Hacızadə A.

Ramiz Mehdiyev: Heydər Əliyevə ən yaxşı abidə müstəqil və özünü təmin edə bilən Azərbaycandır

Mayın 14-də Moskvada, İttifaqlar evinin Sütunlu salonunda görkəmli dövlət xadimi, Azərbaycan xalqının ümummilli lideri Heydər Əliyevin anadan olmasının 85 illiyinə həsr edilmiş təntənəli gecə keçirilmişdir.
Gecə Rusiya Federasiyası hökuməti, Moskva meriyası, Heydər Əliyev Fondu, İTAR-TASS agentliyi və Azərbaycanın RF-dəki səfirliyi tərəfindən təşkil olunmuşdu. Tədbirdə Azərbaycan Prezidentinin İcra Aparatının rəhbəri Ramiz Mehdiyev, Rusiya Prezidenti Administrasiyasının rəhbəri Sergey Narışkin, RF Prezidentinin köməkçisi Cahan Pollıyeva, Moskva merinin birinci müavini Lyudmila Şvetsova, Rusiya xarici işlər nazirinin birinci müavini Andrey Denisov, İTAR-TASS-ın baş direktoru Vitali İqnatenko, Dövlətlərarası Aviasiya Komitəsinin sədri Tatyana Anodina, Rusiya Elmlər Akademiyasının vitse-prezidenti Nikolay Laverov, Tretyakov Qalereyasının baş direktoru Valentin Rodionov, Azərbaycanın Rusiyadakı səfiri Polad Bülbüloğlu, Rusiya ictimaiyyətinin və Moskvada diplomatik missiyaların nümayəndələri, Azərbaycan nümayəndə heyətinin üzvləri iştirak edirdilər. Moskva merinin birinci müavini Lyudmila Şvetsova təntənəli gecəni açaraq Azərbaycan xalqının ümummilli lideri Heydər Əliyevin parlaq həyat yolu və çoxşaxəli fəaliyyətindən danışmışdır. O vurğulamışdır ki, Heydər Əliyevin şah əsəri müasir müstəqil Azərbaycan və onun dövlətçiliyidir. L.Şvetsova demişdir: "O, dünyada ən müdrik siyasətçilərdən biridir və Rusiya onun bu ölkə üçün etdiyi yaxşılıqları yüksək qiymətləndirir".
RF Prezidenti Administrasiyasının rəhbəri Sergey Narışkin çıxışında vurğulamışdır ki, bu tədbirə toplaşan insanların hamısı bizim haqlı olaraq görkəmli dövlət xadimi, müdrik vətəndaş və siyasi xadim hesab etdiyimiz və bu gün də belə düşündüyümüz böyük insana - Heydər Əliyevə ehtiramımızı bildirməyə gəlmişdir. Onun xatirəsi həm Rusiyada, həm Azərbaycanda, həm də başqa ölkələrdə ehtiramla yad edilir. S.Narışkin demişdir: "Heydər Əliyev onilliklər boyu yüksək dövlət vəzifələri tutmuşdur. Həm Rusiya, həm də Azərbaycan iqtisadi və sosial sahələrdəki bir çox uğurlarına görə ona borcludur". O bildirmişdir ki, müasir Azərbaycanın dövlətçiliyin təşəkkülü və möhkəmlənməsində, əsaslı iqtisadi və sosial islahatlar keçirilməsində qazandığı uğurlar çox cəhətdən Heydər Əliyevin xidmətidir. Rusiya Prezidenti Administrasiyasının rəhbəri xüsusi vurğulamışdır ki, Heydər Əliyevin rəhbərliyi altında respublikada davamlı inkişafın və Azərbaycanın beynəlxalq nüfuzunun artmasının möhkəm təməli qoyulmuşdur.
