Prokuror filminə baxış olmuşdur

 

Bu günlərdə "Nizami" kinoteatrında "Star Prodakş"ın istehsalı olan "Prokuror", "Mehman" bədii filminin davamına baxış keçirilmişdir. Tamaşaçı diqqətini çəkən, marağına səbəb olan ekran əsərində hadisələrə müasir münasibət, dövr-zamanın inkişaf proseslə\ri, gələcəyə inam, ümid inandırıcı şəkildə lentə alınıb. Kinokadrlar dəyişdikcə keçmişlə bugünümüzü canlandıran əhvalatlar, olaylar ekranda görünür. Filmin quruluşçu rejissoru Nadir Muqbilov dedi:
- İkinci dəfə bu mövzuya müraciət etməkdə məqsədimiz aktual problemə müasirlik baxımından aydınlıq gətirmək, hüquq-mühafizə, xüsusən prokurorluq orqanı əməkdaşlarının ümumxalq, dövlət əhəmiyyətli xidmətini ekranda göstə\rmək olmuşdur. İstədiyimizə necə çatmışıq, bunu hörmətli tamaşaçılar deyəcəklər.
Daha sonra polkovnik Ömər müəllim rolunun ifaçısı, əməkdar artist Azad Şükürov fikrini tədbir iştirakçılarına çatdırdı:
- Uşaqlıq, gənclik çağlarımdan "Mehman" bədii filmindən aldığım xoş təəssüratı hələ unutmamışam. Həmin ekran əsərinin yaradıcılarından çoxları dünyalarını dəyişsələr , onların əziz xatirələri yenə yaddaşımda yaşayır. Görkəmli teatr, kino xadimi Adil İsgəndərovu unutmaqmı olar?.. "Prokuror" filminin çəkilişinə dəvət olunanda çox sevindim. Ssenari ilə tanışlıqdan sonra quruluşçu rejissoru dinlədim, onun məqsədini, məramını öyrəndim, məsləhətlərini eşitdim. Çəkiliş zamanı çox əziyyət çəkdik. Amma arzumuza çatdıq. Bu gün zəhmətimizin bəhrəsini sizlərə təqdim edirik. Əgər zövq alsanız, bizlər özümüzü xoşbəxt sayarıq.
Müstəqilliyimizi/, inkişafımızı sənətkarlıqla, bədii nüanslarla tərənnüm edən filmin quruluşçu operatoru Elzan Novruzov, rəssamı Tahir Rəsulov, bəstəkarı İlham Rəhimovdur. Əsas rollarda Zərnigar Atakişiyeva, Firəngiz Babayeva, Aydın Əliyev, Vüqar Quliyev, Simuzər Atakişiyeva, Lamiyə Səlimova başqaları çəkilmişlər. Əməkdar incəsənət xadimi, kinoşünas Cəmil Quliyevin qənaəti isə belə oldu: "Yaradıcı kollektivin əməyi diqqətə, hörmətə layiqdir. Mən onların hər birinə ürəkdən "çox sağ olun" deyirə\m. Qürur hissi keçiririk ki, son vaxtlar ölkəmizdə başqa sahələrdə olduğu kimi, kinematoqrafiya sahəsində tərəqqi aşkar hiss olunur. Bu film ölkə Prezidenti İlham Əliyevin rüşvətxorluğa korrupsiyaya qarşı mübarizə\ tədbirləri haqqında 2005-ci ildə imzaladığı sərəncama ictimai-mədəni dəstəyin təzahürü kimi ərsəyə gəlib".
İki saatlıq ekran əsərinin nümayişi başa çatdıqdan sonra alqışlar xeyli müddət davam etdi.
Tamaşaçıların filmdən razı qaldıqları aşkar duyulurdu.

Azərbaycan.- 2008.- 25 may.- S. 8.