Bərksürənlər

 

Dəyirman qrupunun yeni klipi belə adlanır

 

Dünən BMM- Dəyirman qrupu Bərksürənlər mahnısına çəkdirdiyi klipin təqdimatını keçirdi. Bu, Dəyirman qrupunun sayca yeddinci klipi idi.
   Avropa kliplərinə bənzər ekran işini rejissor Fuad Əlişov çəkib. Qrupun açıqlamasına görə, onların bir neçə mahnıları İngiltərə Almaniya radiolarında səsləndirilib.  Əlaqələri genişdir, mahnılarını Avropa arenasına çıxarmaq arzusundadırlar...
   Repdən qazanc mənbəyi kimi gəlir əldə edə bilməyən qrup, əksinə, gəlirlərinin bir hissəsini yaradıcılığa  sərf edir. Qrupun üzvləri olan Yusiflə Emilin şərikli reklam şirkətləri var, Malik isə bizneslə məşğuldur.
   Yeri gəlmişkən Bərksürənlər mahnısı yeni yarananda gənc repçi Nado ilə qrupun üzvləri arasında müəyyən söz-söhbət yaranmışdı. Nado Dəyirmançıları ittiham edərək onları mahnı oğurluğunda günahlandırmışdı. Deyirdi ki, həmin mahnı Sürən adı ilə ona məxsusdur. Malik isə gənc repçi Nadonun bu fikirlərini əsassız adlandırdı: Mahnı bizimdi, bunun üçün bu gün həmin mahnıya klip çəkilib. Əgər Nadonun bu barədə şübhəsi varsa, məhkəməyə müraciət etsin.
   Repçilər qarşıda dostları Elşad Xose ilə birgə  Haqq-ədalət adlı mahnını təqdim edəcəklər. Mahnı sosial mövzudadır: Bizim albomdakı mahnıların əksəriyyəti  cəmiyyətdəki əyri-əskiklərə, problemlərə həsr olunub. Lakin kütlənin diqqətini çəkəcək mövzular radiostansiyalar, televiziya şirkətləri tərəfindən qəbul olunur. Buna görə biz azad sözçülər istədiyimiz mövzuya klip çəkdirə bilmirik.
   İndiyə qədər bir neçə tanınmış pop müğənnilərilə duet oxuyan Dəyirmançılar bu layihəni silsilə şəklində davam etdirəcəklər. Onlar Anar Nağılbaz, Elşad Xose ilə birlikdə 5 ton adlı mahnını da ərsəyə gətirməyi planlaşdırırlar. Bundan başqa, Röya ilə ikinci dueti hazırlayırlar. Sən adlanan mahnıya klip çəkiləcək.
   Bir vaxtlar Ya Qarabağ, ya ölüm publikanın rəğbətini qazanan Malik bu gün vəziyyəti başqa cür qiymətləndirir: Repə qulaq asan azdır. Təəssüflər olsun ki, bu səbəbdən arzularımızı reallaşdıra bilmirik. Dəyirman 7 ildir fəaliyyət göstərməsinə baxmayaraq, 3 il fəaliyyətini dayandırdı. Çünki ətrafdakılardan heç bir kömək görmədi. Baxmayaraq ki, onlar Ya Qarabağ, ya ölüm şüarlarını səsləndirməklə öz sözlərini artıq demişdilər, nəhayət ki, özləri güc toplayıb, sənət üçün isə edə bildilər.  

 

Gün.- 2008.- 22 may.- S. 14.