Şirinov E.

Üzeyirbəyşünas alimlə görüş keçirildi

Mayın 21-də Dünya Azərbaycanlılarının Əlaqələndirmə Şurasının mərkəzi ofisində dahi üzeyir Hacıbəyov irsinin tədqiqatçısı və təbliğatçısı, dünya şöhrətli sənətkar ü.Hacıbəyovun həyat və yaradıcılığının gözəl bilicisi Səadət Qarabağlının 50 illik yubileyi qeyd olundu.

"Azərbaycan Yazıçı Qadınlar Cəmiyyəti" İctimai Birliyinin və Dünya Azərbaycalılarını Əlaqələndirmə Şurasının təşəbbüsü ilə keçirilən tədbiri giriş sözü ilə açan yazıçı-publisist Nüşabə Məmmədli S.Qarabağlının ömür yolundan söz açdı. Yubilyar üzeyir bəy irsinin tədqiqi və təbliğində, eləcə də mədəniyyətimizin inkişafındakı əvəzsiz xidmətlərinə ğörə "Azərbaycan Yazıçı Qadınlar Cəmiyyəti" ictimai birliyinin təsis etdiyi "Tuti Bikə" mükafatı ilə təltif edildi.
Sonra çıxış etmək üçün söz Dünya Azərbaycanlıları Konqresinin sədri, Dünya Azərbaycanlıları Əlaqələndirmə Şurasının sədr müavini, görkəmli alim, tərcüməçi, şair, ictimai xadim, professor Qulamrza Səbri Təbriziyə verildi. Q.S.Təbrizi Səadət Qarabağlını təbrik edərək, onun yorulmaz fəaliyyəti haqqında danışdı. üzeyir bəy irsinin nəinki Azərbaycanda, hətta ölkəmizin sərhədlərindən uzaqlarda da tanınması üçün çabalarından söhbət açdı.
ömrünün otuz ilini üzeyir bəy Hacıbəyovun həyat və yaradıcılığının araşdırılmasına, təbliğinə həsr edən Səadət Qarabağlının üzeyir Hacıbəyovun ev muzeyində çalışdığı (1979-2005) illərdəki fəaliyyətindən söz açan Səməd Vurğunun ev muzeyinin direktoru, əməkdar mədəniyyət işçisi Aybəniz xanım Vəkilova, respublikamızın müxtəlif muzeylərində uzun zaman çalışan tanınmış muzeyşunas Amaliya Rzaqızı, R.Mustafayev adına Azərbaycan İncəsənət muzeyinin direktor müavini Elmira Qasımova, Cəlil Məmmədquluzadə ev muzeyinin direktoru Pəri Mahmudova, Cəfər Cabbarlının ev muzeyinin direktor müavini Qəmər Seyfəddinqızı S.Qarabağlının üzeyir Hacıbəyovun ev muzeyindəki unudulmaz xidmətlərindən danışdılar.
Məlum oldu ki, Səadət Qarabağlı 1957-ci ildə Naxçıvan Muxtar Respublikasının Şərur rayonunda anadan olub. 1977-ci ildə Şəki şəhər orta ixtisas musiqi məktəbinin fortepiano şöbəsini, 1984-cü ildə Bakı Dövlət Universitetinin jurnalistika fakültəsini bitirib. 1979-cu ildə üzeyir Hacıbəyovun ev muzeyində əmək fəaliyyətinə başlayıb. 1999-cu ildən 2005-ci ilədək muzeyin direktoru kimi üzeyir Hacıbəyovun həyat və yaradıcılıq irsinin toplanması, tədqiqi və təbliği sahəsində yorulmadan çalışıb. Bununla bağlı müxtəlif qəzet, jurnal və kitabda çoxlu sayda məqalələri dərc edilib, televiziya və radio çıxışları olub.
Qeyd olundu ki, S.Qarabağlı 1985-ci ildə SSRİ Mədəniyyət Nazirliyinin "Kəndə mədəni hamilik" əlaçı döş nişanı ilə təltif olunmuş, 2000-ci ildə Azərbaycan Kütləvi İnformasiya Vasitələri İşçiləri Həmkarlar İttifaqı Rəyasət Heyətinin "Nurlu qələm ustası" fəxri mükafatına, 2001-ci ildə Azərbaycan-Finlandiya ölkələri arasında mədəni və iqtisadi əlaqələrin möhkəmləndirilməsində göstərdiyi xidmətlərinə görə "Gümüş arzu" mükafatına, həmçinin "üzeyirbaycan" kitabına görə "İlin kitabı" beynəlxalq mükafata layiq görülmüşdür.
