Hacızadə A.

Elmira Axundova: Azərbaycan nümayəndə heyətinin Moskvaya səfəri çox uğurlu və səmərəli oldu

Azərbaycan Prezidentinin İcra Aparatının rəhbəri Ramiz Mehdiyev başda olmaqla nüfuzlu nümayəndə heyəti mayın 14-dən 16-dək Moskvada səfərdə olmuş, görkəmli dövlət xadimi və siyasi xadim, Azərbaycan xalqının ümummilli lideri Heydər Əliyevin 85 illik yubileyinə həsr olunmuş təntənəli gecədə iştirak etmişdir.
Nümayəndə heyətinin üzvü, Milli Məclisin deputatı Elmira Axundova Rusiya paytaxtına səfər haqqında təəssüratlarını bölüşərək demişdir: "Moskvada belə bir mühüm tədbirdə iştirak etmək mənim üçün böyük şərəf idi. Biz bu böyük şəxsiyyətin anadan olmasının 85 illiyinin İttifaqlar Evinin Sütunlu salonunda qeyd ediləcəyini bilirdik, lakin bu hadisənin miqyasını aydın təsəvvür etmirdik. Sütunlu salonda təşkil edilmiş fotosərgini, Heydər Əliyev haqqında fotoalbomların, jurnalların, kitabların çoxsaylı qonaqlara hədiyyə edildiyini görəndə heyran olduq. Heydər Əliyevin xatirəsinə ehtiramını bildirməyə gəlmiş insanların sayı və iştirakçıların səviyyəsi də qəlbimizdə qürur hissi oyadırdı - orada gənclər, Moskva hökumətinin, Moskva İcra Hakimiyyətinin, diplomatik missiyaların, ziyalıların, Azərbaycan diasporunun nümayəndələri vardı. Təsəvvür edin ki, 1200 nəfərlik salonda bir dənə də boş yer yox idi. Azərbaycan Prezidentinin İcra Aparatının rəhbəri Ramiz Mehdiyevin sözlərinə görə, bu tədbir bizim gözlədiyimizdən də yüksək səviyyədə təşkil edilmişdi. Gecədə çıxış edənlər arasında Rusiya Prezidenti Administrasiyasının rəhbəri Sergey Narışkin, Rusiya Prezidentinin köməkçisi Cahan Pollıyeva, Moskva merinin birinci müavini və başqaları vardı".
Elmira Axundova daha sonra demişdir: "Hazırda mən Heydər Əliyev haqqında üçüncü, onun həyatının Moskva dövrünü əks etdirən kitab üzərində işləyirəm. Mən bilirəm ki, o, sovet dövründə elmin inkişafında çox böyük rol oynamışdır. Tretyakov Qalereyasının binasının yenidən qurulması üçün bilavasitə onun göstərişi və tapşırığı əsasında vəsait buraxılmışdı. O, Gennadi Xazanovun teatrının yaradılmasına kömək edənlərdən biri olmuş, daha neçə-neçə faydalı işlər görmüşdür. Demək istəyirəm ki, gecədə çıxış edənlər təsadüfi adamlar deyildi, onlar həyatda ucalmalarına görə Heydər Əliyevə borclu insanlar idi.
Konsert də çox maraqlı düşünülmüşdü. Orada da təsadüfi adamlar deyil, Heydər Əliyevi şəxsən tanıyan adamlar çıxış etdi, keçmiş Sovet İttifaqının ən məşhur mədəniyyət xadimləri - Rusiyadan, Gürcüstandan, Ukraynadan, Özbəkistandan olan artistlər Heydər Əliyevə məhəbbətlərini bildirdilər. Bütün bunlar Heydər Əliyevin hərtərəfli nadir şəxsiyyət olmasına dəlalət edir. O, sovet səhiyyəsinə, elmə, mədəniyyət xadimlərinə çox kömək etmişdir... Tədbirin təşkilatçıları bütün bunları başa düşərək, xatirə gecəsinin rəsmiyyət naminə keçirilən ənənəvi mərasim deyil, çox səmimi bir tədbir olmasına çalışmış və bu işin öhdəsindən gəlmişlər. Açığını deyim ki, bu tədbirdən sonra səfirliyimizin işçilərinə hörmətim artdı, onlara ürəkdən təşəkkür edirəm".
Elmira Axundova Azərbaycan nümayəndə heyətinin Moskvada hər hansı görüşlər keçirib-keçirmədiyi barədə sualı şərh edərək demişdir ki, nümayəndə heyətinin səfəri çox səmərəli və faydalı olmuşdur. Onun sözlərinə görə, bütün bunlar, ilk növbədə, ona görə mümkün olmuşdur ki, Prezidentin İcra Aparatının rəhbəri Ramiz Mehdiyevi Kremldə çox yaxşı qəbul etdilər, çox maraqlı və faydalı görüşlər keçirildi, müxtəlif səviyyələrdə Azərbaycan-Rusiya əməkdaşlığının perspektivləri barədə ətraflı fikir mübadiləsi oldu.
Bu, çox vacib idi, çünki Rusiyada rəhbərlik dəyişmişdir, buna görə də ölkənin yeni rəhbərliyi ilə münasibətləri tənzimləmək, Vladimir Putinin və İlham Əliyevin dövründə həyata keçirilən xəttə sadiqliyi təsdiq etmək çox vacib idi. Mən bilirəm ki, Rusiya tərəfi siyasi xəttin varisliyinə sadiq qalacağını bildirmişdir. Üstəlik, Rusiya Prezidenti Dmitri Medvedev Azərbaycan Prezidentinin İcra Aparatının rəhbəri Ramiz Mehdiyevin Rusiyanın Dostluq ordeni ilə təltif edilməsi barədə fərman imzalamışdır. Onu da qeyd edim ki, bu, Rusiyanın yeni Prezidentinin təltif haqqında ilk fərmanıdır və təltif edilən şəxs Ramiz Mehdiyev oldu.
E.Axundova Azərbaycan nümayəndə heyətinin Rusiyanın iki ən böyük agentliyində - İTAR-TASS və "RİA Novosti" agentliklərində də olduğunu bildirərək demişdir ki, İTAR-TASS agentliyi ulu öndər Heydər Əliyevin 85 illiyi münasibətilə yubiley tədbirinin hazırlanmasında böyük rol oynamış, bu münasibətlə nəfis tərtibatlı fotoalbom və dəvətnamələr çap etmişdir.

Azərbaycan.- 2008.- 17 may.- S. 3.