Əliyev Ə.

Parisdə ümummilli lider Heydər Əliyevin 85 illiyinə həsr olunmuş xatirə gecəsi keçirilmişdir

Mayın 18-də Senatın binasında Azərbaycanın Fransadakı səfirliyi tərəfindən ümummilli lider Heydər Əliyevin xatirəsinə həsr edilmiş gecə təşkil olunmuşdur.

Tədbirdə Fransada akkreditə olunmuş diplomatik korpusun nümayəndələri, senatorlar və deputatlar, Azərbaycan rəsmləri, ART televiziya kanalının baş direktoru, paytaxt ictimaiyyətinin nümayəndələri, Fransada yaşayan azərbaycanlılar iştirak etmişlər.
Mərasimi Azərbaycanın Fransadakı səfiri Tarik Əliyev açaraq, ulu öndərimiz Heydər Əliyevin 85 illik yubileyi münasibətilə keçirilən tədbirə toplaşmış iştirakçıları salamlamış və ölkəmizin 30 illik zəngin tarixinin Heydər Əliyevin adı ilə bağlı olduğunu qeyd etmişdir. Səfir müdrik dövlət başçısının idarəçilik istedadını, tükənməyən enerjisini və 1969-cu ildə siyasi hakimiyyətə gəldiyini, 1982-ci ildə SSRİ-nin ən nufuzlu rəhbərlərindən biri olduğunu xatırlatmış, Heydər Əliyevin 1990-cı il Yanvar hadisəsinə münasibətinin Azərbaycanda yeni siyasi eranın başlanğıcı olduğunu diqqətə çatdırmışdır.

T.Əliyev Naxçıvan Ali Məclisinin binası üzərində dövlətimizin üçrəngli bayrağını qaldırmış Heydər Əliyevin Azərbaycanın müstəqilliyi yolunda mühüm addımlar atdığını xüsusi vurğulamış, 1993-cü ildə xalqın təkidi ilə yenidən hakimiyyətə qayıtdığını bildirmiş, müdrikliyi, zəngin siyasi təcrübəsi və sarsılmaz iradəsi ilə Azərbaycanı parçalanmaqdan və vətəndaş müharibəsindən xilas etdiyini qeyd etmişdir.

Səfir beynəlxalq normalara əsaslanmış insan hüquqlarını müdafiə edən dövlətin qurulduğunu, vətəndaş cəmiyyətinin bərqərar edildiyini, yeni iqtisadi inkişafın bünövrəsinin qoyulduğunu bildirmiş və Heydər Əliyevin bu sahədəki nailiyyətlərini yüksək qiymətləndirmişdir. 1994-cü ildə "Əsrin müqaviləsi" ilə Heydər Əliyev neft strategiyasının təməlini qoymuş və Azərbaycan xalqı bunun sayəsində öz təbii sərvətlərinin əsl sahibinə çevrilmişdir. Azərbaycanın iqtisadi inkişaf dinamikasının hazırda dünyada analoqu olmadığını söyləyən səfir, ümummilli liderimizin adını daşıyan Bakı-Tbilisi-Ceyhan kəmərinin Heydər Əliyev ideyalarının təntənəsinə çevrildiyini və Heydər Əliyevin adının bu gün Azərbaycanda dövlət rəmzinə çevrildiyini, dövlətimizin regionda və dünyada böyük nüfuza malik olduğunu vurğulamışdır.

Tarik Əliyev Heydər Əliyevin 85 illik yubileyinin nəinki Azərbaycanda, o cümlədən ölkəmizin hüdudlarından kənarda da təntənə ilə qeyd edildiyini bildirmişdir.

Senatın Fransa-Qafqaz dostluq qrupunun üzvü xanım Katrin Prokakasia Azərbaycan Prezidenti Heydər Əliyevi general Şarl de Qolla müqayisə etmişdir. Bildirmişdir ki, 1958-ci ildə Ş.Qoll yüksək vəzifəyə gəlmək barədə razılığını vermişdir. Heydər Əliyev də Azərbaycanın çətin vaxtında yenidən hakimiyyətə gəlmişdir. Heydər Əliyev əsl vətənpərvər dövlət başçısı olmuşdur. O, Azərbaycanı sosial-iqtisadi təhlükədən xilas etmişdir. Heydər Əliyev çətinliklərdən ehtiyat etməmiş və özünün dünya miqyaslı dövlət xadimi olduğunu bir daha sübut etmişdir. Heydər Əliyev ilk növbədə sülhün bərqərar olmasına çalışmış, Azərbaycanın beynəlxalq əlaqələrini möhkəmləndirmişdir.

Milli Assambleyanın Fransa-Azərbaycan dostluq qrupunun sədri Jan-Lui Dümon ümummilli öndərimizin Prezident seçildikdən sonra ilk xarici səfərə Fransaya gəldiyini xatırlatmış, Heydər Əliyevin Fransaya səfərlərinin iki ölkə arasında hərtərəfli əlaqələrin yaranmasında və inkişaf etməsində mühüm amil olduğunu bildirmiş, məhz onun sayəsində Azərbaycanda demokratik dövlət qurulduğunu, Fransa ilə Azərbaycan arasında əlaqələrin qarşılıqlı hörmət əsasında qurulduğunu diqqətə çəkmişdir.

Parisdəki "Azərbaycan evi"nin sədri Səid İsmayılov Heydər Əliyevin əvəzsiz siyasi xadim olması, Fransa-Azərbaycan əməkdaşlığının yaranmasında böyük rol oynaması, ən çox Fransaya səfər etməsi, Fransa rəsmiləri, xüsusilə, Senatın sədri Kristian Ponsöle ilə səmimi dostluq münasibətləri qurması barədə danışmış, Prezident İlham Əliyevin ümummilli liderimizin siyasi xəttini uğurla davam etdirdiyini söyləmişdir.

Fransanın Azərbaycandakı keçmiş səfiri Jan Perrən Heydər Əliyevlə bağlı xatirələrindən söhbət açmışdır.

Azərbaycanın gənc musiqiçiləri Nərgiz Əliyarova, Lalə Mürşüdlü və Cavad Tağızadənin ifasında Üzeyir Hacıbəyovun, Qara Qarayevin, Arif Məlikovun, Firəngiz Əlizadənin, Fikrət Əmirovun, Aqşin Əlizadənin və Vaqif Mustafazadənin əsərləri ilə yanaşı, F.Şopenin əsərləri səslənmişdir. Musiqiçilərimizin çıxışı alqışlarla qarşılanmışdır.
Gecənin sonunda səfirlik tərəfindən ziyafət verilmişdir.

Azərbaycan.- 2008.- 20 may.- S. 6.