Azərbaycan Prezidenti İlham Əliyev paytaxtın Səbail rayonunda yenidən qurulmuş bağla tanış olmuşdur

Azərbaycan Respublikasının Prezidenti İlham Əliyev mayın 27-də Bakının Mehdi Hüseyn və Lermontov küçələri arasındakı ərazidə - Nazirlər Kabineti qarşısında yerləşən və əsaslı şəkildə yenidən qurulmuş bağla tanış olmuşdur.

Bir müddət əvvəl Prezident İlham Əliyevin birbaşa tapşırığı ilə bağın əsaslı şəkildə yenidən qurulmasına başlanılmış bu işlərə yüksək səviyyəli mütəxəssislər cəlb edilmişdi. Qısa vaxt ərzində müasir tələblər səviyyəsində tamamilə yenidən qurulmuş bağ indi özünün təzə görkəmi ilə göz oxşayır və paytaxt sakinlərinin sevimli istirahət yerinə çevrilmişdir.

Bağla tanış olan dövlətimizin başçısına görülmüş işlər barədə ətraflı məlumat verildi. Burada yaradılmış şəlalələr kompleksi bir ansambl təşkil edərək bağa xüsusi yaraşıq verir. Böyük bir ərazidə yeni yaşıllıqlar zolağı salınmış, müxtəlif bəzək kolları və güllər əkilmişdir. Bağda istiyə və rütubətə davamlı xüsusi materiallardan hazırlanmış oturacaqlar qoyulmuş, müasir işıqlandırma sistemi quraşdırılmışdır. Bir sözlə, burada dincəlmək üçün çox yaxşı şərait yaradılmışdır.

Prezident İlham Əliyev bağda yenidənqurma işlərini aparan mütəxəssislərlə söhbət etdi, xüsusi istirahət guşəsi ilə də tanış oldu, isti yay günlərində bağa sərinlik gətirən hovuz və fəvvarələrə baxdı. Bağda görülmüş yenidənqurma işləri razılıq doğurdu.

* * *

Prezident İlham Əliyev yenidən qurulmuş bağın gecə mənzərəsini seyr etmək üçün həmin gün ailə üzvləri ilə birlikdə buraya ilk gəzintiyə çıxmışdır.

Bağın gecə görüntüsü paytaxtın bu guşəsinə xüsusi yaraşıq verir. Müasir işıqlandırma sistemi bağın özəlliklərinin daha qabarıq görünməsinə imkan yaradır. Bakı gecələrinin maraqlı elementlərindən birinə çevrilən bu bağ paytaxtın memarlıq ansamblında özünəməxsus yerini tutmuşdur.

Prezident İlham Əliyev və ailə üzvləri nura boyanmış bağın əsrarəngiz mənzərəsini maraqla seyr etdilər.

Xalq qəzeti.- 2008.- 28 may.- S. 3.