Ağdaşda
Habil Əliyev təntənələri
Azərbaycanının
gözəl, füsunkar, gül-çiçəyə
qərq olmuş güşələrindən biri olan
Ağdaş şəhərində həmin gün xüsusi
bir canlanma var idi. Azərbaycana bir çox görkəmli şəxsiyyətlər,
dahi sənət və elm adamları
bəxş etmiş bu torpaqda mayın
17-də məşhur
kaman ustası, xalq artisti Habil
Əliyevin 80 illik yubileyi keçirildi. Minlərlə ağdaşlı,
yaxın rayonlardan və xarici ölkələrdən gələn
yüzlərlə qonaq
bu tədbirə təşrif buyurmuşdu.
Habil müəllim yubiley tədbirində özünü
çox gümrah və xoşbəxt hiss edirdi. Ömrünün
60 ildən çoxunu
ifaçılıq sənətinə
həsr etmiş, Azərbaycan mədəniyyətində
və incəsənətində
misilsiz xidmətləri
olan, Vətənimizin
ali mükafatları -
"Şöhrət" və
"İstiqlal" ordenləri ilə təltif edilmiş xalq artisti öz
həmyerliləri qarşısında
qürur və fəxarət hissilə dayanmışdı.
Mədəniyyət və maarif işçiləri ilə
Habil müəllimin görüşü Ağdaş
şəhər humanitar
kollecində keçirildi.
Tənzilə Şıxıyevanın rəhbərlik etdiyi müəllim və tələbə kollektivi ilə yüksək səviyyədə hazırlanmış
görüşdə sənətkarın
ifa etdiyi muğamların səslənməsi,
onun özünün bəstələdiyi mahnıların
gənc müğənnilər
tərəfindən
məharətlə oxunması
Habil müəllimi həm sevindirir, həm də kövrəldirdi.
Ağdaş rayon
mədəniyyət şöbəsinin
müdiri Tahir Əliyevin, pedaqoji kollektivin rəhbəri Tənzilə Şıxıyevanın
və bir çox rəhbər işçilərin çıxışlarını
mərasim iştirakçıları
alqışlarla qarşıladılar.
Habil müəllim tələbə
və müəllimlər
qarşısında çıxış
edərək, ona göstərilən bu səmimiyyətə, hörmət
və ehtirama görə bütün kollektivə dərin minnətdarlığını bildirdi.
Çay süfrəsi
ətrafında isə
Habil müəllimdən
kamanın simvolu olan böyük tortu kəsmək
xahiş olundu. Sənətkara dəyərli hədiyyələr
bağışlandı.
Ağdaş rayon
icra hakimiyyətinin başçısı Rafiq
Niftalıyevin rəhbərliyi
ilə böyük iclas zalında rayonun rəhbər işçiləri, ziyalıları
və ağsaqqalları
ilə keçirilən
görüşdə Heydər
Əliyev Fondunun Prezidenti, YUNESKO və İSESKO-nun Xoşməramlı səfiri Mehriban xanım Əliyevanın təbrik məktubu səsləndirildi və sürəkli alqışlarla
qarşılandı.
Habil Əliyev
sənətinə böyük
hörmət və ehtiram göstərən rayon rəhbəri ustad ifaçını yalnız Azərbaycanda yox, bütün dünyada ad qazanmış böyük
sənətkar, xalqımızın
fəxri kimi qiymətləndirdi. Rafiq müəllim
ölkə rəhbərliyinin
bütün sənətkarlara,
o cümlədən Habil Əliyevə sonsuz qayğı ilə yanaşdığını
xüsusi vurğuladı.
Akademik Bəkir
Nəbiyev görkəmli
sənətkarı Azərbaycan
musiqi ifaçılığının
patriarxı adlandırdı.
Xalq şairi
Fikrət Qoca Habil müəllimlə dostluğundan söz açdı,
onun yaradıcılığını
Azərbaycan ifaçılıq
sənətinin əlçatmaz
zirvəsi kimi qiymətləndirdi. Şair
ustad ifaçıya həsr etdiyi "zarafatyana" ruhlu şeirini oxuyaraq, yubilyarı cavanlıq illərinə qaytardı.
Yazıçı-dramaturq Xeyrəddin Qoca Habil Əliyev
haqqında bir sıra Şərq ölkələri alimlərinin və musiqiçilərinin
söylədikləri fikirləri
bir daha diqqətə çatdırdı.
Görüşün sonunda Habil müəllim
çıxış edərək,
ona göstərilən
qayğıya və diqqətə görə ölkə rəhbərliyinə,
o cümlədən Ağdaşdakı tədbirlərin
yüksək səviyyəli təşkili ilə bağlı rayon icra hakimiyyətinə, bu mərasimlərdə əməyi olanların hər birinə minnətdarlığını bildirdi.
İcra hakimiyyətinin
iclas zalındakı görüşdən sonra
yubiley iştirakçıları
ümummilli lider Heydər Əliyevin abidə kompleksinə tərəf yollandılar,
abidənin üzərinə
qızılgüllər
qoyaraq, ulu öndərin xatirəsi qarşısında baş
əydilər.
Heydər Əliyev Fondunun
qayğısının təzahürü
kimi Ağdaş şəhərində müasir
tipli musiqi məktəbinin təməli
qoyuldu və bu məktəbə görkəmli sənətkar
Habil Əliyevin adının verilməsi qərarı ürəkdən
bəyənildi.
Rəsmi mərasimlərdən sonra Heydər Əliyev adına parkda incəsənət ustalarının konsert proqramı başladı. Dəyərli sənətkarlarımız
Möhlət Müslümov
və Fəxrəddin
Dadaşovun müşayiətilə
bir çox istedadlı, tanınmış
sənətçilər ürəkaçan
çıxışlar etdilər.
Əziz dostum
Habil müəllim!
Yubileylə bağlı
dinlədiyiniz bütün
təbriklərə qoşularaq,
mən də Sizə ən xoş arzularımı bildirirəm. Arzum budur ki, təkcə
barmaqlarınızdan yox,
qəlbinizin dərinliklərindən
süzülüb gələn
ifalarınız xalqımızı
hələ uzun illər ərzində feyziyab etsin. Bir də Sizə
tezliklə Şuşanın
İsa bulağından
sərin su içərək, "Habil
Segahı"nın sədalarını o yerlərə təşnə
olan ruhumuza yaymağınızı arzulayıram!
525- ci qəzet.- 2008.- 27 may.- S. 7.