Sergey Narışkin Azərbaycan və rus xalqları arasında dostluğun və mehriban qonşuluğun möhkəmlənməsinə Heydər Əliyevin çox böyük şəxsi töhfə verdiyini də xatırlatmışdır. O demişdir: "Rusiya ilə Azərbaycan arasında strateji tərəfdaşlıq münasibətlərinin formalaşması onun adı ilə bağlıdır. Məhz Azərbaycan Respublikası liderinin qətiyyətli və prinsipial mövqeyi bizim soydaşlarımıza ana dilinin və milli mədəniyyətin inkişafı üçün yeni imkanlar yaratdı. Buna görə də qanunauyğun haldır ki, Heydər Əliyev Rusiya-Azərbaycan münasibətlərinin möhkəmlənməsinə müstəsna töhfələrinə görə Rusiyanın yüksək dövlət mükafatına - Müqəddəs Apostol Andrey Pervozvannı ordeninə layiq görülmüşdür".
Sergey Narışkin xüsusi olaraq vurğulamışdır ki, Heydər Əliyeviç Əliyevin işini hazırda onun oğlu - Azərbaycan Prezidenti İlham Əliyev ləyaqətlə davam etdirir. Çox vacib məqam ondan ibarətdir ki, İlham Əliyev də iki ölkənin xalqları arasında tərəfdaşlıq və dostluq münasibətlərinin qətiyyətli tərəfdarıdır. Rusiya Prezidenti Administrasiyasının rəhbəri demişdir: "Heydər Əliyev hələ 1990-cı illərin ortalarında vurğulayırdı ki, Azərbaycan və Rusiyanın fəal əməkdaşlığa və dostluq münasibətlərinə ehtiyacı var. Mən şadam ki, biz birgə səylərimiz hesabına Heydər Əliyevin bu vəsiyyətini yerinə yetirə bilirik. Son illərdə bizim əlaqələr getdikcə möhkəmlənir və daha məzmunlu olur. Ölkələrimizin rəhbərləri daim konstruktiv siyasi dialoq aparırlar, əmtəə dövriyyəsi durmadan artır, humanitar və mədəni əlaqələr genişlənir. Lakin ən başlıcası odur ki, biz qiymətli dostluq və qarşılıqlı etimad ənənələrini həqiqətən yüksək dəyərləndiririk. Rusiya ilə Azərbaycanın tərəfdaşlığı, xalqlarımızın bir-birinə daha da yaxınlaşması, regional və beynəlxalq məsələlərdə konstruktiv qarşılıqlı əlaqə bizim milli mənafelərimizə tam uyğundur. Rusiyaya, xalqımıza xoş münasibətinə görə biz Heydər Əliyevə minnətdarıq".
Sergey Narışkin daha sonra bildirmişdir ki, RF Prezidenti Dimitri Medvedev Rusiya ilə Azərbaycan arasında dostluq və mehriban qonşuluq münasibətlərinin möhkəmlənməsinə və inkişafına böyük töhfələrinə görə Azərbaycan Prezidenti İcra Aparatının rəhbəri Ramiz Mehdiyevin Dostluq ordeni ilə təltif edilməsi haqqında fərman imzalamışdır.
Azərbaycan Prezidenti İcra Aparatının rəhbəri akademik Ramiz Mehdiyev gecədə çıxış edərək ulu öndər Heydər Əliyevin xatirəsinə dərin ehtiramlarına görə tədbirin təşkilatçılarına təşəkkürünü bildirmişdir. O, gecəyə toplaşanlara Azərbaycan Prezidenti İlham Əliyevin salamlarını, tədbirin təşkilatçılarına, o cümlədən İTAR-TASS agentliyinin rəhbərliyinə bu təşəbbüsə görə onun təşəkkürünü çatdırmışdır.
