Şamilqızı Ü.

Turizm İnstitutu xaricə tələbə göndərir

Məqsəd Avropa təhsilinə yiyələnməkdir

Azərbaycan Turizm İnstitutu Avstriyanın Krems Universiteti ilə birgə işləmək məqsədilə müqavilə imzalayıb. Müqaviləyə əsasən institutun tələbələrindən başqa müəllim və işçi heyəti də təcrübəsini artırmaq üçün xaricə göndəriləcək. Bu proqram çərçivəsində artıq institutun 7 nəfərdən ibarət heyəti Avstriyanın Krems Universitetində müəyyən kurslar keçib. Azərbaycan Turizm İnstitutunun rektoru Cəfər Cəfərov belə bir fikrin hələ institut yaranmamışdan əvvəl olduğunu söylədi: "Turizm İnstitutu mütləq Avropanın aparıcı ali məktəbləri ilə əməkdaşlıq edəcək. Biz bu strategiyaya uyğun olaraq hazırda Avstriyanın Krems Universiteti ilə birgə fəaliyyət göstəririk. Ümumiyyətlə Turizm İnstitutu yaranıb, rəhbərliyi təyin olunduqdan sonra biz imzalanan bu müqavilə üzərində işləməyə başladıq. Təxminən bir il müddətində bu proqramla bağlı universitetlə yazışmalar, görüşlər, müzakirələr apardıq və yekun olaraq keçən ilin yayında müqavilə imzalandı. Bu işin əsas tərəfi isə tələbələrə gələcəkdə ikili diplomların verilməsidir. Avropada bakalavr adətən 3 il müddətində olur, bizdə isə dörd illikdir. Bu səbəbdən biz birinci ili tələbələrə Azərbaycanın tədris standartlarına uyğun olan pridmetləri keçməyə başladıq və burada ingilis dilinin tədrisinə daha çox üstünlük verdik. Hazırda bizim institutda hər gün ingilis dilində dərslər keçirilir. 2-ci ildə isə xaricə göndərmək üçün tələbələr arasından ən yaxşılarını seçdik. Çünki burada dil bilən və bacarıqlı tələbələrə daha çox üstünlük verilir. Hazırda Avstriyaya 22 tələbənin getməsi planlaşdırılıb. Əslində bu say 25 nəfərdən ibarət idi, sadəcə olaraq onların bir hissəsi başqa beynəlxalq layihələr çərçivəsində xaricə gediblər. Bu tələbələrə dərsləri əsasən xaricdən gələn mütəxəssislər keçirlər, amma bəzən biz yerli ekspertin biliklərindən istifadə edirik".

Cəfər Cəfərov bildirdi ki, layihə çərçivəsində tələbələr müxtəlif müddətlərdə xaricdə təhsil alma hüququnu institut daxilində keçirilən test imtahanında üstünlük qazandıqdan sonra əldə edəcəklər: "Həmin layihə Avropa Birliyinindir. Onun əsasında 16 Avropa Universitetinin koalisiyası yaradılıb. Bu səbəbdən biz gələn ildən xaricdə təhsil almaq üçün göndərilən tələbələrin sayını artırmaq istəyirik. Çünki institutun cəmiyyət arasında nüfuzu artdıqca tələbələrinin sayı da çoxalır. Məhz buna görə bu layihə çərçivəsində 2007-2008-ci tədris ili üçün xaricə göndərəcəyimiz tələbələrin sayı təxminən 50 nəfərdən az olmayacaq. Bu müqavilənin imzalanmasında hökumət tərəfdən Mədəniyyət və Turizm Nazirliyi çıxış edib. Universitetlər öz aralarında akademik müqavilə də bağlayıb. Tələbələrin ilk öncə qiymətlərinə, davranışlarına, bilik səviyyələrinə diqqət yetiririk, həmçinin onlar xaricə getmək üçün institut daxilində test formasında olan bir imtahan verirlər. Ümumilikdə tələbələrin xaricdə oxuyub, təcrübə əldə etmələri, gələcəkdə onların həyatları üçün böyük əhəmiyyət kəsb edə bilər".

Müsahibim qeyd etdi ki, bu layihə Avropa təhsilinə yiyələnmək üçün reallaşdırılır. Amma bu kimi tədbirləri həyata keçirmək böyük məbləğdə xərclərə başa gəlir: "Məsələn, İngiltərədə master dərəcəsini almaq üçün tələbə ilə təxminən 50-100 min dollar məbləğində vəsait ödəməlidir. Bu məqsədlə bu strategiyanı biz Azərbaycanda qursaq bu daha effektiv olar. Biz bu il 75 tələbəni yay simestrlərində Kipr, Yunanıstan və Türkiyəyə göndərməyi nəzərdə tuturuq. Tələbənin xaricdə oxuyub gəlməsi müvəqqəti bir məsələdir. Bunun üçün biz öz təhsil səviyyəmizi yüksəltməliyik. Bizim bu proqram da məhz bu istiqamətə yönəldilib".

C.Cəfərov Avropa Birliyinin bu layihənin reallaşması üçün təxminən 2 milyon dollar məbləğində vəsai ayırdığını dedi: "Bu vəsait sırf tələbələrin təhsil alması, onların yaşamaq və s. problemləri üçündür". Rektor həmçinin gələcəkdə institutun Kipr, Rusiya və digər ölkə universitetləri ilə əməkdaşlıq etməsi üçün müqavilələr imzalanacağını söylədi.

Xalq cəbhəsi.- 2008.- 8 may.- S. 11.