Tələbə Qəbulu üzrə Dövlət Komissiyasında Heydər Əliyevin büstünün açılışı olmuşdur

Aprelin 30-da Tələbə Qəbulu üzrə Dövlət Komissiyasında (TQDK) "Milli qiymətləndirmə sistemi Heydər Əliyev siyasətinin nəticəsidir" mövzusunda elmi-praktik konfrans keçirilmişdir.
Konfransdan əvvəl TQDK-nın foyesində Milli Məclisin deputatlarının, alimlərin, ali məktəb rektorlarının iştirakı ilə ümummilli lider Heydər Əliyevin büstünün açılışı olmuşdur. Büstün müəllifi tanınmış heykəltəraş, xalq rəssamı Ömər Eldarovdur. AMEA-nın müxbir üzvü Rəfiqə Əliyeva və TQDK-nın sədri Məleykə Abbaszadə büstün üzərindəki örtüyü götürmüşlər.
Sonra çıxış edən TQDK-nın sədri M.Abbaszadə Heydər Əliyevin milli təhsilin inkişafında misilsiz rolunu vurğulamışdır.Tədbirin sonunda konfrans iştirakçıları abidənin önünə güllər qoymuşlar.
"Abituriyent" jurnalının ümummilli liderin yubileyi münasibətilə buraxılan xüsusi nömrəsi tədbir iştirakçılarına təqdim olunmuşdur.
Konfransda nümayiş etdirilən sənədli filmdə görkəmli dövlət xadiminin tələbələrlə görüşləri zamanı tarixi çıxışlarından parçalar, gənclərin təhsilinin ölkənin gələcəyi üçün əhəmiyyəti ilə bağlı dəyərli fikirlər yer almışdır.
TQDK-nın sədri təhsilin, elmin və mədəniyyətin inkişafında Heydər Əliyevin rolundan danışaraq bildirmişdir ki, ulu öndərin Azərbaycanda bu sahəyə daim diqqət və qayğısı sayəsində ölkəmiz keçmiş sovet respublikaları arasında ilk olaraq tələbə qəbulunda test sisteminə keçmiş, abituriyentlərin sənədlərinin qəbulu zamanı kompyuter texnologiyalarının tətbiqi sahəsində də birincilər sırasında olmuşdur. Ümummilli lider Heydər Əliyevin sərəncamı ilə dövlət xidmətinə işə qəbul zamanı da test imtahanlarının keçirilməsi haqda qərar qəbul edilmişdir. Təhsil sistemində dünya standartlarının tətbiqinə tərəfdar olan ümummilli liderin tövsiyəsi ilə TQDK Təhsilin Qiymətləndirilməsi üzrə Beynəlxalq Assosiasiyanın (TQBA)üzvü olmuş, Amerikanın "Təhsildə test xidməti" ilə əməkdaşlıq əlaqələri qurmuşdur. TQBA keçmiş ittifaq ölkələri arasında Azərbaycanın biliklərin qiymətləndirilməsinin yeni sisteminə birinci olaraq keçməsini və bu sahədə əldə olunan təcrübəni nəzərə alaraq 33-cü konfransını ötən il Bakıda keçirmişdir.
Ulu öndər Heydər Əliyevin savadlı və hərtərəfli inkişaf etmiş gənc nəslin yetişdirilməsi ilə bağlı ideyaları hazırda Prezident İlham Əliyevin rəhbərliyi ilə uğurla həyata keçirilir.
Konfrans iştirakçıları çıxışlarında ümummilli lider Heydər Əliyevin təhsil sahəsində uzaqgörən siyasətinin müxtəlif cəhətlərindən danışmışlar.

Azərbaycan.- 2008.- 2 may.- S. 5.