Ramiz Mehdiyev çıxışında ulu öndər Heydər Əliyevin və Azərbaycanın bir-birilə sıx bağlı olan həyatının əsas mərhələləri və taleyüklü hadisələri barədə məlumat verdi. O, öz çıxışında Azərbaycan xalqının ümummilli liderinin fenomenal şəxsiyyətinə və titanik fəaliyyətinə fəlsəfi-analitik xarakteristikasını vermiş, Heydər Əliyevin bioqrafiyasının əsas məqamlarından, onun təkcə Azərbaycanın və keçmiş SSRİ-nin tarixində deyil, dünya tarixində möhtəşəm rolundan ətraflı söhbət açmışdır. R.Mehdiyev vurğulamışdır ki, Heydər Əliyev bütöv bir epoxa, böyük şəxsiyyət, suveren, demokratik Azərbaycanın memarı və qurucusudur. O, gələcək nəsillərə müstəqil, özünü təmin edən bir dövlət miras qoymuşdur. Azərbaycan xalqının ümummilli liderinin adı Corc Vaşinqton, Mustafa Kamal Atatürk, Konrad Adenauer, Vladimir Putin kimi görkəmli şəxsiyyətlərlə yanaşı dünya tarixinə qızıl hərflərlə yazılmışdır. R.Mehdiyev demişdir: "Dövləti qoruyub saxlamaq və gücləndirmək, xalqı fəlakətlərdən xilas etmək və daim dəyişməkdə olan qlobal proseslər şəraitində onun yaşamaq hüququnu sübut etmək yalnız Heydər Əliyev kimi özlərini vətənə xidmətə həsr etmiş insanların hünəridir. O, 1990-cı il yanvarın 20-də Bakıda baş vermiş qanlı hadisələrlə əlaqədar Heydər Əliyevin öz vətəndaş mövqeyini cəsarətlə ifadə etməsi, Azərbaycan paytaxtına qoşun yeridilməsinə, günahsız, silahsız insanların qətlə yetirilməsinə, mərkəzi hakimiyyət orqanlarının insanlığa zidd siyasətinə etiraz əlaməti olaraq Sov.İKP sıralarını tərk etməsi, xalqın çağırışı ilə ulu öndərin vətənə qayıtması, bununla da ölkəmizin səriştəsiz siyasətçilərdən və parçalanmaq təhlükəsindən xilas olması barədə ətraflı bəhs etmişdir.
Azərbaycan Prezidentinin İcra Aparatının rəhbəri bildirmişdir ki, Heydər Əliyev qısa müddətdə sabit Azərbaycan dövləti formalaşdırmağa nail olmuş, onun xarici siyasət prioritetlərini müəyyən etmiş, Azərbaycanın qüdrətli və sarsılmaz, hazırda dünya birliyində layiqli yerini tutmuş, böyük nüfuza malik olan, bərabərhüquqlu və etibarlı tərəfdaş kimi qəbul edilən dövlətə çevrilməsinin təməlini qoymuşdur. R.Mehdiyev demişdir: "Biz yalnız Heydər Əliyevin sayəsində dövlətçiliyimizi qoruyub saxlamağa və bütün gözlənilməz hadisələrdən uğurla ötüşməyə nail olduq, yetkinlik imtahanından uğurla çıxdığımızı sübut etdik. Heydər Əliyev Azərbaycan dövlətçiliyinin qurucusudur, müstəqil, suveren Azərbaycan isə onun abidəsidir". R.Mehdiyev müasir Azərbaycan və onun uğurları barədə ətraflı söhbət açaraq vurğulamışdır ki, Azərbaycanın nüfuzunun və beynəlxalq imicinin yüksəldilməsinə yönəlmiş dövlətçiliyin möhkəmləndirilməsi siyasəti Azərbaycanın indiki Prezidenti İlham Əliyev tərəfindən uğurla davam etdirilir və reallaşdırılır.
