Brilliant Dadaşova Şimali Kiprdə konsert verib

 

Əməkdar artist Brilliant Dadaşova Şimali Kipr Türk Cumhuriyyətinin Yakın Doğu Universitetinin Atatürk Kültür Mərkəzində konsert proqramı ilə çıxış edib. Müğənni konserti sözügedən universitetin qurucu rektoru doktor Suat Günselin təklifi ilə verib. Azərbaycan Demokratik Cümhuriyyətinin 90 illiyi çərçivəsində düzənlənən konsertdə Brilliant xanımı Azərbaycandan getmiş orkestr müşayiət edib. Bu barədə məlumatı müğənninin mətbuat katibi Aynurə Əhmədova verib. Onun sözlərinə görə, sənətçi Şimali Kiprdə verdiyi konsertdə Üzeyir Hacıbəyovun, Fikrət Əmirovun, Tofiq Quliyevin, Faiq Sücəddinovun, Arif Məlikovun, Cavanşir Quliyevin əsərləri ilə yanaşı, türk mahnılarını da səsləndirib. Sonda isə konsert Azərbaycan marşı ilə sona çatıb. Yeri gəlmişkən, Brilliant Dadaşovanın Şimali Kipr Türk Cümhuriyyətinə səfəri yerli telekanal mətbu orqanların da diqqətindən kənarda qalmayıb. Belə ki, sənətçi Kiprin "Kanal T" televiziyasında iki saatlıq proqrama qatılıb musiqi ilə bağlı fikirlərini bölüşüb. Konsertdən öncə isə "Yurtsevər kıbrıslı" qəzetinin əməkdaşı Brilliant Dadaşovanı Azərbaycanın büllur səsli sənətçisi adlandırıb. Onu da qeyd edək ki, Brilliant xanım Kiprdən birbaşa Türkiyəyə gedib. Bu isə sənətçinin Türkiyədə iki dildə albom çıxarması ilə bağlıdır.

 

Üç nöqtə.- 2008.- 30 may.- S. 13.