Şirinov E.

Oxu, tar!

Bu günlərdə respublikanın xalq artisti, tarzən Ramiz Quliyevin Xan Şuşinski adına Ağdam muğam məktəbinin kollektivi ilə görüşü keçirildi

Məlumat üçün bildirək ki, Ağdam muğam məktəbi 1985-ci ildən fəaliyyətə başlayıb. Yarandığı vaxtdan indiyə kimi məktəbə respublikanın Əməkdar Mədəniyyət İşçisi Rafiq Rüstəmli rəhbərlik edir. R.Rüstəmlinin 1987-ci ildə məktəbin nəzdində yaratdığı "Qarabağ bülbülləri" ansamblı dövlət tədbirlərində, M.Maqomayev adına Azərbaycan Dövlət Filarmoniyasında, televiziyada, hərbi hissələrdə geniş proqramla konsertlər verib.

Bundan əlavə, "Qarabağ bülbülləri" Daşkənddə, Moskvada, İraqda, Türkiyədə, Fransada və digər ölkələrdə qastrol səfərlərində olub, festival və müsabiqələrdə muğamlarımızın, milli musiqimizin təbliğində, sevilməsində böyük xidmətlər göstərib. Respublikada 275 musiqi məktəbləri arasında keçirilən müsabiqədə istər muğam, istərsə də xor kollektivi və xalq çalğı alətləri üzrə yüksək yerlər tutublar.
Muğam məktəbi yüzlərlə sənətkar yetişdirib. Onlardan əməkdar artist Firuz Səxavət, Opera və Balet Teatrının solisti Səbuhi İbayev, Sevinc Sarıyeva, Humay Məmmədova, Ehtiram Hüseynov, Fəqani Əliyev, Cabir İmanov, Ayaz Qasımov, Habil Hacıyev və digərləri republikamızın tanınmış, adlı-sanlı sənətkarlarıdır.
1993-cü ildə Ağdam şəhəri işğal olunduqdan sonra muğam məktəbi Biləcəridəki Q.Abbasov adına 284 saylı orta məktəbdə fəaliyyətini davam etdirir. 7 şöbə üzrə fəaliyyət göstərən məktəbdə təhsil alan 251 şagirdin təlim-tərbiyəsi ilə 50 müəllim məşğul olur.

***

Məktəbin akt zalında keçirilən tədbirdə muğam məktəbinin kollektivi ilə yanaşı, Qarabağın sayılıb-seçilən söz, sənət adamları, ziyalıları da iştirak edirdilər.
Tədbiri giriş sözü ilə açan Xan Şuşinski adına Ağdam muğam məktəbinin direktoru, respublikanın Əməkdar Mədəniyyət İşçisi Rafiq Rüstəmli ustad tarzənin və qonaqların gəlişləri ilə onlara sevinc bəxş etdiklərini bildirdi.
Görüşün əlamətdar bir tarixə təsadüf etdiyini vurğulayan R.Rüstəmli bu günlərdə "Şöhrət" ordenli, Prezident təqaüdçüsü, professor R.Quliyevin yaradıcılığının 40 illiyinin və doğum gününün respublikada böyük təntənə ilə qeyd edildiyini söylədi. Görkəmli tarzən R.Quliyevin ömür yolundan, yaradıcılığından, milli musiqimizin inkişafındakı xidmətlərindən bəhs edən natiq onun sənətinin ölkə rəhbərliyi tərəfindən dəfələrlə yüksək qiymətləndirildiyini vurğuladı. O, görüş iştirakçılarına Azərbaycan Telefilm Yaradıcılıq Birliyi tərəfindən hazırda tarzən R.Quliyevin həyatı və sənət yolu barədə sənədli film çəkildiyi haqda məlumat verdi. Rəhbərlik etdiyi məktəbin də həmin filmdə yer aldığını təqdirəlayiq hal kimi dəyərləndirən R.Rüstəmli R.Quliyevə və filmin yaradıcı qrupuna minnətdarlığını bildirdi (R.Quliyevin muğam məktəbinin kollektivi ilə bu görüşü filmin yaradıcı qrupu tərəfindən lentə alınırdı - E.Ş.). R.Rüstəmli 14 ildir fəaliyyətlərinə şərait yaradan 284 saylı məktəbin direktoru Təşkilat Əliyevə və pedaqoji kollektivə təşəkkürünü bildirdi.