R.Mehdiyev daha sonra demişdir: "Son dörd ildə İlham Əliyev Azərbaycanı iqtisadi cəhətdən özünü təsdiqləmiş ölkədən milli mənafelər və geosiyasi xüsusiyyətlər nəzərə alınmaqla demokratik baxımdan özünü təsdiqləmiş dövlətə çevirmişdir. İlham Əliyev Azərbaycanın Cənubi Qafqazda liderliyini qoruyub saxlamaqla yanaşı, Rusiya ilə strateji tərəfdaşlığın genişləndirilməsinə xüsusi əhəmiyyət verir. Rusiyaya münasibətdə biz bütün sahələrdə əlaqələrin daha da dərinləşdirilməsi, genişləndirilməsi və inkişaf etdirilməsinin zəruri olması mövqeyindən çıxış edirik. Xalqlarımız çoxəsrlik dostluq və mehriban qonşuluq ənənələrini yüksək qiymətləndirirlər. Heydər Əliyev Rusiya ilə münasibətlərə həmişə xüsusi əhəmiyyət verirdi və bu münasibətləri strateji tərəfdaşlıq səviyyəsinə qaldırmışdı, bu isə Heydər Əliyev ilə Vladimir Putin arasında səmimi münasibətlər sayəsində mümkün olmuşdu".
Ramiz Mehdiyev çıxışının sonunda vurğulamışdır: "İndi Azərbaycan Cənubi Qafqazda sabitlik və tərəqqi adasıdır, o, günbəgün dəyişir və özünü getdikcə inamlı hiss edir. Lakin biz bu böyük insanı daim xatırlayacağıq, Azərbaycanda bu tərəqqi məhz onun dövlət xadimi kimi müdrikliyi və qətiyyəti sayəsində əldə edilmişdir. O, qeyri-adi qabiliyyətlərə və istedadlara malik olan fenomenal insan, tarixi özünə tabe etmiş şəxsiyyət kimi daim qəlbimizdə yaşayacaqdır".
Sonra çıxış edən İTAR-TASS agentliyinin baş direktoru Vitali İqnatenko, Rusiya EA-nın vitse-prezidenti Nikolay Laverov, Tretyakov Qalereyasının baş direktoru Valentin Rodionov, Rusiyanın xalq artisti Gennadi Xazanov müasir tarixin ən böyük şəxsiyyətlərindən biri adlandırdıqları Heydər Əliyevlə görüşləri haqqında səmimi xatirələrini bölüşdülər.
Azərbaycanın Rusiyadakı səfiri Polad Bülbüloğlu təntənəli gecənin bütün təşkilatçılarına təşəkkür edərək bildirmişdir ki, zəmanəmizin böyük dövlət xadimi və siyasi xadim Heydər Əliyev həm azərbaycanlılar, həm də rusiyalılar üçün eyni dərəcədə əzizdir. Heydər Əliyev böyük siyasətçi və öz xalqının ulu öndəri kimi müasir tarixdə əbədi qalacaqdır.
Rəsmi hissədən sonra Rusiyanın və Azərbaycanın tanınmış artistlərinin iştirakı ilə konsert olmuşdur. İosif Kobzon, Lev Leşşenko, Zurab Sotkilava, Elçin Əzizov, Rusiyanın və Azərbaycanın rəqs ansamblları, "Relikt" üçlüyü, Özbəkistanın "Yalla" ansamblı, Pyatnitski adına xor, Sankt-Peterburqun "Terem-kvartet" kollektivi və başqaları Heydər Əliyevin xatirəsinə ithaf etdikləri musiqi nömrələri ilə çıxış etmişlər. Konsertdə çıxış edən artistlər də ulu öndər Heydər Əliyevin mədəniyyət və incəsənət xadimlərinə ata kimi qayğıkeş münasibətini xatırlayaraq bildirmişlər ki, o, həmişə sənət adamlarının dostu və dayağı olmuşdur.
İttifaqlar evinin Sütunlu salonunun foyesində Heydər Əliyevə həsr olunmuş fotosərgi təşkil edilmişdi. Təntənəli gecənin iştirakçılarına İTAR-TASS agentliyi və Heydər Əliyev Fondu tərəfindən hazırlanmış "Heydər Əliyev: Qəlbimin bir hissəsi Rusiyadadır..." fotoalbomu, Azərbaycan xalqının ümummilli lideri haqqında maraqlı materiallar dərc edilmiş "Baku" və "Exo planetı" jurnalları paylanmışdır.

Azərbaycan.- 2008.- 16 may.- S. 3