresmen Kusiniç əlamətdar hadisə ilə bağlı səfir Y.Əliyevə ABŞ Konqresinin rəsmi təbrikini çatdırmışdır.

Mərasimin sonunda mer Frənk Cəkson, konqresmen Denis Kusiniç və səfir Yaşar Əliyev "Ocaq" abidəsinin açılışını bildirən lenti kəsmişlər.

Klivlenddə yaşayan soydaşımız Təranə Əsgərova təntənəli tədbir barədə təəssüratını bölüşərək demişdir: "Qərib ölkədə yaşayan azərbaycanlılar üçün bu gün əsl bayramdır. Bu bağ burada yaşayan azərbaycanlıları ocaq kimi ətrafına yığacaqdır. Bizim haradan olduğumuzu soruşanda, Azərbaycan barədə xəbərsiz olan amerikalılara uzun izahat verməli olurduq. Bundan sonra isə bu mərkəzi küçələrdən keçən hər kəs Azərbaycanın adını görəcəkdir. Bizim duyduğumuz fəxri ifadə etmək çətindir".

Klivlendin əhalisi 80-ə yaxın etnik icmanı təmsil edir. Şəhərin belə zəngin demoqrafik müxtəlifliyini göstərmək məqsədi ilə yaradılan Klivlend Mədəniyyət bağları hazırda 36 xalqın mədəni irsini simvollaşdıran bağları əhatə edir.

Azərbaycan.- 2008.- 14 may.- S. 5.