Azıx mağarası 5
metr dərinlikdə qazılıb
Laçın və Şuşada
isə tikinti-quruculuq prosesi başlayıb
"Şuşa, Laçın, Kəlbəcər,
həmçinin Ağdam, Qubadlı, Cəbrayıl və
Zəngilan rayonlarının hər birində 200-dən
2000-dək adam məskunlaşdırılıb.
2010-cu ilədək Dağlıq Qarabağ əhalisini
300 min nəfərə çatdırmaq planının
həyata keçirilməsi məqsədilə Ermənistan
rəhbərliyi həmin ərazilərdə məskunlaşan
insanlara kreditlər verir" - bu məlumatlar Azərbaycanda
Vətəndaş Cəmiyyətinin İnkişafına
Yardım Assosiasiyasının (AVCİYA) və Miqrant və
Məcburi Köçkünlərin Hüquqlarının
Müdafiəsi (MMKHM) İctimai Birliyinin
"Azərbaycanın işğal olunmuş
ərazilərində ermənilərin
məskunlaşdırılması" mövzusunda
keçirdiyi "dəyirmi masa"da səsləndirildi. MMKHM sədri Nadir Abdullayev Qarabağın işğalının
Azərbaycana 60 milyard
dollar ziyan vurduğunu dilə gətirdi: "Onlar hər vəchlə bu ərazilərin ermənilərə məxsus
olduğunu deyirlər.
Bu kurs iki
xətlə aparılır.
Birinci Azərbaycana məxsus abidələrin məhv edilməsinə, ikinci xətt isə tarixi abidələrimizin dəyişdirilərək
onların guya ermənilərə məxsus
olduğunu sübuta yetirməyə yönəldilib".
N.Abdullayev ermənilərin
Azıx mağarasının
guya onlara məxsus olması haqda iddialarından geri çəkilmədiklərini
bildirdi: "Bir neçə gün öncə ermənilər
Böyük Britaniyadan
arxeoloq gətirərək
Azıx mağarasında
qazıntı işlərinə
başlayıblar. Onlar
bir zamanlar buradan tapılmış neandertal insanının çənə sümüyünün
ermənilərə məxsus
olduğunu deyirlər.
Bədnam qonşularımızın
saxta iddiaları bununla yekunlaşmır. Onlar guya Ağdamda
mövcud olmuş qondarma Tiqranakert adlı şəhərin qalıqlarını "axtarırlar".
Erməniləşdirmənin ikinci ən böyük istiqaməti işğal olunmuş əraziləri məskunlaşdırmaqdır.
"Artsaxa qayıdış"
proqramı bu siyasətin tərkib hissəsidir. Bunun sponsoru isə Qərbi Amerikanın Erməni Təsisi, Hayastan Fondları və Tehranın Erməni Yeparxiya Şurasıdır". N.Abdullayev
xəbər verdi ki, Ermənistanın bütün şəhər
və kəndlərində
yaradılan miqrasiya xidmətləri əhalini
Qarabağa köçürməklə
məşğuldurlar: "Hər il 200-300 ailə Qarabağa yerləşdirilir. Laçın
dəhlizində 1000-ə
qədər erməni
ailəsi yerləşdirilib.
Yeni hökumət parçalanmış ölkəni
birləşdirmək üçün
Dağlıq Qarabağ
variantından istifadə
etməyə başlayıb.
Laçında artıq
8 orta məktəbin tikintisi, 19-nun təmiri, 3 uşaq bağçasının
inşası planlaşdırılıb.
Təhsil müəssisələrinin
21-i kompüterlə təchiz
ediləcək. Laçında
60 kilometr yol örtüyünün təmiri
planlaşdırılır. Bununla yanaşı, 1 poliklinika, 4 tibb məntəqəsi, 1 ticarət
mərkəzi tikiləcək.
Eyni zamanda 540 nəfəri işlə təmin edəcək yeni müəssisənin tikintisi nəzərdə tutulub".
Abidələrin Mühafizəsi İctimai
Birliyinin sədri Faiq İsmayılov isə Azıx mağarasında aparılan
qazıntı işlərindən
danışdı. Bildirdi
ki, mağara 5 metr dərinliyində qazılıb, bu işlərə 1 kəndin
əhalisi cəlb edilib: "Artıq Şuşada 1200 ailə məskunlaşdırılıb. Hər doğulan uşağa 1000 dollar pul ödənilir. Laçında isə hər ailəyə ildə 1 inək verilir. Bu barədə
məlumatları abxazlar
veriblər. Onlar bu barədə film də çəkiblər".
Tədbir iştirakçıları
sonda BMT, ATƏT və
ATƏT-in Minsk Qrupunun üzvü olan dövlət başçılarına
rəsmi müraciət
ünvanladılar.
Həftə içi.- 2008.- 15
may.- S. 3.