Natiqlər üzeyir Hacıbəyovun ev muzeyinin müdiri işlədiyi müddətdə bu müqəddəs ocağın mühafizəkarı, üzeyir bəy ruhunun yaşadığı otaqların havası ilə nəfəs alan, o qeyri-adi insanın adi əşyalarını əzizləyərək saxlayan Səadət xanıma elm-sənət korifeyinin ruhunun qulluğunda durmaq səadətini Tanrının ona iltifatı kimi dəyərləndirdilər.
"Qarabağa aparan yol" qəzetinin baş redaktoru, şair-publisist Əli Mahmud, "Xalq qəzeti"nin şöbə müdiri, əməkdar jurnalist Tahir Aydınoğlu, Ədəbiyyat və İncəsənət Dövlət arxivinin direktoru Maarif Teymur, xalq şairləri Səyavuş Məmmədzadə, Ramiz Heydər, Azərbaycan Dövlət Radiosunun əməkdaşı, əməkdar jurnalist Gülbəniz Hüseynli, professor Saleh bəy Qarabağlı, ü.Hacıbəyovun yaxın qohumu, Əhməd bəy Ağdamskinin oğlu, professor Telman Ağdamski, "Respublika" qəzetinin şöbə müdiri Esmira Fuad, görkəmli şair və publisist, mərhum Şahmar Əkbərzadənin həyat yoldaşı Mələk xanım Baharlı, Xan Şuşinskinin qızı Bəyimxanım Cavanşirova və başqaları çıxış edərək, böyuk tədqiqatçı-alim Səadət Qarabağlının mədəniyyətimizin inkişafındakı xidmətlərini xatırladılar, həmçinin onun üzeyir bəy irsinin araşdırılmasında və geniş təbliğindəki fəaliyyətindən, müəllifi və tərtibçisi olduğu "üzeyir bəy Hacıbəyovun publisitikasında musiqi məsələləri", "Şöhrət tacı", "üzeyirbaycan", "üzeyir bəy Hacıbəyov və Molla Nəsrəddin" kitablarından, "Ustadı xatırlarkən..." diskindən, 2006-cı ildə nəşr etdirdiyi ü.Hacıbəyovun "Arazbari" və "Aşıqsayağı" musiqi əsərlərindən, bir-birindən maraqlı 200-dən yuxarı məqalələrindən söz açdılar, yubilyara cansağlığı, ailə səadəti, yaradıcılıq uğurları arzuladılar...
Yubiley tədbirində İbrahim Əbilov adına Mədəniyyət Mərkəzinin ədəbi hissə müdiri, əməkdar mədəniyyət işçisi Mirəhməd Əsgərovun rəhbərlik etdiyi ansamblın müşayiəti ilə üzeyir bəyin əsərlərindən, xalq mahnılarından ibarət maraqlı musiqi cələngi tədbir iştirakçıları tərəfindən alqışlarla qarşılandı. Daha sonra üzeyir Hacıbəyov adına Bakı Musiqi Akademiyasının məzunu Əlirza Amanbəyli ü.Hacıbəyovun "Sevgili canan" romansını və "Qarabağ şikəstəsi"ni məharətlə ifa etdi. 202 saylı litseyin ədəbiyyat müəllimi Nafilə Abuzərlinin rəhbərliyi altında hazırlanan ədəbi-bədii proqdamda iştirak edən şagirdlərin ifasında Səadət Qarabağlının həyat və yaradıcılığından ibarət kompozisiya, yubilyara həsr edilmiş şeirlər və ü.Hacıbəyovun əsərlərindən səhnəciklər tədbirə xüsusi bir əlvanlıq, xoş ovqat gətirdi.
Sonda yubilyar çıxış edərək tədbirin təşkilatçılarına, iştirakçılara və qonaqlara minnətdarlığını bildirdi.
Tədbir üzeyir bəy Hacıbəyovun "Koroğlu" operasının uvertürasının sədaları altında başa çatdı.

Təzadlar.- 2008.- 27 may.- S. 15.