Dünən Tarix Muzeyinin açılışı oldu

Burada Hacı Zeynalabdin Tağıyevin xatirə muzeyi yaradılıb

Üç ildir ki, təmir olunan Tarix Muzeyinin dünən açılışı olub. Tədbirdə çıxış edən muzeyin direktoru Nailə Xanvəliyeva binanın təmirdən əvvəl guya qəza vəziyyətində olduğunu bildirib. Müasir avadanlıqlarla təchiz edilən muzey qapısını qonaqların üzünə açıb. Qeyd edək ki, təmirdən sonra muzeyin içərisində xeyli dəyişikliklər edilib. Belə ki, hər bir tarixi eksponatların yanındakı paneldə üç dildə həmin dövrə aid tarixi məlumatlar yerləşdirilib.

Direktor təmirdən sonra muzeyə yeni tarixi materiaiların verildiyini bildirib. Zallarda qoyulan monitorlarda hər dövrün özünə uyğun olaraq qısa filmlər nümayiş etdirilir.

Eyni zamanda muzeydə yeni eksponatların sayı artırılıb. Belə ki, Nazirlər Kabinetinin və ölkə prezidentinin ehtiyat fondunun ayırdığı vəsait hesabına yeni əşyalar alınıb.

Çoxlarına məlumdur ki, vaxtilə muzeyin direktoru erməni olub. 1929-cu ildə erməni mənşəli Manukyan Azərbaycan Tarix Muzeyinə rəhbərlik edib. Onun rəhbərliyi zamanı cümhuriyyət dövrünə aid bir çox qiymətli materiallar və əşyalar Moskvada yeni yaradılan İnqilab Muzeyinə göndərilib. Tarix Muzeyinin indiki direktoru N.Vəlixanovanın sözlərinə görə eksponatların geri qaytarılması ilə bağlı dəfələrlə Moskvaya müraciət edilsə də, onlara əşyaların muzeydə olmadığı bildirilib.

Yeri gəlmişkən qeyd edək ki, muzeydəki dəyərli eksponatları daha da zənginləşdirən Məmmədəmin Rəsulzadənin öz əli ilə hazırladığı bayraq da var. Bayrağı "Müsavat" partiyası muzeyə hədiyyə edib,

ölkə başçısının tapşırığı ilə binada yaradılan və 8 otaqdan ibarət olan Hacı Zeynalabdin Tağıyevin xatirə muzeyi isə ikinci mərtəbədə yerləşdirilib. Otaqlarda unudulmaz xeyriyyəçimizə məxsus orijinal əşyalar var. Bəzi əşyalar isə fotolara əsasən bərpa edilib.

Qeyd edək ki, Azərbaycan Tarix Muzeyinin yerləşdiyi binanı vaxtilə rəhmətlik Hacı Zeynalabdin Tağıyev inşa etdirib.

Gündəlik Bakı.- 2008.- 8 may.- S. 14.