Fəxriyyə

Naxçıvanda beynəlxalq konfrans keçirildi

Məlum olduğu kimi, 2006-cı ilin 9-12 sentyabr tarixlərində respublikamızın paytaxtı Bakı şəhərində keçirilən İslam Konfransı Təşkilatına üzv dövlətlərin turizm nazirlərinin beşinci konfransından sonra həmin təşkilata Azərbaycan Respublikasının Mədəniyyət və Turizm naziri Əbülfəs Qarayev sədrlik edir. Bununla əlaqədar sədrlik çərçivəsində bir sıra tədbirlər həyata keçirilir. Bu tədbirlər silslləsi sırasından növbəti beynəlxalq konfrans mayın 20-22-də Naxçıvan Muxtar Respublikasında baş tutdu.

"Dini və sağlamlıq turizmin mənəvi və fiziki istirahətin təşkili" adlı beynəlxalq konfransın əsas məqsədi islam dünyasında dini turizmin və ziyarətlərin əhəmiyyəti üzrə təcrübə mübadiləsindən, din və sağlamlıq ocaqlarının mahiyyəti, onun turizm məqsədləri üçün səmərəli idarə edilməsi yolları, həmçinin davamlı inkişaf üçün dini və sağlamlıq turizmi çərçivəsində dövlət dəstəyinə dair qarşılıqlı müzakirələrin aparılması və bu sahədə İslam Konfransı Təşkilatına üzv ölkələrə müvafiq tövsiyələrin hazırlanmasından ibarətdir. Konfransın işində 10 islam ölkəsindən olan nümayəndələr iştirak edir. İki beynəlxalq təşkilatın – Dialoqla Əməkdaşlıq Uğrunda İslam Konfransı Gənclər Forumu və İslam Ttcarət İnkişafı Mərkəzi də tədbirə qatılıb.

Azərbaycan tərəfindən isə konfransda Mədəniyyət və Turizm, Səhiyyə nazirliklərinin, Bakı Turizm və İnformasiya Mərkəzinin, Qafqaz Müsəlmanları idarəsinin, Dini Qurumlarla iş üzrə Dövlət Komitəsinin, İqtisad Universitetinin, Azərbaycan Milli Elmlər Akademiyası Əlyazmalar İnstitutunun, Azərbaycan Turizm İnstitutunun, Azərbaycan Respublikası Turizm və Ekskursiyalar Şurasının, Naxçıvan Muxtar Respublikası Mədəniyyət və Turizm Nazirliyinin və yerli turizm şirkətlərinin nümayəndələri iştirak edirlər.

Qeyd edək ki, konfransın birinci günü plenar iclas yekunlaşıb, ikinci günü isə tədbir iştirakçıları muxtar respublikanın ərazisinə ekskursiya ediblər.

Konfransın gedişi və nəticələri ilə bağlı növbəti sayımızda geniş material dərc edəcəyik.

Mədəniyyət.- 2008.- 22 may.- S. 9.