Hacıxanoğlu İ.

 

УMövsümün musiqili premyeralarıФ

 

Bildiyimiz kimi, bu yaxınlarda Ukraynanın paytaxtı Kiyevdə "Mövsümün musiqili premyeraları" adlı XVIII Beynəlxalq Musiqi Festivalı keçirildi. Tanınmış bəstəkarlarımızın da iştirak etdiyi ənənəvi festival böyük əks-səda doğurub. Belə ki, Ukraynanın yerli qəzetləri Kiyevin sakit həyatını "pozan" festivalın ilk günlərindən müasir akademik musiqi dinləyicilərinin böyük həvəslə konsertlərə qatıldıqlarını qeyd ediblər.

Musiqi bayramma çevrilən festival, Vladimir Sirenkonun idarə etdiyi Ukrayna Dövlət Simfonik Orkestrinin ifasında Anna Qavriletsin "Paralellər" əsərinin səsləndirilməsi ilə açılıb. Dinləyicilər Dmitri Tkaçenkonun ifasında tanınmış ingilis bəstəkarı Bendjamin Brittenin Skripka və orkestr üçün konsertinə, Svitslav Lunevin "Ranta Rei" simfoniyasına qulaq asıblar. Sevindirici hal isə təntənəli açılış mərasimində Azərbaycanın dünyaşöhrətli bəstəkarı, xalq artisti, professor Firəngiz Əlizadənin "İthaf" əsərinin də ifa olunmasıdır. Maraqlı yaradıcılıq mübadiləsinə yol açan səfər barədə təəssüratlarını bölüşən Firəngiz xanım vaxtilə Ukraynaya tez-tez getdiyini və orada çoxlu sənət dostlarının olduğunu dedi: "Ukrayna bəstəkarlarının yaradıcılığını daima diqqətlə izləmişəm. Çünki onların bəstəkarlıq məktəbi keçmiş SSRİ-də ən qabaqcıl və güclü məktəblərdən idi. Görkəmli bəstəkar, müasir Ukrayna musiqisinin aparıcı simalarından olan Vadentin Silvestrovla dostluğum, tanışlığım hələ tələbəlik illərimə təsadüf edir. Festivalda bu böyük bəstəkarı yenidən görmək, onunla tamamilə yeni səpkidə yazılan xor əsərlərini dinləmək olduqca maraqlı idi.

Yeni musiqi axtarışlarına çağıran səfər zamanı həm də köhnə dostlarımızı görmək, Ukraynanın zəngin musiqi həyatının müasir durumu ilə yaxından tanış olmaq imkanı qazandıq. İki həftə davam edən bu möhtəşəm forumun keçirilməsini Ukrayna Bəstəkarlar İttifaqının, xüsusilə onun Kiyev təşkilatının sədri, gözəl bəstəkar İqor Şerbakovun böyük əməyinin nəticəsi hesab edirəm". Festivalda diqqət çəkən ən önəmli məqamlardan danışan həmsöhbətim, burada simfonik və çoxsaylı xor kollektivlərinin yüksək ifa nümayiş etdirmələrini vurğuladı.

Qeyd edək ki, tədbir çərçivəsində musiqi məsələlərinə həsr olunmuş konfrans da keçirilib. Firəngiz xanımın Azərbaycan musiqisi barədə ətraflı məruzəsindən sonra festivalın qonaqları, müxtəlif ölkələrdən gəlmiş tanınmış musiqiçilər, bəstəkarlar musiqimizin bugünkü durumu ilə bağlı suallar vermlş, forumda səsləndirilən əsərləri yüksək qiymətləndirmişlər.

Yeri gəlmişkən deyək ki, Kiyev qəzetlərində də Firəngiz xanımın festivalda səsləndirilən əsərlərinə geniş yer ayrılıb, onun yaradıcılığı barədə müxtəlif səpkili yazılar dərc edilib. Yerli "Den" (Gün) qəzeti bəstəkarımızın adını dodekafon musiqinin görkəmli nümayəndələri Vebern, Berq, Şenberq, Messian, Jon Keycin sırasında qeyd edib. Məqaladə deyilir: "Firəngiz Əlizadə Azərbaycanda və keçmiş SSRİ-də Vebern, Berq, Şenberq, Messian, Jon Keyc kimi bəstəkarların əsərlərini ilk dəfə ifa edən sənətçi kimi tarixdə qalıb. Onun öz əsərləri bu gün Avropa və Amerikanın məşhur festivallarında səsləndirilir. Buna görə də, o, 2003-cü ildə Kembric bioqrafik mərkəzinin diplom və medalına layiq görülərək adı "XXI əsrin intellektləri" siyahısına salınıb. Kiyevə isə bəstəkar, Parisdən, YUNESKO-nun baş direktoru Kaişiro Matsuuranın onu dünya incəsənət tarixinin ən şöhrətli titulu olan "Dünya artisti" fəxri adı ilə təltif etməsindən sonra gəlib".

 

Mədəniyyət.- 2008.- 22 may.- S. 9.