Qurbanqızı Z.

"Heydər Əliyev və İçərişəhər"

Ulu öndər Heydər Əliyevin Azərbaycana rəhbərlik etdiyi dövr ümumilikdə respublikamızın, eləcə də mədəniyyətimizin intibah dövrü kimi dəyərləndirilir. "Hər bir xalq öz mədəniyyətinə görə tanınır" - deyən ümummilli lider bu sahəyə xüsusi diqqət yetirirdi. Tarixi abidələrimizin qorunub saxlanılması, onların gələcək nəsillərə çatdırılması ulu öndəri daim düşündürən, narahat edən məsələlərdən biri idi. "İçərişəhər"ə daha çox qayğı ilə yanaşan əbədi liderimiz deyirdi: "Azərbaycan xalqının milli sərvəti olan İçərişəhər tarix memarlıq qoruğunun qorunub saxlanılması, geniş təbliğ edilməsi və gələcək nəşillərə çatdırılması Azərbaycan dövlətinin, hər bir Azərbaycan vətəndaşının müqəddəs borcudur".

Azərbaycan Respublikası Prezidentinin "Bakı şəhərində İçərişəhər Tarix Memarlıq Qoruğunun mühafizəsi və bərpası ilə bağlı bəzi tədbirlər haqqında" 17 fevral 2003-cü il tarixli sərəncamında 2000-ci il dekabrın 2-də YUNESKO-nun "Dünya İrs Siyahısı"na daxil edilmiş İçərişəhərin təkcə Azərbaycanın deyil, bütövlükdə dünya şəhərsalma sənətinin nadir nümunəsi olduğu göstərilir.

Ümummilli lider Heydər Əliyevin 85 illik yubileyi münasibətilə Nazirlər Kabineti yanında İçərişəhər Dövlət Tarix Memarlıq Qoruğu idarəsi tərəfindən buraxılmış "Heydər Əliyev və İçərişəhər" adlı fotoalmanaxında ulu öndərin respublikaya rəhbərliyinin bütün dövrlərində bu kompleksdə keçirdiyi görüşlər, onun mədəniyyətimizlə bağlı fikirləri öz əksini tapmışdır.

Muğam Teatrında keçirilən təqdimat mərasimini İçərişəhər Dövlət Tarix Memarlıq Qoruğu idarəsinin rəisi, professor Kamran İmanov açaraq ulu öndərin Azərbaycan mədəniyyətinin inkişafı sahəsində xidmətlərindən danışdı. Qeyd etdi ki, Azərbaycan tarixinin yarım əsrə qədər bir dövrü, bu dövrdəki nailiyyətlər Heydər Əliyevin adı ilə bağlıdır. Ulu öndər tariximizə, milli-mənəvi dəyərlərimizə həssaslıqla yanaşır, onun qorunub saxlanılmasını tövsiyə edirdi. Əbədi lider deyirdi: "Biz azərbaycanlıları birləşdirən milli mənsubiyyətimizdir, milli-mənəvi dəyərlərimizdir. Milli mədəniyyətimiz, ədəbiyyatımız, incəsənətimiz, musiqimiz, şeirlərimiz, mahnılarımız, folklorumuz, bir sözlə, xalqımıza mənsub olan adət-ənənələrimizdir". Ulu öndər İçərişəhəri xalqın daş yaddaşı, açıq səma altında muzey adlandırır, onun qorunması üçün fərman və sərəncamlar imzalayırdı. Biz əbədi liderimizin tövsiyələrinə bundan sonra da əməl edəcək, İçərişəhər tarixi kompleksinin qorunub saxlanması üçün əlimizdən gələni edəcəyik.

Sonra AMEA-nın müxbir üzvü, tarix elmləri doktoru, professor Məşədixanım Nemət, İçərişəhərdə yerləşən "Miniatür Kitab Muzeyi"nin yaradıcısı Zərifə Salahova, Milli Təhlükəsizlik Nazirliyinin əməkdaşı general-mayor Fərhad Vahabov və başqaları çıxış edərək ümummilli liderin xalqı qarşısında xidmətlərindən, Azərbaycan mədəniyyətinin inkişafı üçün gördüyü işlərdən danışdılar, ölkə başçısı cənab İlham Əliyevin, Heydər Əliyev Fondunun prezidenti Mehriban xanım Əliyevanın milli mədəniyyətimizin dünya miqyasında tanınması naminə gördüyü işlərə yüksək dəyər verdilər. Eyni zamanda "Heydər Əliyev və İçərişəhər" adlı fotoalmanaxının mədəniyyətimizin qorunması və onun gələcək nəsillərə çatdırılması baxımından ulu öndərin əbədi xatirəsinə dəyərli töhfə olduğunu vurğuladılar.

Respublika.- 2008.- 11 may.- S. 15.