Ulu öndər Heydər Əliyevin 85 illik yubileyinə həsr olunmuş elmi-praktik konfrans keçirilmişdir

Mayın 17-də Azərbaycan Turizm İnstitutunda (ATİ) ümummilli lider Heydər Əliyevin 85 illiyinə həsr olunmuş "Azərbaycan turizmi: bu gün və sabah" mövzusunda II respublika elmi-praktik konfrans keçirilmişdir.
Tədbirdə çıxış edən institutun rektoru Cəfər Cəfərov tədbirin mahiyyəti və əhəmiyyətindən danışaraq bildirmişdir ki, ümummilli lider Heydər Əliyevin rəhbərliyi ilə ölkəmizdə bütün sahələrdə olduğu kimi, turizm sektorunda da geniş islahatlar aparılmış, turizm sahəsi inkişaf yoluna qədəm qoymuşdur.
Mədəniyyət və turizm naziri Əbülfəs Qarayev vurğulamışdır ki, ölkə iqtisadiyyatında neft sektoru ilə yanaşı, qeyri-neft sektoruna da dövlət tərəfindən xüsusi diqqət göstərilməsi lazımi nəticələr verməkdədir. Son illərdə prioritet sahə kimi turizmin inkişafı üçün müxtəlif istiqamətlərdə müvafiq işlər görülmüşdür.
Nazir bildirmişdir ki, Azərbaycan dünyada bütün sahələrdə inkişaf etmiş bir ölkə kimi tanınır. Yeni islahatlar əcnəbilərin diqqətini vətənimizə yönəltmişdir.
Azərbaycan dövlətinin turizmə münasibətinin Dünya Turizm Təşkilatı tərəfindən yüksək qiymətləndirildiyini deyən nazir, təşkilatın dünyada turizmin inkişafına nəzarət məqsədilə 8 nəfərdən ibarət xüsusi qrup yaratdığını diqqətə çatdırmışdır. Mədəniyyət və turizm naziri də bu qrupda Azərbaycanı təmsil edəcəkdir.
Ə.Qarayev Azərbaycanda turizmi müasir beynəlxalq standartlara uyğunlaşdırmaq üçün müasir texnologiyalardan istifadənin və turizm informasiya mərkəzlərinin fəaliyyətinin təkmilləşdirilməsinin zəruriliyini vurğulamışdır.
Konfrans iki bölmə üzrə sessiyalarla davam etmişdir.
"Azərbaycan turizminin inkişaf xüsusiyyətləri" adlı bölmədə "Turizm tələbinə təsir edən amillər", "Azərbaycanda turizmin inkişafında informasiya texnologiyalarının rolu", "Beynəlxalq turizmin Azərbaycan iqtisadiyyatındakı rolu", "Turizm sahəsində reklam", "Azərbaycanda turizmin maliyyələşdirmə yolları", "Azərbaycan Respublikasının inkişafında turizmin yeri" və s. mövzular müzakirə edilmişdir.
"Regionların turizm ehtiyatları" adlı ikinci bölmədə isə "Qəbələdə turizmin inkişaf perspektivləri", "Abşeron yarımadasında müalicəvi turizmin təşkili", "Qusar rayonunun tarixi-mədəni abidələri turizm obyekti kimi", "Naxçıvan Muxtar Respublikasının mineral ehtiyatları və onların keyfiyyətinin təmin edilməsinin əsasları" mözularında məruzələr dinlənilmişdir.

Azərbaycan.- 2008.- 18 may.- S. 6.