Sevil

Balakəndə mərkəzi kitabxana inşa edilib

32 işçisi olan obyekt gün ərzində ümumilikdə 100 oxucunu qəbul etmək imkanına malikdir

Dövlət Neft Şirkəti (ARDNŞ) 2007-ci ilin əvvəllərində Balakən rayonunda əsası qoyulan mərkəzi kitabxananın inşasını başa çatdırıb.

2 mərtəbədən ibarət kitabxananın 1-ci mərtəbəsində elektron oxu zalı yerləşir. Orada quraşdırılan 10 kompüterdən oxucular istifadə edəcək, 1 kompüter isə server xidməti üçün nəzərdə tutulub. Elektron oxu zalı gün ərzində 70 nəfərə xidmət etmək imkanına malikdir. 1-ci mərtəbədə həmçinin elektron kataloq, kitab fondu və metodik təhsil şöbələri yerləşir. Vahid fondun təşkili, kitab işləmə şöbələri, iclas və oxu zalları kitabxananın 2-ci mərtəbəsində yerləşir. 36 minlik kitab fondunda ingilis və rus dillərində elmi-metodik və bədii ədəbiyyat cəmləşdirilib. Bu kitablardan 11 mini ölkə prezidentinin müvafiq sərəncamı əsasında latın qrafikası ilə çap edilən nəşrlərdir.

32 işçisi olan kitabxana gün ərzində ümumilikdə 100 oxucunu qəbul etmək imkanına malikdir. Kitabxananın giriş hissəsində və ikinci mərtəbənin foyesində ümummilli lider Heydər Əliyevə həsr olunmuş guşə yaradılıb. Kitabxana yaxın günlərdə oxucuların ixtiyarına veriləcək.

Həftə içi.- 2008.- 6 may.- S. 6.