İlyasoğlu R.

"Vətən oğlu"

Lətif Kərimov adına Azərbaycan Xalçası və Xalq Tətbiqi Sənəti Dövlət muzeyində ümummilli lider Heydər Əliyevin 85 illiyinə həsr edilmiş "Vətən oğlu" adlı tədbir keçirildi. Tədbirdə Respublika Gənc Turistlər və Diyarşünaslıq Mərkəzinin əməkdaşları, H.Aslanov adına Mərkəzi Zabitlər Evinin bir qrup şəxsi heyəti, Nərimanov rayon 36 və 1 saylı məktəbin şagirdləri, muzey işçiləri, kütləvi informasiya vasitələri nümayəndələri, şair və yazıçılar iştirak edirdilər.

Azərbaycan Xalçası və Xalq Tətbiqi Sənəti Dövlət muzeyinin kütləvi işlər şöbəsinin müdiri Aygün Abbasova vurğuladı ki, artıq Şuşanın işğalından 16 il keçir. Qarabağın incisi sayılan Şuşanın erməni işğalçıları tərəfindən zəbt edildiyi gündür. Ümummilli lider Heydər Əliyev kursunun layiqli davamçısı cənab Prezident İlham Əliyevin bugünkü fəaliyyəti qələbəyə əminlik verir. Bu tədbirin keçirilməsində məqsəd böyüməkdə olan gənc nəslin təlim-tərbiyəsində və formalaşmasında vətənpərvərlik hisslərini daha da gücləndirməkdir. Gələcəyimiz sayılan uşaqlara aşılamaq lazımdır ki, Azərbaycan xalqı tarix boyu çox dahi şəxsiyyətlər yetişdirib. Belə şəxsiyyətlərdən biri də Heydər Əliyevdir. Heydər Əliyev şəxsiyyətinin səciyyəvi cəhətlərindən biri də onun elm və mədəniyyətimizə geniş ürəklə qayğı göstərməsi idi. Onun səpdiyi sülh toxumları Azərbaycan xalqının qəlbində bitərək yüksək vətənpərvərlik hissiyyatı oyadır.

Respublika Gənc Turistlər və Diyarşünaslıq Mərkəzinin direktoru Alik Məmmədov, M.S.Ordubadi adına Xatirə Muzeyinin direktoru Lalə Abaszadə, Respublika Gənc Turistlər və Diyarşünaslıq Mərkəzinin dərnək rəhbəri, eyni zamanda bu tədbirin təşkilatçısı Aygün Zamanlı və bu sətirlərin müəllifi çıxış edərək qeyd etdilər ki, xalqa arxalanmaq, dəstək olmaq və etimadına güvənmək ümummilli liderimizin siyasətinin başlıca cəhəti olmuşdur. Heydər Əliyev hər zaman xalqla bir olub.

Azərbaycan xalqı 1993-cü ilin böhranlı dövründə, vətəndaş müharibəsi təhlükəsi ilə qarşı-qarşıya durduğu vaxtda üzünü dahi rəhbərə tutdu və onun müdrikliyinə inandı. Ulu öndər xalqın etimadını şərəflə doğrultdu, Azərbaycanı xaosdan, parçalanmaq təhlükəsindən qorudu. Nərimanov rayon 36 saylı məktəbin şagirdləri dahi şəxsiyyətə həsr olunmuş görkəmli şairlərimizin şeirlərini söylədilər. Onlar eyni zamanda dünyanın tanınmış dövlət xadimlərinin Heydər Əliyev şəxsiyyətinə dediyi müdrik sözləri söyləməklə tədbir iştirakçılarında xoş ovqat yaratdılar.

Respublika.- 2008.- 10 may.- S. 21.