Publisist Rəhilə Gülgünün “Göylər adamı” kitabının təqdimatı olmuşdur

Mayın 30-da publisist Rəhilə Gülgünün görkəmli yazıçı, alim və pedaqoq Mir Cəlal Paşayevə həsr olunmuş "Göylər adamı" (Esse-araşdırma. Yeni yozum) kitabının və M.F.Axundov adına Milli Kitabxananın hazırladığı "Mir Cəlal irsi" elektron biblioqrafik göstəricisinin təqdimat mərasimi keçirilmişdir. Tədbir iştirakçıları əvvəlcə Mir Cəlalın həyat və yaradıcılığına həsr edilmiş kitab sərgisi ilə tanış olmuşlar.
"Bəli, o, göylər adamı idi. Ucalarda dayanmaq Mir Cəlalın həyat tərzi, yaşamaq prinsipi idi. Mir Cəlal Vətənin göy üzünü, Vətənin yer üzünü, insanları, ədəbiyyatı, elm və müəllim sənətini sevirdi. O, malik olduğu mədəni, ədəbi, elmi, pedaqoji dəyərləri də özü ilə bərabər qalxdığı ucalığa yüksəldə bilmişdi". Müəllifin bu sözləri tələbənin öz müəllimi haqqında kitabı hansı ovqatla yazdığını əyani şəkildə göstərir.
Çıxış edənlər vurğulamışlar ki, kitab Azərbaycanın XX əsr nəsrinin və ədəbiyyatşünaslıq elminin dəyərli nümayəndəsi olan Mir Cəlalın yaradıcılığına tamamilə yeni və maraqlı bir baxışdır. Görkəmli ədibin yaradıcılığından örnəklərin, doğma adamların xatirələrinin və ilk dəfə dərc edilən fotoşəkillərin yer aldığı bu esse-araşdırma milli ədəbi-bədii irsin yeni nəsillərə tanıdılmasında gərəkli təşəbbüs kimi dəyərləndirilmişdir.
Kitabın redaktoru, AMEA-nın müxbir üzvü, Milli Məclisin deputatı Nizami Cəfərovun kitaba ön sözdə yazdıqları da çıxışlarda deyilən fikirlərlə səsləşir. N.Cəfərov yazır ki, imzası indiyə qədər ona tanış olmayan "Rəhilə Gülgünün "Göylər adamı" kitabını birnəfəsə oxudum. Müəllif oxunaqlı bir üslub seçərək Mir Cəlalın bir yazıçı, alim, pedaqoq və insan obrazını təqdim edir. Bu ovqatın əsasında ustad, müəllim Mir Cəlalın yaradıcılığına və şəxsiyyətinə hədsiz bir ehtiram dayanır. Ədibin parlaq istedadı ilə yaradılmış bədii və elmi əsərləri milli ədəbiyyatımızın ümumi kontekstində nəzərdən keçirildiyinə görə, kitabda Mir Cəlalın yaşadığı ictimai və ədəbi mühitin mənzərəsi dolğun əks olunmuşdur".
Mədəniyyət və turizm naziri Əbülfəs Qarayev bildirmişdir ki, nazirlik "Silinməz izlər" seriyasından ədəbiyyat, mədəniyyət və incəsənət xadimlərinin həyat və yaradıcılığından bəhs edən kitabların nəşri ilə əlaqədar yeni layihə həyata keçirir. "Göylər adamı" bu layihənin ilk nümunəsidir.
Filologiya elmləri doktoru, professor Təhsin Mütəllimov, Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, filologiya elmləri doktoru, publisist Qulu Məhərrəmli, filologiya elmləri namizədi Qənirə Əmiraslanova, yazıçı Əlibala Hacızadə, əməkdar incəsənət xadimi Vidadi Babanlı, tənqidçi Bəsti Əlibəyli mərasimdə çıxış edərək Mir Cəlalın həyatı, yaradıcılığı, şəxsiyyəti barədə fikirlərini bölüşmüş, onunla bağlı xatirələrini danışmışlar.
Sonra görkəmli ədibin əsərlərinin və onun haqqındakı yazıların yer aldığı "Mir Cəlal irsi" elektron biblioqrafik göstəricisi təqdim olunmuşdur.
Kitabı müəlliminə dərin hörmət əlaməti kimi qələmə aldığını bildirən Rəhilə Gülgün "Silinməz izlər" layihəsini həyata keçirən Mədəniyyət və Turizm Nazirliyinə, ona yaxından məsləhət vermiş filologiya elmləri doktoru, professor Nərgiz Paşayevaya, əksəriyyəti ilk dəfə bu əsərdə dərc edilən şəkillərə görə Mir Cəlalın qızı Ədibə xanım Paşayevaya minnətdarlığını bildirmişdir.
Xarici işlər nazirinin müavini, Diplomatik Akademiyanın rektoru Hafiz Paşayev atasının xatirəsinə göstərilən diqqət və ehtirama görə dövlət başçısına minnətdarlığını bildirmiş, tədbirin təşkilatçıları və iştirakçılarına təşəkkür etmişdir.
"Mir Cəlal irsi" elektron biblioqrafik göstəricisinin CD variantı Hafiz Paşayevə təqdim olunmuşdur.

Azərbaycan.- 2008.- 31 may.- S. 5.