Nizamiqızı H.

Muzeylər - keçmişin daşıyıcıları

18 May - Beynəlxalq Muzeylər Günüdür. 1979-cu ildən YUNESKO-nun Beynəlxalq Muzeylər Şurası (İKOM) kimi fəaliyyətə başlayan qurum, ümumilikdə dünya maddi-mədəni irsinin qoruyucusu sayılan bu mərkəzlərin fəaliyyətinə dəstək məqsədi daşıyır. Təşkilatın Moskvada baş tutan genişmiqyaslı XI konfransında bu tarixin muzeylər günü kimi qeyd olunması qərara alınmış və elə həmin tarixdən etibarən dünyada 18 may Muzeylər Günü kimi qeyd edirlər.

Respublikamızda da qeyd olunan bu gün və muzey işinin vəziyyəti barədə məlumat verən Mədəniyyət və Turizm Nazirliyinin Mədəniyyət siyasəti şöbəsi muzey işi sektorunun müdiri Azadə Hüseynova, hazırda respublikamızda 193 muzeyin fəaliyyət göstərdiyini bildirdi. Mədəniyyət və Turizm Nazirliyinin tabeliyindəki bu mərkəzlərin 46-sı Heydər Əliyev, 43-ü isə mənzil-muzeylərdir. Ölkədəki muzeylərin 4-nün döyüş-şöhrət, 12-nin tarix, 14-nün ədəbiyyat və 66-nın da tarix-diyarşünaslıq profilli olduğunu xatırladan sektor müdiri bu sahənin inkişafının daim dövlətin diqqət mərkəzində saxlanıldığını da qeyd etdi.

Artıq bir neçə muzeyin əsaslı təmiri və bəprasından sonra istifadəyə verildiyini yada salan Azadə xanım, bu işin davam etdirildiyini bildirdi: «Maddi-mədəni irsimizin qoruyucusu olan muzeylərimizin ölkə rəhbərinin diqqət mərkəzində olması sevindirici haldır. Təsadüfi deyildir ki, ölkə başçısı bu sahə ilə bağlı müvafiq sərəncam da imzalayıb. Uğurla gerçəkləşən bu fəaliyyət proqramının nəticələri göz qabağındadır. Bugünlərdə YUNESKQ-nun baş katibi, ölkə başçısı İlham Əliyev, H.Əliyev Fondunun prezidenti, YUNESKO-nun xoşməramlı səfiri, millət vəkili Mehriban xanım Əliyeva və digər nüfuzlu nümayəndələrin iştirakı ilə L.Kərimov adına Azərbaycan Xalçası və Xalq Tətbiqi Sənəti Dövlət Muzeyinin yeni binasının təməlqoyma mərasimi keçirildi. Bu, böyük hadisədir. Bundan başqa Azərbaycan Tarixi Muzeyinin əsaslı təmir-bərpası gerçəkləşdi. Hazırda Nizami adına Ədəbiyyat və Azərbaycan Dövlət İncəsənət muzeylərində də əsaslı təmir işləri həyata keçirilir.

Üzeyir Hacıbəyovun ev-muzeyinin inzibati binası, Vaqif Mustafazadənin, Niyazinin və M.Rostropoviçlərin mənzil-muzeylərinin təmiri və bədii tərtibatı işi həyata keçirilib. Bütün bunlarla yanaşı, hələ də təmirə ehtiyacı olan muzeylərimiz var və biz onları da nəzarətdə saxlayırıq. S.Vurğun, C.Cabbarlı və Ə.Əzimzadənin ev-muzeylərinin də təmir olunması nəzərdə tutulur».

Görkəmli fırça ustası Səttar Bəhlulzadənin mənzil-muzeyi ilə bağlı məlum məhkəmə işinin yekunlaşmasından sonra, orada da təmir və bədii tərtibat işlərinin aparılacağını deyən sektor müdiri, Qubadakı Tarix-Diyarşünaslıq Muzeyi üçün yeni binanın tikildiyini və R.Rzanın Göyçaydakı ev-muzeyinin əsaslı təmir olunacağını da qeyd etdi.

Sektor müdiri Muzeylər Günü ilə bağlı respublikanın bütün muzeylərində silsilə tədbirlərin keçiriləcəyini də əlavə etdi: «Əksər muzeylərimizdə «Açıq qapı günü» və «Muzeylər gecəsi» devizləri ilə tədbirlər olacaq. Genişmiqyaslı tədbirlər planı çərçivəsində bu gün saat 19.00-da Azərbaycan Xalçası və Xalq Tətbiqi Sənəti Dövlət Muzeyində «Muzeylər cəmiyyətin inkişafında və dəyişməsində ortaq kimi» devizi altında "Muzeylər məkanında ruhumuzun milli irsə köklənmiş havadarı» adlı tədbir keçiriləcək.

Ertəsi gün saat 11-də isə Muzey Mərkəzində dəyirmi masa təşkil olunacaq. Amerikalı ekspert, muzeyşünas Uord Minzin «XXI əsrin muzeyləri - problemlər, perspektivlər» mövzulu məruzəsində muzey işinin durumu ilə bağlı müzakirələr aparılacaq. Elə həmin gün saat 17.00 Dövlət İncəsənət Muzeyində təşkil olunacaq «Muzeylər gecəsi» çərçivəsində Rinay Malakafauna muzeyinin kolleksiyası nümayiş etdiriləcək. Tədbirlər silsiləsinə Azərbaycan Musiqi Mədəniyyəti Dövlət Muzeyinin təşkilatçılığı ilə Niyazinin mənzil-muzeyində «Klassik musiqisevərlər klubu»nun açılışı da daxildir».

Bu gün Üzeyir Hacıbəyovun ev-muzeyində də təntənəli şəkildə qeyd olunacaq. Ekspozisiyalarla tanışlıq xarakteri daşıyan tədbirdə gənc ifaçıların iştirakı ilə konsert proqramı da təşkil olunacaq. Həmçinin mayın 18-i də İncəsənət və Musiqi Mədəniyyəti Dövlət muzeylərində «Açıq qapı günü» keçiriləcək.

Mədəniyyət.- 2008.- 17 may.- S. 5.