Nəcəfov S.

 

Çexiyada Azərbaycanla bağlı tədbirlərə start verildi

 

Çexiyanın ikinci böyük şəhəri olan Brnoda ADR-in yaranmasının 90 illiyi, ümummilli lider Heydər Əliyevin anadan olmasının 85-ci ildönümü ilə bağlı sərgi-aksiyaya start verildi.

Nüfuzuna görə Çexiyanın qabaqcıl universitetlərindən sayılan Masarik Universitetində təşkil olunan foto-video sərgini universitetin Politologiya İnstitutunun direktoru professor Bretislav Donçak giriş sözü ilə açdı. O, Azərbaycanla yaradılan elmi-mədəni əlaqələrdən danışdı, Şərqin ilk demokratik dövlətinin yarandığı qədim diyarla yaxından tanışlıqdan məmnun olduğunu bildirdi. B.Donçak ADR-in 90 illiyinin Çexiya universitetində qeyd edilməsini tələbələrə o dövrün siyasi proseslərini yaxından öyrənmək üçün əlavə stimul verdiyini dedi.

Tədbirdə iştirak edən Azərbaycan Respublikasının Çexiyadakı səfiri cənab Tahir Tağızadənin çıxışı maraqla qarşılandı. Çex dilində mükəmməl çıxış edən və bununla da salona toplaşanları heyrətləndirən T.Tağızadə sərginin təşkil olunmasının mahiyyətindən danışdı. Qeyd etdi ki, ümumiyyətlə, may ayında Azərbaycan 2 böyük və önəmli hadisəni qeyd edir. Bunlardan bri ümummilli lider Heydər Əliyevin doğum günü, ikincisi isə ADR-in yaranmasının növbəti ildönümüdür. Heydər Əliyevi çexlərə təqdim edən səfir onu Çexiyanın tarixində silinməz iz qoymuş, dağılmaqda olan dövləti yenidən dünya səhnəsinə qaytaran Tomaş Qarik Masariklə müqayisə etdi. ADR-in yaranma səbəblərindən, qısa müddət ərzində fəaliyyətindən söz açan T.Tağızadə gənc dövlətin beynəlxalq əlaqələrinə də toxundu. O bildirdi ki, qısa müddət ərzində bir çox dövlətlə diplomatik əlaqələr quran Azərbaycan hökuməti azərbaycanlı tələbələrin xaricdə təhsil almasına daha çox üstünlük verib. Müasir dövrdə bu ənənənin davam etdirilməsi üçün əlverişli şəraitin olduğunu deyən səfir yaxın zamanlarda Çexiya ilə Azərbaycan arasında tələbə mübadiləsinin genişləndirilməsinin vacibliyini vurğuladı.

Sərginin təşkilatçısı Masarik Universitetinin müəllimi, həmyerlimiz professor Anar Vəliyev sərginin hər bir eksponatı, stendi haqda danışdı. O məlumat verdi ki, sərgi 4 mərhələni əhatələyir. ADR-in elan olunmasından süqutuna kimi dövr, sovet işğalı mərhələsi, "Azərbaycan bu gün və sabah" və Heydər Əliyevə həsr olunmuş stend.

Maraq üçün qeyd edək ki, sərgiyə dəvət olunan professorlar, doktorlar, magistrlər 1918-ci ildə çap edilmiş Azərbaycanın siyasi xəritəsinə daha çox önəm verdilər. Qarabağ və İrəvan quberniyalarının da Azərbaycanın tərkibində olduğunu əks etdirən xəritə peşəkarlıqla seçilmiş təbliğat vasitəsi kimi qeyd olunmalıdır. "Bakının sabahı" guşəsində gələcəkdə nəzərdə tutulan inşaat-tikinti layihələri qonaqların diqqətini cəlb etdi. Tədbir qonaqların şərəfinə verilən ziyafətlə davam etdirilidi.

Xatırladaq ki, may ayının sonuna kimi fəaliyyət göstərəcək sərgi 30 minlik tələbə kontingenti olan universitetin ən böyük zallarından birində keçirilir.

 

Kaspi.- 2008.- 16 may.- S. 8.