Kərimli G.

 

 

Dənizkənarı Milli Parkda təhlükəsiz və rahat istirahət

 

Y az-yay mövsümü istirahət ayları olduğu üçün paytaxt sakinləri arasında Dənizkənarı Milli Parka üz tutanların sayı çox olur. Bu məkanda əhalinin normal və təhlükəsiz istirahətini təşkil etmək çox önəmlidir. Bunu nəzərə alan Nazirlər Kabineti yanında Dənizkənarı Bulvar İdarəsi artıq bir müddətdir ki, təmir və yenidənqurma işlərinə start verib. Dənizkənarı Bulvar İdarəsinin rəisi Əfqan Şahmarov "Üç nöqtə"yə müsahibəsində bildirdi ki, bulvarda yenidənqurma və təmir işlərinə ilk olaraq ağacların budanması ilə başlanılıb: "Çünki elə ağaclar vardı ki, 10-30 ildir ki, budanmırdı. Ona görə də işimzə budanmadan başladıq. Həmçinin, əhalinin yüksək səviyyəli istirahətini təmin etmək məqsədi ilə parkda təmizlik tədbirləri də gücləndirilib. Çünki yüksək səviyyəli istirahətin özülü təmizlikdən qoyulur. Bunu nəzərə alaraq, hər gün səhər saatlarında xüsusi maşınlarla bulvar ərazisi təmizlənir". Bulvarda bir sıra obyektlərin sökülməsinə də münasibət bildirən rəis ərazidə məqsədəuyğun olmayan, bulvarın arxitekturasına uyğunlaşmayan tikililərin çox olduğunu bildirdi: "Görülən tədbirlər çərçivəsində onlardan artıq bəziləri sökülüb. Məsələn, "Sahil" restoranı ilə üzbəüz heyvanxana sərgisi mövcud idi. Həmin sərgidə göstərilən xidmət özünü doğrultmadığına görə söküldü. Onun yerində isə nə tikiləcəyi hələ məlum deyil və müzakirə olunmaqdadır". MİLLİ PARKDA XÜSUSİ MÜHAFİZƏ SİSTEMİ YARADILIB Bulvarda insanların istirahətini təmin etmək məqsədi ilə ərazidə kafe, yeməkxana və səyyar ticarətlə məşğul olan obyektlərin olmasına da ehtiyac var. Amma təbii ki, standartlara cavab verəcək obyektlərin olması çox önəmlidir. Təbii ki, bununla yanaşı, insanların istirahətini təmin etmək məqsədi ilə əyləncə mərkəzlərinin də olması vacibdir. Əfqan Şahmarov əhalinin istirahətini təmin etmək məqsədi ilə yeni avadanlıqların da quraşdırılacağını bildirdi. Bulvarda istirahət edən əhalinin təhlükəsizliyinin təmin edilməsi də çox önəmlidir. Bunu yalnız atraksionlarda və ya başqa əyləncə mərkəzlərində istirahət edənlərə şamil etmək düzgün deyil. Çünki böyük insan kütləsinin olduğu məkanlarda təhlükəsizliyin təmin edilməsi elə də asan olmur. Bu nəzərə alınaraq, Milli Parkda xüsusi mühafizə sistemi də yaradılıb: "Bulvarda əhalinin təhlükəsizliyinin təmin edilməsi ilə məhz həmin mühafizə xidməti məşğul olur. Attraksionlarda isə əhalinin istirahətinə gəlincə, bu hələlik bizim və qurğuların rəhbərləri ilə imzalanan müqaviləyə əsasən tənzimlənir. Həmin qurğuların texniki baxışına məhz onlar cavabdehdir. Amma bununla yanaşı, gələcəkdə idarənin də nəzdində belə bir nəzarət qurumunun yaradılması nəzərdə tutulub"- dedi. Atraksionlardan bəzilərinin istismar müddətini başa vurduğuna toxunan Əfqan Şahmarov onların tədricən dəyişdirildiyini