Çin Xalq Respublikasında poçt markası buraxılmışdır

AzərTAc xəbər verir ki, Azərbaycanın Pekindəki səfirliyinin təşəbbüsü ilə Çin Xalq Respublikasında xalqımızın ümummilli lideri Heydər Əliyevin 85 illik yubileyi münasibətilə poçt markası buraxılmışdır.
Poçt markasının üzərində ulu öndər Heydər Əliyevin Bakının geniş panoramı və Azərbaycanın dövlət bayrağı fonunda heykəli əks olunmuşdur.
Aprelin 30-da Azərbaycanın Pekindəki səfirliyində "poçt" markasının təqdimatı olmuşdur. Səfirlikdən bildirmişlər ki, tədbirdə Çində akkreditə olunmuş diplomatik korpusun nümayəndələri, Çin Xalq Respublikasının dövlət və hökumət üzvləri, bu ölkədə təhsil alan azərbaycanlı tələbələr, iş adamları, eləcə də kütləvi informasiya vasitələrinin təmsilçiləri iştirak etmişlər.
Poçt markası tədbirdə iştirak edən qonaqlar tərəfindən yüksək qiymətləndirilmiş və onların geniş marağına səbəb olmuşdur.
Səfir Yaşar Əliyev çıxış edərək ulu öndər Heydər Əliyevin müasir Azərbaycan dövlətinin yaranmasında, möhkəmlənməsində və inkişafında, Konstitusiyanın qəbul edilməsində, vətəndaş cəmiyyətinin formalaşmasında, milli təhlükəsizliyin təmin olunmasında və yeni iqtisadi kursun müəyyənləşməsindəki əvəzsiz xidmətlərindən danışmışdır.
Diplomat müstəqil dövlətçiliyimizin ulu öndər Heydər Əliyev tərəfindən formalaşdırılan mənəvi-ideoloji əsasının dünya azərbaycanlılarının həmrəyliyinin möhkəmləndirilməsində həlledici rol oynadığını, Azərbaycan ziyalısını son əsrlərdə ciddi düşündürən milli dirçəliş problemlərinin bütöv şəkildə ümummilli liderimizin fəaliyyəti sayəsində strateji dövlət siyasətinə, əməli siyasi müstəviyə keçdiyini və nəticədə azərbaycançılıq məfkurəsinin şüurlara hakim kəsildiyini diqqətə çatdırmışdır.
Daha sonra Rusiya Federasiyasının Çindəki səfiri S.Razov çıxış edərək Heydər Əliyevin keçmiş SSRİ-nin Nazirlər Soveti sədrinin birinci müavini və Sov.İKP MK Siyasi Bürosunun üzvü vəzifələrində işlədiyi dövrdəki misilsiz xidmətlərindən ətraflı danışmış, onun böyük nüfuza malik dünya miqyaslı siyasi xadim olduğunu vurğulamışdır.
Suriyanın Çindəki səfiri M.Xeyir əl-Vadi çıxışında Heydər Əliyev ilə şəxsən tanış olmaq şərəfinə nail olduğunu bildirmiş, ulu öndərin SSRİ Nazirlər Soveti sədrinin birinci müavini vəzifəsində çalışdığı dövrdə Suriyaya etdiyi səfərləri xatırlatmış, həmin səfərlərin SSRİ ilə Suriya arasında münasibətlərin inkişafında misilsiz rol oynadığını tədbir iştirakçılarının nəzərinə çatdırmışdır.

Azərbaycan.- 2008.- 2 may.- S. 5.