Elnarənin "Həyat gözəldir" layihəsi maraqla qarşılandı

Ötən gün muğam ifaçısı Elnarə xanım yenidən media nümayəndələrini və bəzi sənətkarları ətrafına toplayıb təqdimat keçirdi. Demə, Elnarənin efirlərdə görünməməsinin səbəbi elə yeni layihəsi imiş. Bu dəfə Elnarə sayca üçüncü layihəsini təqdim etdi. Qeyd edək ki, hər üç layihə prodüser Asif Kərimovla birgə hazırlanıb.

Xatırlayırsınızsa, Elnarənin ilk layihəsi "Bizim aləm" adlanırdı. İki blokdan ibarət olan layihənin hərəsində 3 mahnı toplanmışdı. İlk layihə həqiqətən sənət aləmində böyük səs-küyə səbəb oldu. Vizual görüntülərlə təqdim olunan bu layihədə Elnarə avanqard üsluba üstünlük vermişdi. Layihədə mahnı və şur muğamları üstündə təsnif və xalq mahnıları toplanmışdı. Layihə disk şəklində də hazırlandı. Ancaq həmin disklər satış üçün nəzərdə tutulmamışdı. İkinci layihə isə "Şirvan gözəlləməsi" adlanırdı. Bu layihə də birincisindən yetərincə fərqləndi. Adətən muğam ifaçılarını tar və kaman müşayiət edir. Ancaq Elnarənin fərqli layihəsində xanəndə iki balabanın müşayiəti ilə canlı ifada məharətini nümayiş etdirdi. Şamaxının ən yüksək zirvəsində canlı ifası ilə gənc xanım musiqiçiləri belə heyrətləndirə bilmişdi. Çünki onun ifa tərzi özünəməxsus idi. Bu layihə folklor üslubunda hazırlanmışdı. "Şirvan gözəlləməsi"ndə layihəsi isə dörd blokdan ibarət idi. Dünən təqdim olunan "Həyat gözəldir" adlı layihə isə tamamilə digərlərindən fərqlənirdi. Asif Kərimovla Elnarənin birgə layihəsi ilk əvvəl elə media nümayəndələrinin müzakirəsinə buraxıldı. Onu da qeyd edək ki, bu layihədə Elnarə Bülbiilün də repertuarına müraciət etmişdi. Layihə boyu 45 dəqiqə ərzində 4 blokdan ibarət xalq mahnıları və muğamlar təqdim olundu. Bu layihə isə konkret olaraq akademik üslubda hazırlanmışdı. Onu da xatırladaq ki, Elnarənin ifasında təqdim olunan elə xalq mahnıları var idi ki, indiyə qədər demək olar ki, heç bir xanəndənin ifasında səslənməyib. Daha dəqiq desək, böyük xanəndələrdən sonra onları repertuarına daxil edən olmamışdı. Layihə vizual görüntü ilə təqdim edilirdi. Çəkilişdə tanınmış rəssatn Asif Azəroğlunun sənət əsərlərindən də dekor kimi istifadə olunub. Həqiqətən layihə media nümayəndələrinə təqdim olunduqdan sonra böyük alqışa səbəb oldu. Çünki son dövrlər heç bir muğam ifaçısının, sənətçinin təqdimatında belə möhtəşəm layihənin şahidi olmamışdıq. Mətbuat konfransından sonra qonaqlara da söz verildi. Mərasimdə ilk əvvəl xalq musiqisi, Elnarənin yeni layihəsi barədə fikir söyləmək üçün Hacı Əbdül Mahmudbəyov da xoş sözlərini dedi. Yeri gəlmişkən onu da qeyd edək ki, Asif Kərimovla Elnarə bundan sonra 4-cü layihələrini təqdim etməyi planlaşdırıblar. Dördüncü layihə caz-folklor janrında hazırlanacaq. Bir saat 40 dəqiqəlik bu layihənin konsert versiyasının hazırlanması nəzərdə tutulub.

Yeni dövr.- 2008.- 17 may.- S. 16.