bildirdi: "Attraksionlar nisbətən səssiz işləməlidir, elə attraksionlar var ki, onlar əhalinin istirahətinə mane olur, ətrafa çox səs yayılır. Ancaq bütün atraksionların eyni vaxtda dəyişdirilməsi mümkün deyil. Proses tədricən həyata keçiriləcək. Yəni əvvəl gərək onların yenisini qoymağa imkan yaradaq ki, sonra köhnələri götürə bilək". DƏNİZKƏNARI PARKIN ƏRAZİSİ GENİŞLƏNDİRİLƏCƏK Məlumat üçün bildirək ki, hazırda bulvarın ərazisinin genişləndirilməsi istiqamətində də iş gedir: "Ümumiyyətlə, Dənizkənarı Bulvarın gələcək perspektiv planında onun Əl Oyunları Sarayından Bibiheybət Məscidinə tərəf, liman tərəfdən isə Zığ istiqamətində uzadılması nəzərdə tutulub. Mövcud və böyüdülməsi nəzərdə tutulan yenidənqurma və tikinti işlərinin 5-7 il ərzində başa çatdırılacağı gözlənilir". Səyyar satış obyektlərinə gəlincə isə, rəis bu tip ticarətin yaz-yay mövsümündə daha aktuallıq qazandığını vurğuladı: "Yalnız uşaqların əllərində açıq halda tum satmasına qadağa qoyulub. Belə ki, istəyənlər dükanlardan paket formasında qablaşdırılan tumlardan ala bilərlər. Biz buna müdaxilə edə bilmərik. Amma artıq əhalinin tumların qabığını hara gəldi tökməsi bulvar işçilərinin işini bir qədər də artırır. Ona görə də bulvarda zibil qablarının sayını əvvəlki ilə müqayisədə xeyli artırmışıq. Zibil maşınları isə gün ərzində bir neçə dəfə tullantıların toplanması və daşınmasını həyata keçirirlər". Əfqan Şahmarov Milli Parkda velosiped sürənlərə qarşı müvəqqəti qadağa qoyulduğunu vurğuladı: "Düzdür, velosiped sürmək istirahətin bir növüdür, sağlamlıqdır. Amma hazırda bulvar ərazisində söküntü-tikinti işləri aparılır. Bununla əlaqədar əraziyə yük maşınları daxil olur. Zibil maşınları hərəkət edir. Bu isə müəyyən təhlükə yaradır. Digər tərəfdən də velosiped sürənlərin sayının artması istirahət edənlərə maneçilik törədir və onların sağlamlığını təhlükə qarşısında qoyur. Ona görə də Gələcəkdə Dənizkənarı Bulvar İdarəsinin yeni layihəsində velosiped sürənlər üçün xüsusi xətt ayrılacaq". "MİRVARİ" VƏ "SAHİL" RESTAVRASİYA EDİLƏCƏK Bulvarın ərazisində yerləşən "Satko" kafesində də təmir işlərinin görülməsi nəzərdə tutulub. "Satko" ilə yanaşı, bulvar ərazisində fəaliyyət göstərən "Mirvari", "Sahil" restoranlarının bərpası, restavrasiyası aparılacaq. Onun sözlərinə görə, fəvvarələrin də yenidənqurulması istiqamətində bir sıra tədbirlər görülür. Məsələn, Hökumət Evinin qarşısındakı ərazi artıq hasara alınıb. Vaxtilə qurulmuş fəvvarələrin yerində daha müasir və standartlara cavab verəcək fəvvarələr yaradılacaq. Onların ilin sonunda istifadəyə verilməsi planlaşdırılır. Bulvarda göstərilən xidmətlərin qiymətlərinə gəlincə, Əfqan Şahmarov attraksionların qiymətinin normal olduğunu qeyd etdi və bildirdi ki, yaxın vaxtlarda tariflərin artırılması planlaşdırılmır.

 

Üç nöqtə.- 2008.- 24 may.- S. 18.