***

Görüşün əhəmiyyətini vurğulayan Ağdam rayonu 71 saylı orta məktəbin direktoru, respublikanın Əməkdar müəllimi Səlim Əzimov son zamanlar musiqi mədəniyyətimizin zirvəsi sayılan muğam sənətinə göstərdikləri qayğıya, onun dünyada tanınmasında əvəzsiz xidmətlərinə görə dövlət başçısı İlham Əliyevə və Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, millət vəkili Mehriban xanım Əliyevaya təşəkkür edərək, muğam sənətinin inkişafına yeni yollar açmaq məqsədilə görülən işləri alqışladı. S.Əzimov milli musiqimizin inkişafında misilsiz rol oynayan tarzən R.Quliyevin qüdrətli sənətkarlarımızdan olduğunu qeyd etdı: "R.Quliyev bu gün yer kürəsini dolaşaraq, tarixi minilliklərə gedib çıxan milli musiqimizi bütün dünyaya tanıtdırır. Sevindirici haldır ki, Ramiz müəllimlə yanaşı, onun sənətini övladı Əyyub Quliyev də uğurla davam etdirir".
Respublikanın əməkdar jurnalisti, "Qızıl qələm" mükafatı laureatı Bəbir Hüseynov R.Quliyevin milyonlarla dinləyicini ovsunlayan sənətinin təkcə respublikamızda deyil, onun hüdudlarından uzaqlarda belə sevildiyini vurğuladı.
Xan Şuşinski adına Ağdam muğam məktəbinin müəllimi Cəlal Əliyev (Ağdamda fəaliyyət göstərmiş 1 nömrəli musiqi məktəbinin direktoru olub - E.Ş.) qürur hissi ilə bildirdi ki, vaxtilə onun şagirdi olmuş R.Quliyev bu gün ustad sənətkar kimi məktəb yaratmışdır: "Başqalarına bənzəməyən barmaqları, orijinal üslubu, fərdi ifaçılıq manerası ilə Ramiz Quliyev hamının rəğbətini qazanıb. Bir müəllim kimi mən onun ifasını daim diqqətlə izləyirəm. İnanıram ki, R.Quliyevin şöhrəti bundan sonra daha da artacaq".
Tədbir iştirakçılarından Mamed həkim R.Quliyevlə çoxillik dostluq əlaqələrindən söz açdı, onun ifasının, eləcə də səhnə davranışının milli mədəniyyətimizə söykəndiyini bildirdi.
Muğam məktəbinin müəllimi Barat Fərhadov isə dedi ki, R.Quliyevin ifasını dinləyərkən insan yalnız yaxşılıq, xeyirxahlıq barədə düşünür.

***

Nəhayət, söz səbəbkara verildi. "Şöhrət" ordenli sənətkar göstərilən diqqət və qayğıya görə ilk növbədə ölkə rəhbərliyinə təşəkkür etdi. Ustad tarzən çox böyük hörmət bəslədiyi, uzun illər onun qayğısını çəkən müəllimi Cəlal Əliyevə dərin ehtiramını yetirdi. Tarzən xüsusilə vurğuladı ki, dünya ölkələrinin ən böyük konsert salonlarında çıxış edərkən Azərbaycan milli musiqisini əcnəbilərə çatdırıb təbliğ etdiyinə görə həmişə qürur hissi keçirib. Böyük sənətkar onun sənətini qiymətləndirərək görüşünə gələn dəyərli ziyalılara, sənət dostlarına və tədbirin təşkilatçılarına minnətdarlığını bildirdi.
Tədbir əməkdar artistlər Firuz Səxavət, Cabir Abdullayev, Opera və Balet Teatrının solisti Səbuhi İbayev, muğam müsabiqəsinin qaliblərindən Ehtiram Hüseynov, ü.Hacıbəyov adına Milli Konservatoriyanın məzunu Humay Məmmədova və Barat Fərhadovun məharətlə ifa etdikləri "Qarabağ şikəstəsi" ilə başa çatdı.

Təzadlar.- 2008.- 13-20 may.- S. 14.