Naxçıvanda ulu öndərin 85 illik yubileyi qeyd olunub

AzərTAc xəbər verir ki, Naxçıvanda ulu öndər Heydər Əliyevin 85 illik yubileyi ilə əlaqədar tədbir keçirilmişdir.

İştirakçılar əvvəlcə xalqımızın ümummilli lideri, müstəqil Azərbaycan dövlətinin qurucusu və memarı, görkəmli dövlət xadimi Heydər Əliyevin Naxçıvan şəhərinin baş meydanındakı abidəsini ziyarət edərək, önünə gül dəstələri düzmüş, ulu öndərin xatirəsini ehtiramla yad etmişlər.

Heydər Əliyev muzeyinin yaxınlığında quraşdırılmış böyük monitorda "Ulu torpaq, ulu öndər" sənədli filmi nümayiş etdirilmiş, dahi şəxsiyyətə həsr olunmuş şeirlər səsləndirilmişdir. Tamaşaçılar müdrik siyasətçinin Azərbaycan naminə fəaliyyətinin müxtəlif dövrlərində Naxçıvan Muxtar Respublikasına səfərlərindən hazırlanmış sənədli filmə də baxmışlar.

Tədbir Gəlil Məmmədquluzadə adına Naxçıvan Dövlət Musiqili Dram Teatrında davam etdirilmişdir.

Naxçıvan MR Ali Məclisinin Sədri Vasif Talıbov ümummilli lider Heydər Əliyevin həyat və fəaliyyəti haqqında geniş məruzə etmişdir.

Sonra Adil Babayevin ümummilli lider Heydər Əliyevə həsr olunmuş "Koroğlunun Çənlibelə qayıdışı" əsərinin tamaşası göstərilmişdir.

Tamaşadan sonra Ali Məclisin sədri tlə görüşdə Naxçıvan Dövlət Musiqili Dram Teatrının direktoru, Azərbaycan Respubliksının xalq artısti Kamran Quliyev incəsənət işçilərinə, xüsusilə Naxçıvan teatrına, onun kollektivinə göstərilən yüksək dövlət qayğısına görə minnətdarlığını bildirmişdir. Qeyd etmişdir ki, ulu öndərin 85 illik yubileyi ilə əlaqədar Respublika Prezidenti İlham Əliyevin Sərəncamına əsasən teatrın 3 əməkdaşı Prezident mükafatına layiq görülmüşdür. Bu diqqətə, bu qayğıya cavab olaraq kollektivimiz uğurlarını daha da artıracaqdır.

Muxtar Respublikanın Şərur, Babək, Kəngərli, Ordubad, Culfa, Şahbuz və Sədərək rayonlarında da ümummilli liderimiz Heydər Əliyevin 85 illik yubileyi təntənə ilə qeyd olunmuş, ulu öndərin əziz xatirəsi ehtiramla yad edilmişdir.

İki sahil.- 2008.- 14 may.- S. 2.