Bədəlov Ə.

Heydər Əliyev və Azərbaycanda informasiya-kommunikasiya texnologiyalarının inkişafı

Azərbaycan Respublikasının Prezidenti yanında Dövlət İdarəçilik Akademiyasında ümummilli lider Heydər Əliyevin anadan olmasının 85-ci ildönümünə həsr olunmuş “Heydər Əliyev və Azərbaycanda informasiya-komunikasiya texnologiyalarının inkişafı” mövzusunda yığıncaq keçirilmişdir.
Yığıncağı Dövlət İdarəçilik Akademiyasının rektoru, əməkdar elm xadimi, professor Seyfəddin Qəndilov açaraq tədbir iştirakçılarını salamladı, ümummilli lider Heydər Əliyevin dövlət idarəçilik irsinin öyrənilməsi istiqamətində ölkəmizdə gördüyü işlərdən, onun zəngin təcrübəsindən danışdı. Natiq qeyd etdi ki, hazırda respublikamızın hər yerində, o cümlədən Dövlət İdarəçilik Akademiyasında ulu öndərin 85 illiyi ilə əlaqədar silsilə tədbirlər keçirilir. Akademiyanın əməkdaşları bu tədbirlərdə fəal iştirak edir və qonşu Gürcüstanda keçiriləcək yubiley tədbirlərinə də qatılacaqlar. Son illərdə informatika və kommunikasiya texnologiyaları sahəsində görülmüş bir çox işlər nəticəsində ölkəmiz regionda lider dövlətə çevrilmişdir. Təməli ulu öndər tərəfindən qoyulmuş bu uğurların qazanılmasında ölkə Prezidenti İlham Əliyevin bu sahəyə xüsusi fikir verməsi diqqətə çatdırıldı.
Sonra Azərbaycan Milli Elmlər Akademiyasının İnformatika Texnologiyaları İnstitutunun direktoru, AMEA-nın müxbir üzvü, texniki elmlər doktoru, professor Rasim Əliquliyev çıxış edərək, İKT-nin inkişafı və hərtərəfli tətbiqi sahəsində Azərbaycanda bir çox nailiyyətlər əldə olunduğunu qeyd etdi. O, hazırda elektron hökumətdən tutmuş iqtisadiyyatın bütün sahələrini əhatə edən “Elektron Azərbaycan” Dövlət Proqramının həyata keçirilməsi barədə geniş məlumat verdi. DİA-nın İnformasiya Texnologiyaları Mərkəzinin müdiri, fizika-riyaziyyat elmləri doktoru, professor Azad Abbaszadə bu sahədə həyata keçirilmiş tədbirlərdən və gələcək dövlət məmurlarına informasiya texnologiyaları öyrənilməsinin vacibliyini vurğuladı.
DİA-da YAP-nın sədri Mayil Əliyev ümummilli lider Heydər Əliyevin başçılığı ilə yaradılmış bu partiyanın ölkəmizin ictimai-siyasi həyatındakı rolundan danışdı. Sonra partiyaya yeni qəbul olunmuş gənclərə üzvlük vəsiqələri təqdim olundu.
S. Qəndilov bildirdi ki, ümummilli lider Heydər Əliyevin 85 illik yubileyi ərəfəsində ulu öndərin irsinin təbliğində fərqlənmiş Dövlət İdarəçilik Akademiyasının əməkdaşlarından professor Azad Abbaszadə, dosentlər Mustafa İsgəndərzadə, Musa Quluzadə, aspiranturanın II kurs tələbəsi Cavid Bədəlov, prezident təqaüdçüsü, tələbə Ruslan Cumayev və Akademiyanın Tələbə-Elmi Cəmiyyətinin sədri İsfəndiyar Hacıyev rektorluğun fəxri fərmanı ilə təltif olunmuşlar. Sonra o, təltif olunanlara fəxri fərman və gül dəstəsi təqdim etdi.

Xalq qəzet .- 2008.- 7 may.- S. 9.