"Mədəniyyət" kataloqunun təqdimatı keçirilmişdir

Ulu öndər Heydər Əliyevin anadan olmasının 85 illiyi respublikamızda, dünyanın bir çox ölkəsində təntənə ilə qeyd edildi. Tədbirlərdə vurğulandı ki, ümummilli lider doğma xalqının inkişafı, tərəqqisi uğrunda daim mübarizə aparmış, milli ədəbiyyat, incəsənət xadimlərinin qayğısına qalmışdır. Muzey Mərkəzində Mədəniyyət və Turizm Nazirliyinin ulu öndərin yubileyinə hədiyyə etdiyi "Mədəniyyət" kataloqunun təqdimat mərasimində də bu barədə ətraflı danışılmışdır. Tədbiri giriş sözü ilə açan respublika mədəniyyət və turizm naziri Əbülfəs Qarayev demişdir:

- Ümummilli lider Heydər Əliyevin uğurlu siyasəti bu gün də yüksək səviyyədə davam etdirilir. Xalqımız müstəqillik dövrunu yaşayır, incəsənət, mədəniyyət sahələri inkişaf edir, dünyada tanınır. Xarici turizm şirkətlərinin ölkəmizə maraqları günbəgün artır.

Milli Məclisin deputatı, AMEA-nın müxbir üzvü Nizami Cəfərov isə fikrini belə bildirdi: "Ulu öndərin siyasətinin prinsipləri - tarixi mədəniyyətimizin qorunub saxlanılması, keçmiş və müasir mədəniyyətimizin dünya miqyasında tanıtdırılması və yaradıcı şəxsiyyətlərin qiymətləndirilməsi uğurla davam etdirilir. Azərbaycan Respublikasının Prezidenti İlham Əliyevin sərəncamları qənaətimin sübutudur. Mədəniyyət və Turizm Nazirliyinin təşəbbüsü sayəsində işıq üzü görən "Mədəniyyət" toplusunu ürəkdən bəyənir və onun əziyyətini çəkənlərə təşəkkürümü bildirirəm".

Kataloqda dərc olunan materiallar Azərbaycan, rus, ingilis dillərindədir. 320 səhifəlik rəngli, illüstrasiyalarla zəngin olan nəşr müxtəlif bölmələrə, rubrikalara ayrılıb, mədəniyyətimizin dünənini, bugününü göz önündə canlandırır. Topluda teatr, kino, musiqi, rəngkarlıq, ədəbiyyat mövzusunda yazılar peşəkarlıqla təqdim olunub. Xalq şairi Fikrət Qoca, teatrşünas, professor Məryəm Əlizadə, Dövlət Film Fondunun direktoru, əməkdar incəsənət xadimi Cəmil Quliyev kataloqun nəşrinin ölkəmizin mədəniyyət siyasətinin, qazanılan uğurların təbliği baxımından əhəmiyyətini xüsusi qeyd etdilər. Onun təşkilatçılarına və yaradıcılarına minnətdarlıqlarını bildirdilər.

Mədəniyyət və turizm naziri Əbülfəs Qarayevin yekun çıxışı tədbir iştirakçıları tərəfindən alqışlarla qarşılandı:
- Biz bu toplunu ulu öndərimizin şanlı yubileyinə hədiyyə etmişik. O, özündən sonraya əbədi iz qoyub. Zaman ötüb keçəcək, lakin dahi şəxsiyyət heç vaxt unudulmayacaq, milli mədəniyyətimizin inkişafında yaşayacaq, ehtiramla xatırlanacaqdır.

"Mədəniyyət"də eyni zamanda xarici ölkələrdə təşkil edilmiş konsert və sərgilər, modelyer Fəxriyyə Xələfovanın yaradıcılığını əks etdirən fotolar, məqalələr dərc olunub. Nəfis tərtibatla işıq üzü görmüş topluda Azərbaycanın ən yaxşı fotoqraflarının çəkdikləri şəkillər də yer alıb. Mədəniyyətimizi, turizm zonalarını canlandıran fotolar kataloqu daha da maraqlı, baxımlı edib.

Azərbaycan.- 2008.- 16 may.- S. 6.