Mürvətqızı S.

 

Heydər Əliyevin 85 illiyi Teatr Xadimləri İttifaqında qeyd edilib

 

Dünən Teatr Xadimləri İttifaqında ümummilli liderin 85 illik yubileyinə həsr olunmuş "Heydər Əliyev Azərbaycan teatrı" adlı elmi-praktiki konfrans keçirilib. Tədbirin aparıcısı, qurumun sədri Azər Paşa Nemət anım mərasiminə toplaşanların diqqətinə çatdırıb ki, Heydər Əliyev hər zaman mədəniyyət təəssübkeşi olması ilə seçilib. A.P.Nemət respublikada dünyanın müxtəlif yerlərində təşkil olunan silsilə yubiley tədbirlərindən birinin məhz Teatr Xadimləri İttifaqında keçirilməsinin təsadüfi olmadığını vurğulayıb. O, bunun teatr adamları üçün mənəvi borc olduğunu dilə gətirib.
   "Heydər Əliyevin mədəniyyət incəsənətə qayğı göstərdiyi, dayaq olduğu illər həmin sahələrin intibah dövrü adlandırıla bilər". Bu fikri konfransda "Heydər Əliyev Azərbaycan teatrı" adlı məruzə ilə çıxış edən professor Məryəm Əlizadə səsləndirib. H.Əliyevi teatr sənətinə bağlı insan kimi səciyyələndirən M.Əlizadə onun hər zaman mədəniyyət incəsənət xadimlərinə xüsusi diqqət göstərdiyini bildirib.
   Sənətşünaslıq doktoru İlham Rəhimli çıxışında H.Əliyevin teatr vurğunu olduğunu dövlət rəhbəri kimi həmişə sənət adamlarının işinə təkan verdiyini, onların problemlərinin həlli üçün çalışdığını, hər kəsi diqqətdə saxladığını qeyd edib.
   Xalq artistləri Amaliya Pənahova, Ramiz Məlikov, Nurəddin Mehdixanlı H.Əliyevlə bağlı xatirələrini danışaraq, onun sənətə olan hörmətindən söz açıblar.
   Tədbir çərçivəsində Teatr Xadimləri İttifaqında H.Əliyevin müxtəlif illərdə sənət adamları ilə çəkdirdiyi fotostend nümayiş etdirilib.
   

525-ci qəzet.- 2008.- 6 may.- S. 7.