Həqiqət

Azərbaycan Kubanın turizm sektoruna investisiya qoymaqda maraqlıdır

Kubanın Ticarət və Sənaye Palatasının prezidenti Raul Besseranın rəhbərlik etdiyi nümayəndə heyəti İqtisadi İnkişaf Nazirliyində olub. Nazir Heydər Babayevlə keçirilən görüşdə iki ölkə arasındakı iqtisadi əlaqələrin mövcud vəziyyəti və əməkdaşlıq perspektivləri müzakirə edilib. Bu barədə məlumat verən nazirliyin mətbuat xidmətindən bildirilib ki. H.Babavev Azərbaycan və Kuba arasındakı iqtisadi əlaqələri daha da inkişaf etdirmək üçün real imkanların olduğunu vurğulayıb: "Bu imkanlardan daha səmərəli istifadə edilməsi hər iki ölkə üçün faydalı ola bilər. Azərbaycan və Kuba arasında əməkdaşlıq üzrə Hökumətlərarası Komissiyanın və Parlamentlərarası Dostluq Qrupunun fəaliyyəti isə iki ölkə arasındakı əlaqələrin gələcəkdə də inkişafı üçün perspektiv yaradır".

Görüşdə Azərbaycan sahibkarlarının 2007-ci ilin noyabr ayında Havanada keçirilmiş 2-ci Regional Biznes Forumda iştirak etməsi və kubalı həmkarları ilə işgüzar görüşlər keçirməsindən də söz açılıb. Nazir bildirib ki, orada təşkil edilmiş sərgidə nümayiş etdirilən Azərbaycan məhsulları kubalılar tərəfindən maraqla qarşılanıb: "Bu cür tədbirlərin davam etdirilməsi də iş adamları arasında tərəfdaşlıq əlaqələrinin genişlənməsində əhəmiyyətlidir".

Kubanın Ticarət və Sənaye Palatasının prczidcnti Bessera isə ölkəsinin Azərbaycanla əməkdaşlıqdan məmnunluğunu ifadə edib. Aprel ayında Kubanın neft sənayesi mütəxəssislərindən ibarət nümayəndə heyətinin Bakıda səfərdə olduğunu xatırladan Bcssera qeyd edib ki, səfər çərçivəsində nümayəndə heyəti Azərbaycanın neft sənayesi ilə yaxından tanış olub. Ölkəmizdə neft sənayesinin inkişafını müsbət qiymətləndirən kubalı qonaq məişət avadanlıqlarının - kondisioner, televizor və s. istehsalı ilə də maraqlanıb. Nazirlikdən qeyd edilib ki, qonaqlara bu sahədə fəaliyyət göstərən müəssisələr - Bakı Kondisionerləri zavodu, eləcə də Şamaxıda məişət avadanlıqları istehsal edən "Star LTD" zavodu barədə də məlumat verilib. Görüşdə həmçinin turizm, səhiyyə, təhsil və s. sahələrdə əməkdaşlıq məsələləri də müzakirə olunub. Görüşdə o da qeyd edilib ki, Azərbaycan və Kuba təhsil sahəsində tələbə mübadiləsi həyata keçirə, eləcə də ixtisaslaşmış səhiyyə mütəxəssislərinin potensialından istifadə edə bilərlər. H.Babayev Azərbaycanın Kubanın turizm sektoruna investisiya qoymaqda maraqlı olduğunu da qeyd edib.

Kaspi.- 2008.- 17-19 may.- S. 8.